الجزء الثاني
كعدت الصبح واخذت فستاني البصلي ورحت للصالون اني وزهراء وايناس اخت مصطفى
وصلنة اخوية سالم وراح
كاعدين نتظر دوري وهستوهم استلموني وجتي بنية كالت منو جوري انداريت عليهة
- اني تفضلي
- حبيبتي اخوج يريدج برة
- اخوية !!
زهراء كالت
-خليج جوري اني اروحلة
- حبيبتي هو اكد علية كال لازم جوري تجي مو غيرهة
- دخلي اروحلة زهراء اشوف شيريد
- يلا جاية وياج
طلعت وادور على اخوية وجان يجي واحد ولزم ايدي
- هاي شنو منو انت وشدتسوي !
- امشي وياية ،، صعدي بالسيارة
ركضت زهراء
- اخي منو انت !! وشرايد من جوري
- انتي مرة سالم العود ،، سلميلي عليهم وكليلة لعمي خليل ابو الاصول
فهد ابن اخوك اخذ بنت عمة ونهة عليهة
واخذهة ودفعني بالسيارة وكعد يمي وامر السايق ينطلق
اباع على زهراء كامت تعيط وركض فاتت للصالون اكيد حتى تتصل على اهلي
وبدت السيارة تبتعد كمت اعيط واضرب وكل شي سويت ردتة بس يعوفني
- الله ليوفقك شمسويتلك اني شتريد مني احجي
- اش سكتي ولتحجين شي مالي خلگج
- مالك خلگي شنو دااكولك نزلني وديني لاهلي مااريد اجي وياكم
انتو عصابة لو شنو ؟؟
- ولج احترمي نفسج عصابتيش احنة ولد عمج من دمج ولحمج
- ولد عمي !! يعني اني عرضكم شلون ترضون علية هالمهانة والمذلة
- بنتي سدي حلكج لحد منوصل وبعدين تفتهمين القضية
ساعتين متواصلة اني ابجي واحجي لحد محسيت تعبت وقوتي راحت واني قبل يوم منايمة من الحماس للخطوبة
غفيت وماادري شكد غفيت لمن حسيت السيارة وكفت وشفت سيطرة وليفوك مكتوب قطعة
عن اسم نقطة التفتيش
والموقع البصرة
تخبلت وطلعت عيوني ليكدام شجابنة للبصرة
اجة ابالي اشتكي عليهم لنقطة التفتيش الواكفين
وكأنما قرى الي ابالي
وخزرني
- اذا تحركتي حركة وحدة متلومين الة نفسج
اجة الضابط يباع علينة وطلع يعرفهم وسلم عليهم وطلعنة كملنة طريقنة
وصلنة لبيت كراجة چبير وحديقة على الجانب الايمن كلش چبيرة وكلهة زرع
نزلت وياهم والله ذب علية السكوت مانطقت بحرف
لحد مافتنة من باب عالمطبخ جان كلش چبير وبي كاونترات داير مداير وحاطين عالجانب نص تخم قنفات وتلفزيون
طبينة اني والولد لكينة مرة سمينة كاعدة على القنفة وبيدهة الريمونت ويمهة كاعدة بنية شابة
- فوتي لتظلين صافنة
- عفية انت وين جايبني ؟؟ اني مااعرفك
الله يخليكم ولله اريد امي فدوة
دخيلج خالة ولله اني اليوم خطوبتي
اكيد هسة اهلي نار علية وخايفيين كلش
- تعالي بت خليل تعالي أكعدي
شيجي من ورة ابوج غير بس المصايب مشفنة منة خير
- خالة انتي لويش دتحجين على ابوية هيج
انتي من وين تعرفي
احجي ودموعي عشرة عشرة
جتي بنية تطلع بكصتي وكفت يمي وكالتلي
- تعاي وياي جورية لاتخافين احنة بيت عمج اخو ابوج وانتي بنت عمنة ماتطلع اذيتج من عدنة
كومي حبابة وياي
كمت وياهة وانطتني دشداشة من عدهة وكلتلي فوتي سبحي ارتاحي اخذت الدشداشة وكعدت على فراشهة
