جوري

البارت الحادي عشر

الجزء الحادي عشر

مرت الايام وفهد متقربلي بعد ورجع لعزلتة
واني بصراحة مالي خلگ اناقشة واحجي بعد
مها بدت تبذل كدامي وقليل تحجي وقليل تاكل ومااعرف شبيهة
ولاهي تقبل تحجي
مليت واني اسئلهة
فد يوم اني متمددة الظهر بغرفتي معجبني اتغدة وياهم
صعد فهد تمدد بصفي ودار وجهة من الجهة الثاني
- فهد
- نعم !
- اريد اروح لاهلي واذا انت متكدر توديني
سالم يجي علية
- مو هسة غير وقت
- فهد
- اريد انام سدي الموضوع
دزيت رسالة لزهراء
زهورة مشتاقتلكم وفهد مديكدر يجيبني خطية خلي سالم يجي علية فدوة
رجعلي الجواب
- يكول سالم الخميس اني يمهة خلي تتحضر
رتبت جنطتي وضميتهة بالكنتور بدون ميحس
اجة يوم الخميس وعيني عالباب
اجة فهد من الدوام بيدة علاگة
سلم وصعد اني چنت دااغسل مواعين عالسنگ وهو طبتة دائما من المطبخ
مصعدت ورا عفتة تأخر فوگ صاحتلة امة
بدل ونزل كعدنة نتغدة سالفة منا وسالفة منا هو مو ويانة صافن ومن ارفع راسي الگا يباع علية
- جوري الچاي جيبي الي فوك
- اوكي
صعدت افتح الباب مقفول دگيت انفتح الباب وشفت منظر گدامي خلاني افتح حلگي
الغرفة متروسة نفاخات وشرايط وبالنص ميز صغير علي كيكة وهدية
- كل عام وانتي بخير جوجو تقدم وباس خدي
من الفرحة انلصم حلگي ومعرفت شنو ارد
- وانت بخير شكرا ،، متوقعت !!!
- شنو متوقعتي !! اتذكر ميلادج
- يعني كل هالاجواء ممتوقعتهة
تقدم مني ولزم ايدي وقربني عالميز
- يلا تعالي طفي الشموع
تقربت وتمنيت امنية بگلبي وطفيت الشموع
- جوري اريد اكلج .....
اندك الباب
- فهودي اجة سالم اخو جوري
تغيرت ملامح فهد كلهة وطلع ورگع الباب
غسلت وجهي ونزلت ورا
دخلت للاستقبال
ركضت بحضن اخوية بوستة وبست راسة وهو هم حسيت بمعنى كلمة اخ وشلون هو سندي بهالدنيا
- شلون وردتي شخبارج
- زينة حبيبي انت شلونكم مشتاقتلك افيش ياريحتك ريحة امي وابوية
ظل يسولف وية عمي وفهد مشتعل نار ويباوعلي تك عين
- ها جوري لامة غراضج ورانة طريق
باوعلي فهد بسرعة
- ليش وين رايحة جوري
- ليش انت ماعندك علم فهد
اني جاي اخذ جوري لبغداد حسب ماافتهمت انت ماعندك مجال تجيبهة اجيت اني اخذهة
باوعلي فهد بنظرة بدة يشرب من دمي
- اني كتلهة تصبرلي اسبوع الجاي
اندار سالم علية
- جوري اني لو ادري بيج مگايلة لرجلج فلا اگطه هالمسافة كلهة واجي
اني افتهمت الموضوع غلط وعبالي عندك علم ياخوية وهالعموم مرتك يمك واني راجع لبغداد
- لا ولله ولا تطلع اليوم تبات يمنة وباجر من الصبح تاخذ جوري وتروح
ماتسوى ياخوي اخليك تكطع هالدرب وترجع فارغ
صبينة غدة لسالم وطلع سالم وفهد وسعد بسيارة فهد
اني صعدت لملمت الغرفة واندكت الباب
- تفضل
- عندج شي جوري
- لا حبي تفضلي
كعدت ودمعتهة بعينهة
- جوري بعد مااتحمل لازم احجي
- خير شبيج وكعتي گلبي
- اني قبل سنتين صارت مناسبه وانعجبت بواحد من صدقان فهد صار اعجاب متبادل وگام يجيني للجامعة حبيتة وحبني حيل وهاي صار سنتين يقنعني يجي يخطبني من فهد واني مااقبل
