جوري

البارت الخامس عشر

 
الجزء الخامس عشر
shahadoflove
-

- ولج امنين متعلمة هالحركات هاي بت خليل
ولله انت بنات بغداد اتذبن فلك
- ههههههههه الحمد لله عالسلامة حبيبي
- الله يسلمج
رحت بستة وحضنتة مو يومين غابهن چنهم شهرين
- مشتاقتلي
- موت
- يلا حبيبتي حضريلي الحمام وسويلي لگمة اكلهة جوعان
بس جيبيهم هنا اكل مابية انزل جوة
- ماشي
نزلت حميتلة العشة وچنت مسوية حلو حطيتة بماعون وصعدت جريت الميز الصغير مقابيل الشازلونة وحطيت الاكل طلع فهد من الحمام وكعد ياكل
- كملت شغلتك لبغداد
- اي حبيبتي كملت
- بعد ميحتاج تروح مو
- لا ميحتاج
كمل العشة ونزلت المواعين وغسلتهم وشفت خيال بالحديقة
طلعت سمعت صوت مها تحجي بالموبايل
داافوت وجذبتني كلماتهة
لا ارادياً بقيت اسمع
- شنو ناوي تشغلهة لجوري انطيتك الcv مالتهة كلة
كل ساعة تسئلني شي عليهة ،، اكو شي عمار
مو صارت بلا ملح الاسئلة
لالا مو هيج حبيبي ولله مو قصدي بس ...
عمار بس اسمعني
الو الو
اني بسرعة فتت جوة قبل لتشوفني
لك هذا شگد سافل شلون جرئة يسئلهة علية
صعدت فوگ وشفت استاذ فهد عالگة ناصب النرگيلة وعالك اغاني
- هاي وينج
- ها مو نزلت المواعين وغسلتهم
- ادري ساعة دتعالي يلا
- شنو شمحتاج
- رجعي عيدي الفديو كليب مال مساع
- لا فوفو استحي
- فوفو  شنو ولج العب وياج دعبل انا
اسمي فهد
فوفو هذا عدكم ابغداد ،، هنا اذا جماعتي سمعوج تصيحين فوفو بعد محد يسلم علية
- ههههههههههههه عزة متت ضحك
- يلا جوري بشرفج كومي ركصيلي شوية
كمت كلت بگلبي انت الجنيت على روحك
شديت الوصلة على وركي وبديت اركص خبلتة خبال راد ياكلني بعيونة واني المستحة كلة طار مني هههههه كمت اتعمد اسويلة حركات اغرائية
واخبلة اكثر
متحمل بعد گام وجرني
- الله عليك فهد اركص وياية
ظل حاضني وگوة يحجي يهمس همس
- ولله مااعرف
غيرت الاغنية وخليت هادئة
كتلة بس احضني وحرك نفسك
رگصنة ثنينة هو حاضن خصري واني حاضنة رگبتة
وحاطة راسي على صدرة
فهد گلبة يدگ سريع ونفسة صوتة عالي
وشوية شوية گام يدفعني عالسرير لحد ما سيطر علية كلياً
رغم حركاتة عنيفة بس ايدة بيهم حنية
وهمساتة تخليني احس اني ملكة
وصوتة يحملني لعالم ثاني
فهد على گد مجنت كارهتة حبيتة
مرات يگلك مامن محبة الى من بعد عداوة
وفعلا هذا چان احساسي بي
ملكني وخلاني اعشق كل تفاصيلة
مرت ايام والوضع طبيعي وماكو شي يذكر
فد يوم گاعدين بالهول نتفرج مسلسل
چانت هستوهة طالعة مسلسلة تركية اسمهة ( ايزيل )
وكلنة نتجمع بالليل نتفرجهة حتى عمي ويانة
فهد لو طالع وية جماعتة لو مرات يجي يكعد ويانة
وچانت صدفة سعد چان نازل يمنة كم يوم
فوحدة من بطلات المسلسل جابت تحليل منزلي واكتشفت انو هي حامل
اني كلت يا خطية طلعت حامل
خالتي من يمهة
- يمة يالتركيات من البوسة يحبلن واحنة راح يصيرلهن سنة وكل شي ماكو
اني حسيت الحجي موجه الية متت احمريت واخضريت باوعت لفهد لكيتة يباوعلي
سعد ممنتبه ظل يضحك گلهة يمة شنو السالفة خوماكو شي
- لايمة بس اني وابوك كبرنة ونريد نشوف بزرتكم وشو السالفة صارت سكتة
اني سويت نفسي داالم استكاين الچاي وانهزمت للمطبخ
ومناك صعدت للغرفة
شوية وانفتحت الباب
- ليش صعدتي
- ها لا نعست اريد انام
- شو بلله دتبجين
- لا ولله بس فركت عيني و،،،
- شنو جوري شايفتني قشمر ،، اذا على الحجي مال امي معليج بيهة اني وانتي بس نعرف شوكت تم زواجنة
وهي معذورة عبالهة هاي الاشهر المرت كلهة احنة بيهة چانت بيناتنة علاقة كاملة
حبيبتي احنة ثنينه الحمد لله صحتنة زينة ومابينة شي والاطفال رزق وكل شخص الله كاتبلة شوكت يستلم رزقة
الي اريدة منج تسمعين ومتزعلين من امي مرة چبيرة مهما يكون واذا تقدريني قدريهة
- صار على راسي
- سالم راسج حبيبتي
