#انحراف_ام
الثامن
ام مصطفى
بديت اكبر وافتهم وبديت اعرف الناس شنو
واعرف الصح من الخطأ
والزين من الشين
جنت اتمنى بيوم يجي ابوي ويطلع عدل وياخذني لو حتى عمامي ياخذوني
يجي اي واحد ياخذني من يوم الي شفت
سوالف امي بمبايلها كرهتها
وكرهت عيشتي وياها كمت اشوفها شي مقزز وتلعب نفسي منها
وفوكاها امي تعاملني بقسوه كلش
عبالك مو بتها
خفت لا تاخذني مثل ساره وتجبرني ع اشياء اسويها
فبقيت ليل نهار ادعي يجون عمامي ياخذوني ويخلصوني
امي لاحضت علي مااكعد هواي يمهن
كالت ولج فطيم شعندج كلما تشوفينه
تختلين بالغرفه شايفه بعبع شنو
ها لا ماما بس ادرس عندي قرايه
كلما اخلص شغلي اروح اقره عندي كومه امتحانات
ها
اي ماما تعرفين اني صرت ثالث بكالوريا ولازم ادرس زين
اي زين لعد عبالي عندج شي
زينب صديقتي هم لاحظت علي دائما سارحه وافكر
كالت شبيج فاطمه اشو متغيره هواي شجاج
كتلها ظروف عندي بالبيت
اها الله يفرج همكم حبيبتي بس انت لازم تركزين امتحانات عدنه
اي لا تخافين دراسه زين لان امي دكلي بس اسقطين ابطلج
يااا ليش عود
تريدني اكعد بالبيت اخدمهم
يااا شعجب
هيج شسويلها
نحجي ونمشي بالطريق راجعين للبيت
زينب جابت الطريق كله تحجي ع ابن عمها
دكلي لو شوفيها يخبل عيونه زرك واشكر
لج يموت وأني كلما اشوفه ابقى صافنه بوجهه
بس المشكله هو ابد مدايرلي بال وأني راح اموت عليه
اتمنى يخطبني
كتلها ان شاء اللة حبيبتي يصير من نصيبج
يله اني وصلت للبيت مع السلامة
دخلت للبيت
لكيت عدنا رياجيل كاعده بالبيت
وامي ومحمد اخوي كاعد يمهم
كلت سلام عليكم وفتت
واحد كال هاي فاطمه مو
امي جاوبته بلي هي
كام من مكانه واجه بسرعه علي حضني
وباسني
جعت ليوره من عنده متفاجئه ومستغربه
منو هذا بقيت عين ع امي وعين عليه
كال حبيبتي فطومه لا تخافين
اني عمج حيدر واجيت اشوفكم
تفاجئت شنو
امي كالت فاطمه هذا عمج حيدر وهذول
عمامج الكاعدين سلمي عليهم
جايين يشوفوكم
كتلها هسه اذكروا عدهم جهال اخو
صار سنين عايفينه ولا يسئلون علينا
ع كولتج محد ذكرنا بيهم ماصدكدوا ابوي انخطف وطردوج
عمو حيدر اندار ع امي وخزرها بعيونه
امي كالت بله حجي زايد ولج سلمي ع عمامج وولي لغرفتج
رحت سلمت عليهم
وعمو حيدر شلون حضني بحنان
اول مره احس بحنيه وحضن دافي
كال تعاي اكعدي يمي حبيبتي
جنت اموت عليج انت اكثر وحده
انومج بحضني
هيج بسرعه كبرتي
استحيت منه عفتهم ورحت جوه
بقوا شويه وراحوا
وراها سئلت امي شعجب اجو
كالت جايين عليكم ياخذوكم
ومحمد وساره كللولهم ماكو داعي
مرتاحين احنه يم امي
وراحوا بعد
بقيت بس افكر بيهم وشلون مرتبين ومحترمين ومثقفين مبين عليهم
ليش مااروح اعيش عدهم كون امي تخلينه
نعيش وياهم احسن ماجنه مكطوعين من شجره
زين خلي اروح الهم واتعرف عليهم
واذا عجبتني عيشتهم ابقى عدهم
وما ارجع هنا ابد
بقيت اسبوع كامل افكر بيهم ليل نهار
وخايفه اطلب من امي اروح الهم
وترفض وتعاقبني
زين ليش ترفض شو مبين عليهم حبابين وخوش ناس
زين خلي اجرب اسئلها بلكت تقبل اروح الهم
واتعرف عليهم
وع جدي وبيبيتي حسب مسمعت لهسه عايشين
وع عماتي وبنات عمي
الله اتمنى اتعرف عليهن نصير صديقات
بقيت الليل كله افكر شلون افاتح امي واكللها
الصبح قررت احاجيها
كتلها ماما اريد اروح لبيت جدي اشوفهم واتعرف عليهم
يتبع ...