اخاف لا فهد يحس بيناتنة علاقة وننكشف
وهسة الولد مل مني وعافني
تصدكين يا جوري يگلي انتي الظاهر تريدين تلعبين واني انسان اريد اكمل نص ديني وبعد مااكدر انتظرج اكثر من هيج
انهارت مها يمي واني حايرة شسويلهة
وشصبرهة اني متأكدة هي مكبرة الموضوع ولو يجي يتقدم مابيهة اي اشكال بس مااعرف هي ليش معقدة الامور
غسلت وجهة بحمامي وراحت لغرفتهة
جريت جنطتي وحطيتهة بالباب وفات فهد باوع عالجنطة وعلية
- شوفي جوري روحي وية اخوج بس لاعبالج لويتي ذراعي
لا والخلقج من ترجعين لا اتصرف وياج تصرف ثاني
- فهد بس اسمعني
فات للحمام وسد الباب
نمت بفراشي وظليت انتظرة يطلع لبس وطلع
سكتت وظليت لحد مغفيت دكت الساعة يم راسي نزلت بسرعة لكيتهم يتريكون وفهد ماكو
بدلت واخذت جنطتي ودنطلع وصار بوجهي فهد
- تعالي جوري
رحت ورا
- هاج هاي فلوس واجازتج اسبوع ترى مو اكثر
- ماشي
طلعت من البيت واني احس گلبي ممرتاح لان عفتة وطلعت
شلع گلبي الطريق طويل وميخلص نزلنة بالمطعم اكلنة لگمة وغسلت ورجعت للسيارة
وصلت لبيت اهلي وبوستهم كلهم واشم بيهم كأنما صار سنة مشايفتهم
صعدت لغرفتي واباوع على كل ركن بيهة اويلي ياريتني ارجع اعيش هنا اويلي الله هنا راحتي حطيت راسي على مخدتي
شكد جنت انام هنا وراسي مرتاح وماعندي هم
اكبر همومي جان بيوم الامتحان
وهسة كبرت الف سنة بهالشهرين هذني
بدلت ملابسي وقبل لا انزل دزيت مسج لفهد
- احنة وصلنة
بقيت انتظر جواب مجاوب ابد
ايست ونزلت
كعدنة عالغدة واكل امي المينشبع منة وسوالف اخواني سالم وسلام ومرة اخوية
خلصنة غدة وچاي واخواني راحو ينامون
سحبتني زهراء وصعدنة لغرفتي
- ولج احجيلي كل شي من طقطق لسلام عليكو
- شحجيلج يازهراء صخمت الشرايع
اجة سالم وگال گدامهم يلا محضرة نفسج وخلة فهد يشب وينطفي اعتبرهة لوي ذراع وصار عصبي ومقبل حتى ابررله
- لا بلله اني كم مرة فهمتة بس الظاهر بالة مووياية جان
- طبعا شلون حظ ،،جان محضرلي مفاجأة من دخلت للغرفة جايبلي كيكة وزينة مال عيد ميلادي حتى الهدية مشفتهة تصدكين هسة دنطفي الشموع واجة سالم وانگلبت كل الامور
- اووووي اوي باع الرومانسية عيني
ولج اني منج اكمز ابوس احضن ،، امداج مابيج خير
- بطرانة هو ينحزر يمعودة مثل الجو ساعة مغيم وميتحاجة وساعة طالعة الشمس وضايعة السالفة
- ميخالف جوجو المرة الشاطرة تعرف شلون تكسب الرجال بلبسة حلوة وبعطر طيب ودلعات وهالسوالف
- صعب فهد صعب يازهراء موتني
تصدكين دزيتلة مسج كتلة وصلنة
مجاوب اي شي
- حبيبتي اول موصلتو خابر على سالم وسئلة عليج
وانتي ثولة اكو وحدة تكتب لزوجهة وصلت
لو بيج خير جان كتبتي
حبيبي الحمد لله هسة وصلنة من هسة بديت اشتاقلك
بس انتي مابيج خير ادري بيج ماخذتج الكرامة
بين المرة والرجال ماكو كرامة
خليهة ابالج والمرة دائما هي التننازل وتضحي لخاطر تمشي سفينة الحياة
