ماما اريد اروح لبيت جدي اشوفهم واتعرف عليهم
اي عادي روحي شوفيهم
تعجبت من امي وافقت بسرعه وبهاي السهوله
كالت روحي الهم لازمتج شنو اني واي واحد يريد يروح الهم يروح عادي ماعندي مانع
كالت من يجي محمد خلي يوصلج
طرت من الفرح اي خلي اروح اتعرف ع عمامي اكثر وخلي يحجولي ع ابوي وع اطباعه
اجه محمد كلتله اخذني لبيت جدي اشوفهم
كال شعدج رايحه كتله اريد اشوف بيبي وجدو
وكلت لامي وهي وافقت
راح سئل امي صدك ماما
كالتله اي اخذها وخلصنا منها كاتله روحها عليهم خلي تروح وتفضنا
بدلت ملابسي بسرعه وتحضرت
واخذني محمد وصلني للباب
وراح
دخلت لكيت كاعد يركبون ثواب كل جدر شكبره بالحوش
شافني عمو حيدر اجه بسرعه
فاطمه شجابج شكو جايه شصار
كلتله ليش متريدني اجي
لا مو هذا قصدي بس اتفاجئت بيج شعجب اجيتي
اجيت اشوفكم واتعرف عليكم كل الهلا بيج حبيبتي
تعالي فوتي اعرفج ع بيبيتج وجدو
دخلت لكيت مره كاعده لازمه سبحه بيدهه ومدنكه تسبح
كال فوتي عمو فاطمه
هي رفعت راسها باوعت باستغراب
كالها يمه هاي فاطمه بنت عقيل جايه اتسلم عليج
نشغت بصوت يمه هله بيها هله بريحة عقيل
تعاي حبوبه شبكتني وكامت تنعه علي
وع ابوي بكلمات وتبوس بيه شجابج
شعجب امج خلتج الله لايوفقها حرمتنا من شوفتكم هاي السنين كلها
خوانج ليش مااجو وياج
كتلها ماقبلوا بس اني ردت اشوفكم
يمه فدوه رحتلج هله بيج بيبي
صاحوا جدو واجه وحضني
وخلى غترته ع عيونه وكام يبجي
ياعقيل يابوي وينك هاي بنيتك اجت للبيت
كوم تلكاها ٢
ع البجي والنواعي التم البيت كله نسوان عمي وعماتي وبنات عمي الموجدين بالبيت
كلها اجتني
وكل شويه واحد يحضني ويباوسني
طاروا فرح بيه
جدو وبيبي كلش فرحوا بيه ومجلبين بيه
مترحين بعد كتلهم مااكدر امي متقبل
اخاف ابقى وبعد تمنعني من شوفتكم اني مصدكت قبلت اجيكم
بيبي كالت الله لا يفقها كون هديه ماصدكت عقيل ينخطف اخذتكم واخذت فلوسه وانهزمت
وشكد اجيت عليكم اشوفكم طردتني
دكلي مانطي جهالي لو طكون راسكم بالحايط
مدامني ممزوجه مالكم حق تاخذوهم مني
الشرع والقانون وياي
وتالي شالت وماندليناكم وين
واهل امج ماينطون نشده
لحد ما عمامج عرفوا مكانكم
واجوا عليكم
تالي انتم مارضيتوا تجون وياهم
كلنا بعد بكيفكم اهم شي مرتاحين
بيبي اني حبيتكم اتمنى ابقى وياكم بس خاف امي متقبل
وعندي دوام
كالت انت بيا صف
كتلها بيبي اني صف ثالث متوسط
ها جا خوش خلصي هاي السنه وتعاي عدنه
انقلج وي عماتج مدرسات بالاعداديه مالت البنات
صدك بيبي عماتي مدرسات
اي بيبي
هاي سحر مدرسة عربي
باوعت عليها وابتسمت وهي هم ابتسمت
كالت تعاي يمي والله اسويج اولى ع المدرسه
بيبي كالت وعمتج غدير مدرسة رياضيات
اثنينهن يداومن بنفس الاعداديه
زين بيبي احاول وي امي واشوف
هسه اني لازم اروح ارجع للبيت
خاف امي تبقى تحجي علي
وباجر عندي دوام
اي بيبي روحي اهم شي دوامج ودراستج
اختج خلصت كليه لا
لا بيبي هاي اخر سنه الها
اي زين عبالي بطلتها امج اعرفها عجوزيه
كلت بطلتجن وخلتجن تخدمنها
دنكت راسي بيبي تعرف امي طلعت كلش زين
زين شعجب ماعرفت هاي سوالفها
لو امي من تالي انحرفت ويجوز صدك حتى تعيشنه هيج تسوي ...
