❤ايرين❤

الجزء العشرون

بي صوت الصراخ كلهم جو جارين وبيسالو في شنو؟؟
عمر :عمي مالكم في شنو؟وريري مالها في الارض؟
صلاح : اختك عامله غراميات في البيت مستغله غيابنا
عمر بي صدمه : نعم ؟
ريري بي صوت مخنوق : والله ماجبت زول
صلاح : دايراني اكذب عيني والولد نط من الشباك
عمر قرر يطلع : انا ماعندي اخت اصلآ ...يلا يا عمار
عمار عاين لي ريري بلا مبالاة وطلع ورا اخوهو
خالد ولد مها قال جوه نفسو ده موضوع مابخصني ولحق عمر وعمار
محمد : انا حعمل شنو معاك ...قولي ...ضربها في وشها لغاية ماخشمها نزف .. اقتلك وارتاح
جاسم كان واقف ومقبل وشو لانو عمو جاريها من شعرها ولابسه بجامه شورت : ياابوي انا بتزوجها
نعمات ومها شهقو من الصدمه ...
نعمات : لا طبعآ مستحيل ارضى ليك بي واحدة زيها
محمد : قفلي خشمك يانعمات
نعمات : مابقفلو ولدي مابيعرس ....
محمد : علي بالطلاق يانعمات ماتقفلي خشمك ماتبيتي الليله في البيت ده
نعمات اتخلعت كانت دايرة تتكلم طوالي هاله ختت يدها فوق خشمها : الله يرضى عليك يانعمات مادايرين مصيبه تانيه يلا نطلع فوق كلنا ودي بت اخوهم مالينا دخل
سحبت نعمات بي قوه ونادت زهرة طلعو في جناح نعمات وقعدو..
محمد : حسي تمشو تجيبو المأذون ...وياجاسم سنه تستحمل بت عمك لا تعرس فوقها لا تتطلقها وبعد تخلص اعمل العايزو
جاسم :تمام
ريري وهي في الارض: والله ماعملت حاجه حرام عليكم .....
صلاح : قفلي خشمك مادايرين نسمع صوت
عبدالله : ضربت لي الشيخ جاي بعد شويه
محمد : يامها في اسبوع بس تجهزو لي عرسهم
مها لسه مصدومه وما انتبهت لي محمد وهو بيتكلم معاها
محمد بي صراخ : يامها
مها اتلفتت مخلوعه : ايوه ..ايوه
محمد :سمعتي كلامي
عضت لسانها : ايوة سمعتك
سمر وندى بيبكو وواقفين مامصدقين انو ريري تعمل كده
محمد : سمر ...ندى .تعالو سوقوها من وشي
سمر مشت ورفعت ريري سندتها عليها وندي مسكتها من الجهه التانيه وصلوها غرفتها
سمر : ندي امشي جيبي مويه وفوطه عشان ننضف وشها
طلعت ندى من غير ماتتكلم منظر ريري بوجع القلب
ريري : سمر والله ماعملت حاجه كنت نايمه وصحيت بي صوت عمو صلاح وهو بيصرخ بعد داك بقى يضربني
سمر : انا مصدقاك ياريري وعارفه العمل فيك كده منو ؟
ريري :منو ؟
سمر : عمتي
ريري : ليه طيب
سمر : هي اصلآ بتكرهك وبعدين سمعتها بتقول لي واحد طالعين بعد المغرب وحكاية العصير
ريري : طيب ليه ماقلتي ليهم ؟
سمر : تتخيلي حيصدقوني؟ وبعدين ماعندي دليل وعمتك حتكذب كل حاجه
ريري بي احباط: صح كلامك مابقول غير حسبي الله ونعم الوكيل وزي ماظهر براءة السيده عائشه ان شاء الله برائتي حتظهر
سمر : ماشاء الله عليك ياريري قويه ..انا لو مكانك بقلبها مناحه وبدخل المستشفى عدييل
ريري : انا دموعي صعب تنزل بالساهل الا للغالين علي وهم بالعدد ده اول حاجه ...وتاني حاجه انا واثقه من روحي وماعملت غلط يخليني ابكي ... الحاجه الوحيدة المزعلاني هي حكاية الزواج دي
سمر : جاسم ماكعب ياريري
ريري :ماحكاية كعب بس الزواج ده عشان يستر على بت عمو 😕 حتتخيلي حيكون كيف
ندى جات بالفوطه نضفو لي ريري وشها وبقو يتونسو معاها عشان يخففو عليها بعد نامت سمر قبلت على ندى : اقول ليك حاجه ياندى ... عمر سقط من نظري
ندى طوالي دموعها جرت : بعد الموقف ده قررت قرار بس بعد الدنيا تهدا بنفذو
سمر : قرار شنو ؟
ندى مسحت دموعها : ماوقتو يلا نطلع نخليها ترتاح
ريري كانت حاسه بي برود عجييب لي درجة انها نامت للصباح ولما صحت عرفت من سمر انها بقت زوجت جاسم ما اهتمت بالموضوع كانو بخص شخص تاني ...
عدى الاسبوع وهي في الغرفه مابتتطلع شالو تلفونها ومنعو ننو تدخل ليها بس بيجوها سمر وندى يوروها اشترو ليها شنو ؟ حجزو في صاله عشان العرس ... وجهزو كل حاجه
الليله العرس سمر جات داخله وادتها التلفون : هاك
ريري : منو ؟
ختت ليها التلفون في يدها :اتكلمي وحتعرفي
-الو
-ريري
-ماما ...صرخت :مامااااا
ام ايرين بقت تبكي :ظلموكي يابتي اهلك ظلموكي
ريري يادوب بقت تبكي :ماما تعالي سوقيني
ام ايرين :ياريت لو ينفعك
ريري : ما بهمني بس تعالي سوقيني معاكي
ام ايرين : امسحي دموعك ابوكي مارباكي كده ...انا اتكلمت مع عمك فاكرني حصدق انا عارفه تربية ابوكي يعني لو شفتك قدامي ماحصدق اياكي تبكي ماتهتمي لي زول في يوم حتظهر الحقيقه ولغاية الوقت داك ماتضعفي ...سامعاني ياريري
ريري مسحت دموعها : حاضر ياماما ... طالما انتي معاي مابيهموني الباقين
ام ايرين : ابتسمي واضحكي غيظي عمتك .
ريري : عمتي ؟؟
ام ايرين : سمر حكت لي
رفعت راسها شافت سمر واقفه ودموعها نازله : من عيوني ياماما باي عشان اجهز نفسي الليله عرسي 😂
ام ايرين : ايوه كده اضحكي ..باي ياروحي
قفلت الخط وقامت جرت على سمر : الحمد الله ربنا اداني احلى اخت في الدنيا
ندى وننو جو داخلين : وانحنا
مسكتهم كلهم وحضنتهم : بحبكم
سمر زحتها : يع يامنحرفه
ريري ضحكت : والله تفكيرك انتي المنحرف
ندى ضمت ايرين وباستها : والله اشتقت ليكي
سمر :يع يع منحرفات

❤لا تلهيكم عن الصلاة❤