#انحراف_ام
١٥
الكاتبة ام مصطفى
باليل دزلي صورته خال ايده ع خده وشكله مال واحد منتظر
وكاتب الووووو
خابرته الوو
احلى الوو اسمعها
تدرين لو ما مخابره جان شسويت
شسوي
جان اجيت اتعشيت وياج ونمت يمكم
هههههه لعد همزين خابرت
لان ماتغديت الظهر
وتريدني ماتعشى وانام
ليش هيج زعلت المفروض ينفتح نفسج ع الاكل من اشوفيني
تعرفين جمال وكشخة والف وحده تتمنى اكل وياها
احممممممم طلعت مغرور وأني مااحب المغرورين وشايفين حالهم
يعني بداعتي مااستاهل انغر
لا متستاهل شكله تره عادي اكو هواي اخله منك
هاي شنو منو ذول الهواي يعني
خاف تعرفين احد ولج
واذا اعرف انت شنو دخلك
وحق القران غير امسحة من الوجود
وحرم عليج باب الحوش
ليش عيني ابوي اخوي عمي جدي
بصفتك شنو
بصفتي خطيبج وابن عمج
اكلك انت جذبت الجذبه وصدكتها
لا ما جذبت فاطمه اني احبج من اول يوم اجيتي لبيت جدي وشفتج بي
كلبي دك الج وكلت هاي الي ومتصير لغيري
بقيت ساكته
الو فاطمه احجي
ماحجيت شي بس نفسي صار عالي وكلبي احسه راح يطلع من مكانه
اول مره واحد يكلي احبج واتخلى بهيج موقف
كال فطومه احجي ادري بيج تسمعيني
تره كاعده اسمع انفاسج
سديته منه
وأني مشاعري متلخبطة مااعرف فرحانة وخايفة
شعور مااعرف اوصفه
دزلي رساله ليش سديتي فاطمه
كلامي ماعجبج
بي والله هذا احساسي من ناحيتج وما كذبت عليج بحرف اني حبيتج من اول يوم شفتج بي
صار ٣ سنوات وأني ضام بكلب وكاتم بس بعد مااكدر اكثر
كلت اعترفلج اخاف اتاخر اكثر وترحين من ايدي ..جاوبي ☹
مااعرفت شنو اجاوب بقيت محتارة ومتردده
ماانكر اني معجبة بي وهو حلو وشخصيته قويه وابن عمي
بس خايفة
كلت و ع شنو الخوف شو هو ابن عمي قابل غريب
اني محتاجة شخص يصير قريب مني ويحبني وخاف علي
خلي انطيه وانطي لنفسي فرصة
ماجاوبته بعد
بس الليل كله مانمت افكر بيه
واقنع نفسي ابن عمي احسن احبه مراح يخذلني وعمامي يحبوني وجدي موجود مراح يعوفني
واذا هو يحبني صدك ع شنو خايفه
اني اريد استقر اريد احس بأمان
واكيد راح يكون وي احمد
الصبح بدلت ولبست احلى لبس
مال مدرسة عندي كعدت فرحانة ونشيطة
والضحكه مرسومه على وجهي
لكيت بيبي كاعده قبلي
ومخليتهن يسولي ريوك
اتريكت وطلعت اتمشى للمدرسة
جان اسمع هورن سياره وراي
درت وجهي اشوف احمد لابس منظار
نزع النظارات وكال صباح الخير يا روحي
ابتسمت ابتسامة خجوله
صباح النور احمد
الله احلى صباح انرد علي
تعالي اصعدي اوصلج
لا ماكو داعي المدرسه قريبه وتعودت اروح مشي
دصعدي خرب هبل شطالعه اليوم تره اغار اني
خلي اوصلج لباب المدرسه مااريد احد يشوفج
هههههه يله راح اصعد
صعدت وياه بقى صافن بوجهي شنو هالجمال
احمد تره انزل شغل السياره عندي دوام
انعل ابو الدوام
خلي اخذج لمكان نسولف بي
لا عفيه احمد تعرف عماتي مدرسات
واليوم اول درس عمه غدير عندي
اي هم صدك بس شلون اريد احجي وياج
اي عادي من ارجع اخابرك
اي مثل البارحه وتسديه
لا هالمره مراح اسده
يعني شنو افهم منج انت هم تحبيني
مو حب بس اعجاب حاليا
يابه هم انعم الله
بس اوعدج راح اخليج تحبيني اكثر من ما اني احبج بس اسطبريلي
وصلت يله راح انزل
اليوم انتضرج بالبيت لا عفيه لا تجي جاي تحرجني اخاف بيبي تحس
شنو يعني خلي تحس
عادي اريد كل الناس تدري اني احبججججج
اخطبني والناس كولها تدري
لو بيدي جان اليوم خطبتج بس ابوي
ميقبل إله اتخرج من الكلية
والحمد لله مابقى شي هاي اخر سنه الي
وراها اخطبج
وبعدين انت هم اريدج تخلصين السادس
هاي السنه وراها اخطبج رسمي ونزوج
وتكعدين بالبيت مااريد احد يشوفج اريدج الي وحدي انام ع انفاسج واكعد ع صوتج
احمممم يله مع السلامة
تاخرت كلش ☺
فديت الخجوله اني انتظرج باليل
اي ان شاءاللة
دزلي بوسه بالهوه
يااااااي طرت فرح يمه فديته يخبل كله ع بعضه حلو شكله كلامه لبسه صوته
اه اه بسرعه كمت احبه
دخلت للصف وعمه غدير تشرح جان موضوع جديد بالرياضيات
وأني لازمه القلم واشخبط ع الكتاب وبالي يمه
خلصت شرح واجت كرصتني ولج طول الدرس سارحه
مدكليلي بيمن تفكرين
ها ماكو شي
لج اليوم مااعوفج إله تحجين
يتبع ...