- لا بلله وليش دائما المرة الي تضحي
- لان الرجال يشوفهة صعبة يعني ممكن يبادر مرة او مرتين واذا مشاف تجاوب يقفل
- اي هذا فهد
- خلص عندج هالاسبوع فرصة حتى كل واحد يراجع نفسة ويشوف يكدر على فراك الثاني
دك تلفون زهراء
- يمة من وراج نسيت رجلي دك علية ميكدر ينام يمة فديتة يلا ولي من يمي
طبعا علاقة سالم وزهراء تجنن
ولا مرة شفناهم متزاعلين حتى لو اكو زعل خارج الغرفة يسولفون ولاگأنو اكو شي
لزمت تلفوني كتبت
- فهد عيوني انت شكرا على احلى مفاجئة سويتلياهة البارحة ،، راح اشتاقلك هواية
ابدال مااضغط على ارسال ضغطت على مسح ومسحتهة
ونزلت لامي نمت بحضنهة وظلت تلعب بشعري
- يوم شلونج هناك مرتاحة
- الحمد لله
- ماكو شي بالطريق
- لا ماما بعد
- الله كريم
بقيت انتظرة يخابر يتصل
كل شي ماكو
---------
فهد
من طلعت الصبح واني احس نفسي طالعة روحي
مكدرت اصعد للغرفة گضيت نهاري جوة
يعني ماانكر انو اني چنت اماطل بروحتهة لاهلهة مااعرف ليش يمكن لان مااكدر على بعدهة
او يمكن اخاف تطلع وتفتر مولات ومدري شنو
ويشوفون طولهة وجسمهة
كل ساع يجي ابالي شي واظل احرگ بنفسي
باكيت الجكاير حركتة حرك واني محاس على نفسي
- فهد الولد عازمينة عالعشا يلا بدل
- مااروح
- لا بشرفك كلهم ملمونين مروان وضياء وولد خالي حسن هم جايين لتسويلك سالفة
- لتخليني هسة اسبهم كلهم كتلك مااروح يعني مااروح
- شجاك يخوية شو اعصاب ،، من الصبح وانت نار شكو شبيك
- اووووف هسة واحد معاجبة يروح كوة
- براحتك لتروح
عفتة وصعدت للغرفة
باوعت شفت الدشاشة الي چانت لابستهة البارحة شلتهة قربتهة على خشمي شميت ريحتهة وغمضت عيني
فتحت عيني شفت الهدية محطوطة على المير وممفتوحة
- يعني هيج روحة اهلج مهمة
حتى الهدية مفتحتهة ولا شافتهة شنو
لهالدرجة اني حارمهة وظالمهة
اوووف راسي راح يطك خلي ابدل واروح وية الولد التهي
بدلت وطلعت شفت سعد مثگل وجهة
- تعال لك يلا انت سوق مالي خلك اني
ركبنة السيارة واني عيني عالطريق وانفخ بدخان الجگارة
- ياخوي ليش هيج متعب نفسك
ومئذي روحك ،، اذا تحبهة صارحهة بحبك وداريهة المرة مثل الشمعة كل مداريهة ضوتلك حياتك
- هاي شنو صاير شاعر
- لا ولله مو شغلة شعر بس دااشوف بعيني شكد متعذب ونفس الوكت مشايف نظراتهة من تحجي وياهة انت احسهة تريد تطير من الفرح
- غلطان ،، البنية مغصوبة عالكعدة ويانة
- اتحداك والدليل لهفتهة عليك من تجي من الدوام
اسمع صوتهة بس من تجي انت وباقي اليوم ساكتة وصافنة
جرب وياهة باللين وشوفهة شلون تجيك تركض
وداعتك هذا الاسبوع فرصة تبتعدون عن بعض حتى تفكرون زين
- الله كريم
لزمت تلفوني ودزيتلهة
-البيت اظلم بلياج
شوية واجاني الرد
- منور بوجودك ،، اشتاقلي زين
- ولله واثقة من نفسج
- مو دااشوف روحي من هسة بديت اشتاق
لزمت التلفون وقريت المسج الف مرة قليل
يعني معقولة مشتاقتلي !!
اوووف شحيصبرني اسبوع
لا يجوز يومين واروح اجيبهة ،،،،،

يتبع