- يلا اني هم نعست ووراية دوام خلي ننام
يوم الثاني جان فهد بالدوام نزلت الصبح بدون حجاب فتت گبل للهول وصار بوجهي عمار
- صباح الگيمر والعيون العسل
بسرعة خليت ايدي على راسي وطلعت وجان تصير بوجهي مها
- شنو هيج فتي للهول
- ولله مجنت ادري بعمار تفاجئت وبسرعة اطلعت
محجت شي عافتني وفاتت
رحت لبست حجابي ورحت للمطبخ اجة سعد وصبيتلنة ريوك وگعدنة نتريك اني ويا
خالتي جانت بالسوك
سعد شخصيتة تختلف عن فهد شخص هادئ ومحد يگدر يعصبة بارد كلش وودمة خفيف ويتشاقة
بقة يحجيلي عن الجامعة والدوام وكل ساعة يحجيلي شغلة ونضحك بصوت عالي محاسين على روحنة
شوية ودخلت مها
- سعد يعني الولد جاي من الصبح ديشوفك وانت كاعد تتمضحك هنا
- جاي علمودي لو علمودج  يلا هسة اغسل واجي
اندارت علية
- جوري عفية شوية نصي صوتج ترى كلش عالية ضحكتج عيب مهما يكون الولد غريب هسة شيگول علينة!
فتحت عيوني ثنينهم متفاجئة هاي صدك تحجي
بعدني محجيت عافتني وراحت
اجتي خالتي وبدينة نسوي غدة طبعا كالعادة من يجي عمار تهلكني مو تكول نفر واحد نطبخ مال عشيرة
اجة فهد وصبينة الغدة وكعدنة كلنة بالهول ناكل
كل ماارفع راسي الگة عمار يباع علية طكت روحي كلت هسة ينتبهون
حطيت ايدي على ايد فهد
- حبيبي قربلي الطرشي
فهد باوعلي بمعنى ضاج لان كتلة حبيبي كدامهم
غلست واخذت الطرشي منة
متحملت شوية وكمت للمطبخ
- شنو مسوية رجيم شو مااكلتي ،، ليش هيج فهد مداريهة بالاكل مرتك
عزة هذا صدك ميستحي
- لا ولله بس تريگت متأخر تسلم خوية
عفتهم وانهزمت ظليت انظف بالمطبخ وحطيت الچاي عالنار وانتظرتهم لحمد مكملو غدة وجابولي المواعين ووكعت براسي ظليت اغسلهم ومسحت المطبخ
- جوري جيبي الچاي
هسة شصار اخذو انت اووووف اليوم ماكو مهرب
شلت الصينية وددافوت للهول واسمع واحد وراية يگلي
- بالقران راح اقرب زواجي من وراج ،، خطيتهة برگبتج من اول مشفتج واني مطايقهة بس راح اتزوجهة حتى اكون قريب منج.
وتعداني وفات للهول
الصينية رجفت بيدي ورادت توكع بقيت مدري شگد واكفة لحد مسمعت صوت سعد
- جوري شبيج واكفة هنا ،، يمعودة شبيج صافنة شفتي شبح !!
- ها !! هاك سعد اخذ الصينية من ايدي مدري شبية دخت حصعد فوك
صعدت وبقيت ارجف مثل السعفة ياربي شسوي حرت
انت الوحيد العالم بحالي هذا اذا اسكت يجرني للتهلكة
واذا احجي راح تصير مصيبة
ومنو گال يصدگوني
احسن شي احجي لسعد بأقرب فرصة هو حباب وعاقل اكيد راح يحلهة
الايام الي اجت جنت ابد ممرتاحة ساعة تفكيري بمصيبة عمار
ومن جهة ضغط عمتي عالطفل
التفكير كتلني وبديت اتغير واضعف حتى جوة عيني صار اسود
مها ملتهية بخطيبهة وساعات اسمعهة تتمالخ ويا وتبچي
ودي اطب عليهة واگولهة عوفي وارجع اكول مااتدخل
البنية من يوم الي انخطبت تغير تعاملهة وياية وصارت تحجي رسميات
فد يوم جنت كاعدة بالحديقة اندگت الباب رحت افتحهة شفتة عمار
اووو لاهلة
- اوووف اكيد امي داعيتلي وانتي فتحتيلي الباب
- لا اني الامي داعية علية بحيث عرفتك بحياتي
- اه هيج صارت
انداريت دااروح وجان يلزم ايدي
انداريت عليّ اريد اكلة بسنوني عالحقير
جان اسمع مها تكول
- هاي شكو !!!
هد ايدي وگللهة
- مدريد شبيهة اندارت ورادت توكع ولزمتهة
جوري بعدج دايخة !!
نوديج مستشفى بطريقنة
مها باعت علية بتك عين ومبينة مصدگت الموضوع
محجيت شي فتت للمطبخ رئساً
غسلت وجهي بمي بارد بس اريد اطفي ناري
عالمنعول الوالدين منين طلعلي ياربي بعد ميصير اسكت لازم الگالي حل
انداريت وشفت مها فتحت الباب واجتي علية
- جوري اسمعيني '' انتبهي على تصرفاتج ترى وصلت حدهة وياية ساكتتلج لخاطر فهد حركات التموع والدوخة مو علية
شجاج مدگولليلي چنت اشوفچ فقيرة ،، بس على گولة عمار الي تحسبة موسى يطلع فرعون

يُتبع...