عمو حيدر كال اني اوصلج للبيت كتله يله
قبل لا اطلع جدو اطاني فلوس هوايه شده كله خمسه عشرينات كال هاي الج جدو
تشكرت منه واخذتهم لأن كال اذا ماتخذيهم
ازعل عليج
اخذني عمو صعدني بسيارته وبقى يسئل بيه
امج وين تشتغل وعم احد يطب عليكم للبيت خوما تاخذجن مكان
حسيت بي يعرف بسوالف امي
كتله عمو صير صريح وياي واحجيلي الصدك ليش تسئل هاي الاسئله امي شايف عليها شي انت
تعرف شي
زين انت ليش طردت امي هي دائما دكول عمكم حيدر طردني
وتحجي عليك وتغلط
حتى تخيلتك واحد ضالم وماعدنك رحمه
بس شو طلعت العكس
كتل شوفي حبيبتي انت صرتي جبيره وأني لازم احجيلج والصدك وانت احكمي طبعا محد يعرف بهاي السالفه غيرج
خلي اكولج ليش طردت امج
فطومه امج جانت تخون ابوج بفراشه وي صديقه
مره مرتين حذرتها وفتت الها مفاد
تالي شفتها بعيني هي وياه بفراش ابوج
انتي جنتي طفله تبجين يمها وهي ممهتمتلج ملتهبه تشبع غريزتها دخلت عليها
واخذتج بليلتها بحضني وللصبح افكر شراح اسوي فكرت افضحها
واروح لهلها بس انت بحضني باوعتلج
كلت لا خاف اثر ع سمعتكم من تكبرون
قررت اسكت واطردها لهلها واخذكم عدنا
والصبح طردتها بس هي استغلت سكوتي وخوفي عليكم وعلينا من الفضيحه
وصممت تاخذكم وياها
وابوي رجال يخاف الله ماقبل نحرم ام من ضناها
ولا قبل نحرمكم من امكم كال حرام عليكم
الدنيا اخذت ابوهم
وانت تريد تاخذهم من امهم لا بويه ميصير هيج الله مايرضاها
تالي اخذتكم هي وحرمتنا منكم
وعرفت شلون تستغل الموقف
وطردت امي كذا مره
واخذت راتب ابوكم الها وافلوس ابوكم
خاف عبالها مندري ابوكم جان مجمع فلوس
بس شكد منعرف
هو يحجي وأني ابجي اختنكت كمت اشهك واطلع صوت
كال ليش تبجين حبيبتي
كتله عمو امي لسه ع سوالفها وماتايبه
وحجيتله كلشي
صار عصبي وضل يلوم بروحه كله مني
لو فاضحه من البدايه
كال بعد ماالكم كعده وياها
تعالي عيشي ويانه
كتله مااكدر اعوف اخواني جيبوا اخواني واجي اعيش وياكم
كال اي ناخذهم
بس انت اسئليهم يقبلون
وكولي لامج اريد اعيش وي عمامي
وهذا رقم تليفوني خابريني واجي اخذج
كتله ان شاء اللة
وصلني للباب وراح
نزلت وأني روحي طافره اولا لان عرفت حقيقة امي وجانت تخون ابوي وثانين
لان عفت بيت جدي اتمنيت ابقى عدهم
عائلتهم كلش حلوه وبسيطه
وينحبون بسرعه
دكيت الباب طلعت ساره امي لسه مجايه جانت من الصيدليه
ضليت احجيلها ع عمامي وع بيبي وجدو
وكتلها سئلوا عليج
يردونه نعيش وياهم
كالت اتمنى بس بعد فات الاون بعد مااكدر اروح الهم
عيشتي وي امي بعد مااكدر اعوفها
خصوصا دكولين بيت جدي ناس ملتزمين
اجتي امي شافتني
ها اجيتي
كتلها اي ماما
بله شحصلتي بروحتج
اتعرفت ع عمامي غير من 👐🏼 امداج وامداهم خوش
عابت الهم لا اذكريني بيهم
ليش ماما تره خوش ناس واستقبلوني احسن استقبال
وشوفي جدو شكد اطاني فلوس
طلعتهن جان تجرهن مني
حسبتهن ٥٠٠ الف
اخذتهم الها بسرعه جان دكول اي زين طلع منهم شي
كتلها ماما اني قررت اروح اعيش يمهم
جان ادكوم تضربني راشدي
ولج خاف انطيتج مجال انوب اكص لسانج إذا تعيدها
ليش ماما عماتي مدرسات بالاعداديه وكالن نساعدج
اششش ولا كلمه هاي اخر مره واول مرة ترحين الهم سمعتي لولا
ما اريد اسمع اسمهم بالبيت ابد والله العضيم اذا عرفت بيج رايحه الهم اكطعج وصل سمعتي لولا بعد مااعيد الحجي مالتي مرتين
