حبيبتى المشاكسة بقلم أميرة السمدونى

الفصل 3

الفصل الثالث

تبددت ستائر الظلام مع شمس يوم جديد ،تفتح فيه هايدى عينيها ببطء وهى تتأمل تفاصيل المكان الغريب من حولها ،لتبدد نرمين المقيمة بجوراها دهشتها وهى تقص عليها ما حدث بالأمس ،تستمع هايدى بذهول بينما نرمين تجلس على كرسى بلاستيكى مجاور للسرير وهى تتنهد بعمق:_
_ قلبى وقع فى رجليا كنت خايفة مشفكيش تانى

منحتها هايدى إبتسامة لطيفة تخفى خلفها ألامها متظاهرة بالقوة :_
_ ليه يا بنتى ما أنا زى القردة قدامك أهو

قوست نرمين شفتيها بهلع من هواجسها معاتبة نفسها :_
_ حسيت أن لو حصلك حاجة حكون أنا السبب عشان طاوعتك على جنانك ده ونزولك فى نصاص الليالى

ردت هايدى بتهكم :_
_ هو أنا عيلة صغيرة يا نونى عشان تمنعينى ...؟، أنا عارفة مصلحتى كويس فين

وضعت نرمين يديها خلف ظهر أختها لتساعدها على النهوض وهى تقول :_
_ طيب يلا قومى غيرى عشان نرجع البيت بابا وماما زمانهم ميتين من القلق عليكى

هزت هايدى رأسها رافضة بحزم قاطع :_
_ لا مش حرجع البيت تانى أبدا.

عقدت نرمين ما بين حاجبيها بضجر :_
_ ليه يا ديدى أنتى عارفة أن بابا مريض قلب ومش حمل فضايح ومركزه كمان حساس،أستهدى بالله و يلا نمشى

عللت هايدى إصرارها :_
_ نرمين طارق مش حيسبنى لو رجعت ،وأنا معنديش أستعداد أروح ضحية الروابط الأسرية وأتجوز واحد مبحبوش

أستفسرت نرمين فى قلق :_
_ طيب حتعملى أيه دلوقتى ..؟

أردفت هايدى بجدية :_
_ مش أنا ال حعمل أنتى روحى البيت دلوقتى هاتى لى طقمين حلوين على ذوقك وفلوس عشان حنزل فى فندق الفترة الجاية لحد ما ربنا يسهلها

قاطعتها نرمين:_
_ بس ...

أستكملت هايدى بنفس حماسها وعنادها :_
_ مفيش بس قومى وبطلى لماضة .

أستسلمت لها نرمين خوفا من أن تقطع أتصالها بها خاصة وإنها الحبل الأخير لعائلة الدقاق للإطمئنان على ابنتهم

ما أن غادرت نرمين حتى أعادت هايدى شعرها الحريرى الناعم إلى الخلف وهى تعدله أمام المرأة وتبدل منامة رنا البنفسجية لترتدى سروال جينس أزرق وبلوزة ثلجية خاصتها ،لتقدم واجب شكر لأمجد وصديقه ،فأتجهت إلى الصالة حيث جلس أمجد مع صديقه مراد وهو يقرأ ورده اليومى بينما سرح أمجد بنظراته فى الفراغ ، يتذكر ما حدث فى تلك الليلة منذ ثلاثة أعوام وفراقه عن فلذة قلبه ،لتقطع عليه هايدى بكفها القصير المتردد خلوته :_
_ مش عارفة أشكرك إزاى

مد لها أمجد كفه وقال فى فضول ممزوج بالمكر :_
_ العفو ،بس يا ترى أيه ال ممكن يدفع إنسان إنه ينتحر ..؟،يعنى يخسر دنيته وكمان أخرته ..؟