جوري

البارت الرابع عشر

الجزء الرابع عشر

يعني مرات الانسان يوگع بمواقف ميعرف شيحجي او يتصرف
اني حالياً صرت مثل بلاع الموس لا بية احجي واخرب فرحة مهاوي ولا بية اسكت واحطم مستقبلهة
شلون !! شتصرف !! شگول
وارجع اچذب نفسي واكول لا يمكن هو طبيعتة هيج يحب يتشاقة ويتلاطف
وارجع اكول لا نظراتة مو مال واحد يتشاقة
بلا اني شلون بية !! صدك لو گالو المنحوس منحوس
لو علگو على راسة فانوس !!
مرت الحفلة ومرت ايام وراهة ونسيت السالفة
فهد علاقتي بي طبيعية
لا راح اگوللكم مدللني ويتنفس هواية وشايلني بالصلوات
لا هو ممقصر صحيح لكن يروح ويرجع هو رجال
والرجال معروف بتقلباتة
ساعات احس روحي مالكة الكون
وساعات يكون تعاملة وياية ميفرق عن تعاملة وية مها اختة
فد يوم راح لبغداد وكال ابات هناك
توسلت بي اروح ويا
- جوري وداعتج غير يوم اخذج بس هسة وية الولد مااكدر
- فهد ولله مشتاقة لاهلي
- باعي كتلج اخذج ولله غير وقت وبالطيارة نروح شتسوين بشلعان گلب وطريق وحارة
- اووووف امنيتي اكولگ شي وتلبيلي لازم تحطني عالشحن
عفتة وانداريت بعدني ممكملة الاستدارة لزمني من ايدي ودارني الة
- باعي اول واخر مرة تعلين صوتج بوجهي وتندارين افتهمتي لو لا ! ويلا روحي حضري جنطتي بسرعة
انداريت كعدت بالكاع وبديت اصفط ملابسة بالجنطة
بعيوني دموع واسحبهم مااريد ابچي وافشل نفسي
رتبت جنطتة وكملت دااكوم شفتة واكف قريب مني
مشكلتة حتى لو يحس بنفسة ضوجني يكابر ميعتذر ولا ينطي بنفسة
يجيبهة بطريقة غير مباشرة بس ميعتذر
- اكلج جوجو حبابة اكويلي القميص الرصاصي والبنطرون البيجي
- ماشي
كملت كل شي ونزلت اعاونهم عالعشة صبينة واكلنة هو طلع ورجع
غسلت المواعين وصعدت سبحت وبدلت داانام وانفتحت الباب واجة فهد شمر سويج السيارة عالميز
واجة عالفراش وتمدد ورفع الغطة عني
- جورية شنو نايمة
- اي
- شبيج مريضة
- لا
- كومي اريد احاجيج
- شنو
- حضرتيلي غراضي
- اي
- شنو هسة اي لا اي لا
احجي مثل الناس
- شحجي !
بقة يتشاقة ويسولف ويضرب ويعاكس واني ام گلب الفطير بسرعة ضحكت
نمنة بيومهة بعد ما عشنة بيهة لحظات كلش حلوة
نمت بحضنة للصبح وكل ماابتعد يرجع يسحبني ينومني على ايدة
صار الصبح وحضرت الريوك وودعتة وراح
داارجع انام واجتني خالة تركض
-همزين كاعدة راح اروح للسوك وانتي ابدي نظفي البيت اليوم خطيب مها يتغدة يمنة
- ادري خالة بس بعد وكت
- لا يمة احسن حتى ب١٢ مكملين شغلنة
- صار
- مو تكعدين مها خطية خليهة نايمة
- ماشي خالة مااكعدهة
بديت انظف بلشت من الطرمة وفتت للبيت مخليت شي
اجتي خالة وبدينة نسوي الغدة صارت الساعة ١٠ احنة كملنة كل شي
- خالة بعد تحتاجين صاعدة اذب على روحي مي
- لا روحي اذا احتاجيت اصيحج
ديلله هالنوب تحتاج هي وكعت صبغي من الستة لسة تكول عبالك جاي رئيس الوزراء
هو خلگ عمار المصلبخ
مدري شعاجبهة منة مها
دااصعد الدرج ونزلت مها
- ها حبي صباح الخير
واني اتثاوب صباح النور
- شكلج بعدج نعسانة
- غير ست سعاد من ساعة ٦ استلمتني دك شغ
