❤ايرين❤

الجزء الاخير

جاسم : امممم ديل اولادي؟
اتخلعت عاين لي الاولاد ورجعت عاينت لي جاسم : كيف وانت......؟
جاسم : انتي كذبتي الكذبه وصدقتيها ولا شنو ؟
شذى :انا ماكذبت
جاسم :ياشيخه ..طيب سؤال انتي حاليآ عندك رحم ؟؟
فكت يدها وبعدت منو: أأ  ..أنا .......
جاسم : انتي شنو ؟اها طيب اجهضتي كم مره ؟ لا واصلآ حملتي من منو؟
طبعآ العيله في حالة صدمة بالسامعينو ماعدا محمد ونعمات ...وريري اصلآ مابهمها الحاصل زي كأنو بتحضر مسلسل ..
شذى : انت بتقول شنو ؟ ده منو الكذب عليك
جاسم :عايزة نمشي لي الدكتور ونفحص بس المرة دي لي دكتوري انا
عرفت روحها انكشفت وقعت تحت رجلو وبقت تبكي وتترجاهو شاتها بعيد
جاسم : ابعدي مني احمدي ربك حصلت حاجات خلتني مااقتلك بعد عرفت... وحاليآ انتي طالق...طالق ....طالق
شذى بكاها زاد هي حبت جاسم وكان بالنسبه ليها جنتها طلعت من الصالون ومشت تلم حاجاتها عشان ترجع لي اهلها  ..
نعمات :وانا عندي اعتراف كلكم انتبهو معاي ححكي ليكم حصل شنو قبل 6 سنين
بدت تحكي ليهم كلهم انصدمو وريري بتبكي كانت واثقه انو برائتها حتظهر ..بعد نعمات خلصت كلهم قبلو عليها صلاح حاول يتكلم بس هي سكتتو بي اشارة من يدها : معليش بس ماعايزاكم تقولو حاجه اعتبروني موتا
طلعت طوالي من البيت اخدت اول ركشه لقتها قدامها ورجعت البيت مشت لي امها في الغرفه
-ماما
ام ايرين كانت بتخيط وقاعده فوق سريرها : ريري رجعتو ...عاينت في وشها :مالك؟ كنت بتبكي ؟
ريري رمت نفسها في حضن امها : ماما برائتي ظهرت
وبقت تبكي :بس بعد كسروني ياماما
ام ايرين :ماكسروك .ايوة اضربتي بس الضربه قوتك ماضعفتك ..انتي بت مصطفى يعني علمك مهما وقعتي ترجعي تقيفي تاني وانتي وقفتي
ريري ماردت بس ضمت امها زياده وغمضت عيونها نامت وهي مرتاحه وبتحمد ربنا ...
بعد اليوم ده بيتنا بقا ديمه فيهو ناس عمو صلاح وعمو محمد عمر وعمر وخالتو هاله وخالتو زهرة
كل يوم بيجو يطلبو السماح ..
ماما ساقتني مرة قدامهم قالت لي لو ماسامحتيهم تبقي مابت مصطفى لأنو هو دايمآ كان بيعلمك تسامحي وقت تكوني على حق )العفو عند المقدرة( علمك قلبك ما يكون قاسي ديل اهلك غلطو وحسي طالبين السماح ..
سامحتهم عشان خاطر ماما وبابا بس ما اظن في يوم ابقى اعتمد عليهم اتعلمت من اول مرة بالاخص اخواني خذلوني مرة وده ماحيتكرر بأذن الله...
جاسم الوحيد ماسامحته ولا هو طلب لأنو عارف العملو اكبر من كلمة مسامحه بس في يوم جا وقعدني قدامو قال لي : ريري انا ماجاي اطلب السماح لأني العملتو ماقادر اسامح نفسي عليهو بس دايرك تديني فرصه اعوضك عن العملتو عايزك تجي انتي والاولاد تعيشو معاي واي شرط انتي عايزاهو بنفذو واي حاجه بعملها ليكي ..
ريري :اعيش معاك ؟
جاسم : ايوة انا اشتريت بيت هنا قريب من ناس امك ووعد حنعيش انا وانتي زي الاخوان ماحقرب منك الا يوم تجيني براك..
ريري فكرت في اولادها عايزاهم يعيشو وسط امهم وابوهم وفكرت في امها لسه شايله همها وبتفكر في حالة بتها فقررت تمشي تعيش معاهم طالما براهو وضع الشروط الكانت حتقولها :اوكي موافقه
اتخلع ماكان مصدق انها حتوافق : قولي والله موافقه يعني خلاص قررتي تجي تعيشي معاي
ريري :ان شا الله
جاسم :اول حاجه حنعملها حنأثث البيت
وشهر كامل انحنا بنأثث اخدنا الاولاد اختارو غرفهم البيت كبير من تلاته طوابق تعبنا لغاية ما اتأثث وحتى ماما وتيتا وننو جاسم اصر يجي يعيشو معانا ..
وحياتي بقت حلوة لسه ماسامحت جاسم بس هو بعمل كل حاجه عشان اكون مبسوطه مرات بقول اسامحو بس بتذكر الليله ديك وبرجع اقسي قلبي بس مصيري اسامحو لكن مامعروف متين..
اخواني اي سامحتهم لكن ما حنبقى زي اي اخت واخو... اتبني حاجز بيناتنا بقيت اتعامل معاهم بي رسميه شديده هم واعمامي بالرغم من انو عمر وعمي صلاح كل يوم في بيتنا بيحاول يرجعوني عادي بس صعب بعد اتخذلت منهم
❤❤❤

ندى اتزوجت عمر بعد طلعت عينو😂 وحسي هو مطلع عينها بياخد حقو منها  .
خالد وسمر اتقربو ايام وفاة امو وحاليآ عرسهم قريييب بس خالد هادي وسمر الجنان نفسو بس بيحبها بي جنونها
اناوجاسم كل يوم بيثبت انو بيحبني ماقالها لكن افعالو بتثبت وبيغير من هشام غيرة ماعاديه ...اي هشام لحقنا للسودان بس راجع تاني بعد جنن جاسم 😉
❤❤❤❤❤
العفو عند المقدرة .. سهل تقولها لي زول بس وقت الجد بيبقي صعب تنفذ بالاخص لو الظلمك انسان قريب ليك كنت خاتي ليهو مكانه عاليه او هو اقرب انسان ليك ...
❤❤❤❤❤❤❤
كونو بخير
استودعكم الله الذي لا تضيع ودائعه