#انحراف_ام
#ام_مصطفى
البارت ١٧
مساء الخير
طلعت روحي والدنيا ضايكة بعيني
طبعا بهاي الفترة جدتي تمرضت كلش
ونسوان عمي كامت يشغلني
وذبن نص الشغل علي
بحجة بعد مدرسة وكعدت شنو نخدمها احنه
بدت تصير مشاكل بينه يوميه صياح ونياح
ع الشغل وتالي ارجع اشتغل غصبن علي واذا هنه رادن يسون شغلتهن
لازم غصبن علي الزم جهالهن
بسبب المشاكل الكل كرهني
ملوا من المشاكل الي تصير
وبدت سمية مرت عمو حيدر تنقل اخبار عني لعمو حيدر
وكرهته بيه جان دائما دكلة تخابر نهار كله
ودك سوالف وي ولد اشكال الوان
من غير الحجي الي اسمعه ع امي منهن
صار احمد ملاذي الوحيد
ردت بس ازوج واخلص منهن
بهاي الفتره جانت فخريه ام احمد مسافره بايران
من نشرت صورتة جنت اريد الكل يعرف هو خذلني وانو اكو شي بينه
وره مانشرتها بساعتين تقريبا خابرتني رقيه
اخت احمد
الو فاطمه
هلو رقيه شلون
شلوني اكلج فاطمه شكو ناشره صور احمد
شعندج وياه
انت شدكولين شعندي وياه
اكلج فاطمه انت تردين تبلين اخوي بيج
تعالي شوفي ابوي كلب الدنيا ع احمد شاف الصور الي ناشرتهن بالستوري مالت المازنجر
وع الفيس
وضل يحجي ممتوعد لاحمد
كله بسببج
شنو لزكه لازكه روحج باخوي
بقت تحجي وتغلط سديت المبايل بوجها
وره شوية خابرت ا م احمد
متصله سميه بيها وحتجيتلها
استلمتني رزايل وحجي ولو تبقين بس انت مااخذج لابني
روحي بنت هديه تره سوالفج نعرفها زين
مثل سوالف امج الي جانت تخابر بالسطوح
براس عقيل
شوفي اذا ما ابتعدتي من ابني
اشهرج انت وامج الس..
وسدت الخط
اختنكت ماكدرت احجي كلمه
حجيها جان كلش جارح بحيث احس كلبي كام ينزف
ماعندي وسيله غير الدموع والبجي
كله من امي هي السبب بكل الي صار
ليش خلتني اليسوه والمايسوه يعيرني بيها
ليش اني اختلف عن البنات
هم اريد احب وازوج حالي من حالهم
ليش ادفع ثمن اخطاء امي اني شنو دخلي بيها
اني اصلا مااريدها اني شردت من عارها ردت ابني حياتي بعيد عنها
اجيت لعمامي كلت ينشد الظهر بيهم
تالي بسبب نسوانهم والمشاكل هملوني وكرهوني
صرت مجرد خادمة عدهم وماطلع من شورهم لازم وجدي مرات يدافعلي
كاموا يكلوله من وره دلالك خربت
انت متعرف شي اسكت وعوفها علينه ...
بالليل خابر احمد جاوبت بلهفه رغم الي سواه وياه بس مااكدر اكرهه
احبه هواي
جاوبت
الو حمودي
لج بنت الك...
انت شنصخمه اليوم
احمد احترم نفسك لا تغلط
لج حقيره عود تلوين اذراعي انت
لج انت تعرفين شسويتي هسه
لج دمرتي مستقبلي
من ساعة السودة يوم العرفتج لزكة خوما لزكة
وج منو مصخم وجهج وكايلج خلي صوري ها
تعرفين شسويتي هسه
ابوي مصمم يخطبج الي وخابر جدي
وأني كارهج وكاره الساعه الشفتج بيها
بسيطة اني اعلمج
اني من سمعت هيج مااعرف افرح لان راح ازوج احمد واخلص من نسوان عمي
لو انقهر ع الحجي الي كاعد اسمعه منهم
ثاني يوم اجه عمو رضا
وفاتحني بالموضوع كال احمد اعترفلي جان عنده علاقه بيج
وغصبن عليه وع امه راح اخبطج اله حضري نفسج هاي الجمعه الخطبة
راح حجه وي بيبي جانت بس تسمع متكدر تحجي لان من انظربت جلطة ماكدرت تحجي ولا تكوم
كالها يمه راح اخطب فاطمه لاحمد
وحاجه جدو وحددو موعد للخطبة يوم الجمعه
فرحت بداخلي كلت اكيد راح يتغير من نزوج ويرجع يحبني
ميخالف هسه هو مقهور لان السفره طارت من عنده
هسه بس نزوج يبدي ينسى
وأني راح اسعده وماخلي يتندم بيوم انو ازوجني
انتظرتة يتصل بيه بس أبد مااتصل
قبل الخطبه بيوم اجت عمه غدير اخذتني حفتني واشترتلي فستان
كالت رضا اجاني انطاني فلوس وكال اخذيها
ثاني يوم من الصبح اخذوني للصالون مكيجت مكياج كلش حلو ومرتب
وتسريحه حلوه وبسيطة
فستاني جان لون بصلي فاتح جان نازك
اجه عمو حيدر اخذني من الصالون
باركلي وكال ربي يوفقج
اتمنى تصيرين سباعيه وتحافظين ع بيتج
كتله ان شاء اللة عمو
اجو بيت عمو رضا
فخريه تباوعلي بتوعد وتخزر بيه
سميه تتبسم بالجذب
وراها طب محمد مان علي كوه عقد
وراها لبسني الحلقه يجر بيدي جر
وماحجه ولا كلمه
عبالك فاتحه مو خطبه
يتبع ....
#ام_مصطفى