- الله يخليج انتي مبينة خوش بنية
انتو لويش خطفتوني من اهلي ،، شتريدون مني
- حبيبتي احنة ماخطفناج ،، اسم الله شنو هالحجي
شوفي اني راح افهمج القصة
قبل سبع سنوات
ابوج الله يحفظة باع قطعة ارض جبيرة واخذ فلوسهة ومن حاججة ابوي وكلة ماانطيتنة حصصنة نكر وگال هاي الگاع ابوي سجلهة باسمي قبل لا يموت ومشت القصة طبيعي
قبل كم سنة اجة واحد لابوي وگلة ان الگاع النة حصة بيهة وابوج غلس علينة ومانطانة
ابوي دز على ابوج وهددة وگلة اذا ما ترجع حقنة نشتكي عليك ونكول عنك مزور
ابوج اجة واعتذر منهم وكللهم جنت بضائقة مالية وانتو اخوتي وامون عليكم وانتو حلالكم هواي ماراح تموتون جوع اذا اخذت هاي الگاع
ابوية وعمي كلولة جان كلتلنة واحنة ساعدناكم مو تغبن حقنة هذا يسمو اغتصاب حق
رادو يتعاركون عمي محمد رجال يخاف الله وحكيم وكلهة تاخذ مشورتة
- كللهم احنة اخوان والفلوس شي مو مهم المهم خوتنة
واحنة ابتعدنة هواي بسبب اهالينا ولان والدتك ووالدتي مجانو على صلح احنة لازم نوحد القرابة شوف ياابو سالم
ابنك سالم ياخذ بنت عمة وبنتك لابن عمهة وتفض السالفة واعتبر الكاع هدية زواج الاولاد
ابوج وافق وكال هاي هية واني اتشرف بنسب ابو فهد يقصد على ابوي بس عندي رجاء خلي يكملون دراستهم وبعدين نفكر بالزواج
وافقو وفضت السالفة
ورة سنتين اجة والدج وكال لابوي سالم عشك وحدة بالكلية ووالولد مريض لا ياكل ولايشرب وانا حرت بين وعدي الكم وبين ابني
شتكولون
كلولة ولايهمك طاح الفرض منك زوج الولد دامة عشكهة
خلصت القصة الهنا
قبل يومين تفاجئنة بخطوبتج وبدون حتى ماياخذ رأي ابوي وعمي ولايدز عليهم
وهنا صعدت عنهم وكالو بعد كافي نطينا هواي اعذار وفرص بس ماانصلح ودزو فهد يجيبج ويجي وينهون عليج اخواني
- يعني شنو نهة علية !!
- يعني تزوجين واحد من اخواني
صفنت معقولة ابوية تطلع منه هالسوالف ردت مااصدگهة بس الفلوس الي اجتنة غفل وصعدت احوالنة وبابا كاللنة هذا ورث اجاني
حرت بزماني شسوي هالنوب القهر الاعظم انو اني الي وكعت ضحية ابيت كلهة كارهتني من ورة عمايل ابوية
- حبيبتي لتنقهرين انتي ماالج ذنب ان شاء الله تنحل الامور بالحسنى
واخواني خوش زلم والناس تتمنى تناسبنة
- انتي شتحجين هيج سهلة هيج وحدة تعيش بين ناس متعرفهم ولاسامعة عنهم
زواج يعني عمر مو يوم ويومين
ظليت ابجي ياناس اني شنو ذنبي اريد امي رجعوني لماما
طلت علينة المرة السمينة وكالت
- عيني ام ماما شنو ناسية مميتج نجيبلج حليب
كعدي وسكتي مرة شطولج وتصيح ماما
ثبرتينة بالبجي مالج يلا تعاي اكليلج لگمة وانطمري لحد منفض شغلتج !
يتبع
أنت تقرأ
جوري
Dragosteقصه منقوله للكاتبه shahad of love تحكي القصة عن الزواج بالاكراه بسبب العادات التي مازالت الى الان في مجتمعنا لكن !! هل جذور الكراهية تنبت وتنتج ثمار الحب