- ياحبيبتي سودة علية ،، مو كتلهة اني اكعد وانظف شكو مستعجلة
- يلا حبي عادي اني فايتة انام شوية وكعديني
- روحي حبي روحي
نمتلي ساعتين وفزيت على حس الموبايل شفتة فهد ديگلي وصلنة
كمت سبحت وبدلت لبست گلبية فانيلة حمرة وبيجي وحطيت الشال على راسي ونزلت
لكيت العريس كاعد
سلمت علي ورحت للمطبخ
بقو العرسان كاعدين بالصالة يسولفون وسدو الباب
عمي جان بالجامع
وفهد ابغداد
وسعد هم
اهذو راحتهم
طلعت مها شكلهة مخربط والحمرة سايحة
صاحتني
- جوجو فدوة ودي فواكه شي لعمار على مااصعد اعدل مكياجي ابوية على جية
- صار حبي
رحت اخذت ماعون الفراكه وقواطي ببسي وماعون كيك ورحت فتت اقدملة
حطيتهم عالطبلة المقابيلة
- تسلمين تعبناج
- لا عيني تدلل
- اني عينج من اروحلهن فدوة
سكتت شلت السكين وحطيتهة على ماعون جان يلزم ايدي !!
- شسويتي بية ثولتيني بجمالج
ولج كمت اشوف مها انتي
وين لگاج هذا المبخت
فلتت ايدي من ايدة واشرت على وجهة والسكين بيدة
- احترم نفسك لا اگول لفهد على هذا كلامك
لك متستحي عندك درة وعيونك زايغة على عرض صديقك
دااكمل وفاتت مها
حطيت السكين على الطبلة وطلعت
لو انذبح قطرة دم متطلع مني
نشف دمي من القهر
عزة بعيني هسة شراح اسوي بقيت الوب اذا احجي محد حيصدگني
رحت لغرفتي من القهر غفيت محسيت على روحي لحد مااذن المغرب
لگيت تلفوني ٧ مكالمات من فهد
رجعت خابرتة فصلة
فتت غسلت وجهي وتوضيت دااصلي ودك كملت صلاة المغرب ملحكت اشيلة رجعت دكيت
جاوب بصوت رادت تطگ اذاني
- هاي وينج متي صار ساعتين ادك عليج وانتي ماكو
شنو نامت عليج طابوكة
شنو معناتهة رايحة تنامين وعايفة المرة الچبيرة وحدهة وعدنة خطار
شنو غاب القط العب يافار كاضيتهة نوم للظهاري وتتمخطرين
يلا كومي تحركي نزلي عاونيهم
وها البسي لبس مستور مو لابستلي فانيلا وتلزك على جسمج
وسد التلفون
يعني نص كلمة مخلاني احجي
بلله هاي وكفتي وياهم من الستة الصبح
محد ذكرهة
بس ينقلولة الشغلات العوجة
تعوذت من ابليس ونزلت
مفتحت حلگي لگيت مواعين الغدة مكومات عالسنگ
والعرسان بعدهم بالصالة كاعدين
شكلت ايدية ووغسلتهم كلهم ونظفت الطباخ وحطيت قوري الچاي ورحت طلعت جبن وطماطة وزيتون وخبزة سمرة لعمي يحب يتعشى من وكت
ورجعت مسحت المطبخ وعطرتة ورحت على خالة
- ها خالة شأسوي عشة
تحجي معلك ومن ورة خشمهة
- عندج لحم مثروم سوي چلفراي وشوية كباب وفنگر وطلعي بورك من المجمدة وگلي شكم كباية
رحت سويت هذا كلة اجتي مها ودااقطع بالخيار
- ها حبي جهز العشة
- اي مهاوي هياتهة صينيتكم اخذيهة
اخذتهة وراحت
مرت اليومين عادية ماكو شي ينذكر ذبيت نفسي عالشغل مبقيت شي بالبيت منظفتة وعزلتة
صار البيت يلهث نظافة
بيوم الي ديجي فهد سشورت شعري ولبست فستان قصير وحطيت مكياج
فاحت التفلزيون وكمت اگلب
طلعت اغاني واني طبعا ضعيفة كدام الاغاني عليت الصوت و كمت اركص
واحرك جسمي منا ومنا والفستان بينصل وضيف وانحنائات جسمي كلهة مبينة
مستمرة اركص وانداريت والگة فهد حاط ظهرة عالباب ومچتف ايدي وصافن
- فهدددددد !!!!! شوكت اجيت

يُتبع...