#انحراف_ام
البارت ١٣
ام مصطفى
دفعتني وسدت الباب
كنت ادك بالباب ماما افتحيه فدوه اكعد بالحوش بس خلي اخابر
ماكو سدت باب الكليدور الجوه وراحت
كعدت ع عتبة الباب الدنيا ضايكه بعيني
كمت ابجي
طلعت المبايل وخابرت عمو حيدر
كوه تطلع الكلمه مني بس ابجي
الو عمو تعال اخذني
فاطمه خير شصاير عمو امي طردتني
وأني كاعده بالشارع
هاي صدك وحده متستحي وماعدها شرف
شلون اطلعج بره بهذا الليل
انت وين هسه
اني كاعده بالشارع يم الباب
جايج لا تخافين ولا تتحركين عشر دقائق اني يمج
خليت راسي بين رجلي وكعدت من الخوف
والقهر
رجع خابر عمو علي هابعدج بالباب
اي عمو بعدني زين لاسدينه الخط ابقي وياي احجي لحد مااوصلج
سمعت صوت جدو يكله لا تتحرك ابد
عرفت جدو جاي وياه بالسياره
بقيت لازمه المبايل
فاتت مني سياره بيها شباب كامو يدكون هورن ويصيحون اصعدي
خفت كلش عمو حيدر كال لا تخافين وصلت
وصل عمو نزل وكف يمي وجدو نزل
كام يحجي الله لايوفقها
هاي ام هاي
اكو ام هيج تسوي
صعدني بالسياره جددو وضل يحجي
كال بعد مااسمع اجيبين طاري امج
ودكولين اروح الها
وهذا اخوج شلون قبلها تكعدين بالشارع
وسفه هذا ابن عقيل هيج ماعده غيره ع خواته
كتله جدو هو نايم محمد ميدري
حتى مشافني
ماله علاقه هي امي دكلي مااريدج انت
ولا اريد اشوفج
ختولي ع اساس انت عايزه لشوفتها
رجعت لبيت جدي
عمو حيدر ضل يصيح متصير جاره الها
هاي هديه وهاي سوالفها الطايح حضها
جان مرت عمي دكله اي طرتها حتى تاخذ راحتها وي جماعتها
وتباوعلي بمكر
انوب من سمعتها ختتكت بالزايد عرفت عدهن علم نسوان عمي
طبيت للغرفه مالت بيبي وحضنت بيبي وابجي
بيبي ليش امي هيج تعاملني
زين ليش هيج طبعها
ختولي بيبي انه امج شني واذا طردتج
ماعدج اهل انتي
هذا البيت شو باسمج سجله جدج
وانت الامر والناهي
خليها شلج بيها
هي هذا طبعها هيج ام مهمله من زمان
نايمه وانه اوكلكم والبسكم
تروح للسوك واذبكم علي
صوج ابوج الله يرحمه
كلش دللها وفنه اليحجي كلمه وياها
خلاها انفخت علينه وكامت ماتحاجه
اسكتي بيبي لا تبجين اسم الله الرحمن عليج
شو تعاي نامي وباجر نروح انه وياج لكربله
اخذج ونروح وحيدنا
واشتريلج شتردين
بيبي جانت تعاملني معاملة طفله تخاف علي كلش وماتزعلني
ومن ازعل ترضيني بطلعه وتشتريلي هدايه وملابس
عبالك صغيره اني مو عمري ١٦ سنه
ثاني يوم اخذتني لكربلاء
ترد روحي من ازور كربلاء صدك الراحه النفسيه هناك
طبعا من اول ما رحت لبيت جدي التزمت بصلاتي وحجابي
لان جدو اهم شي عنده الصلاة
يكول ان الصلاة تنهى عن الفحشاء والمنكر
جدي صلي حتى الله يهديج ع الطريق الصحيح ويبارك بيج
دائما هيج يكلي
صليت المغرب والعشه بكربلاء وبجيت
يم حضرة الامام العباس ع
طلبت منه ينسيني امي وكون كلبي مايحن عليها بعد
ويهديها يارب ع طريق التوبة والهدايه
بيبي كالت ها نروح
كتلها فدوه بببي خلي نبات هنا
كالت بكيفج نبات جا شعدنه
بيبي فررتني كربلاء كلها وزورتني التل الزينبي والعلكمي وكف الإمام العباس
كلما تاخذني مكان تشرحلي عليه
هذا التل هنا وكفت السيده زينب ع
حتى تشوف المعركه وتشوف اخوها الإمام الحسين عليه السلام
وهذا شط العلكمي الي كطعوه جيش عمر بن سعد ع أهل بيت رسول الله
هنا كطعوا جفوف الإمام العباس
بعد ما مله الجربه مي من العلكمي وووووو.........
حجتلي كل القصه كمت اتخايلها ضليت ابجي ونفسيتي احسها ارتاحت
نمنا بين الحرمين
والفجر صلينه ورجعنا للبيت
مرت الايام
ونسيت امي عايشه احسن عيشه بجال جدو و بيبي مدلليني ادلل
احلى لبس واحسن اكل وكلها تخدمني
بس نسوان عمي بدن يكرهني ويسمعني حجي ع امي دائما
بس اني مااكول لبيبي مااريد مشاكل وياهن
داومت خامس علمي
وهم نفس الشي هيج اداوم لا قرايه ولا كتابه
وتالي انجح
فد يوم كاعده جان عمو رضا طب هو وابنه احمد
احمد جان كلش حلو ودائما نشاقه اني وياه
ونسولف
جنت احسه عينه علي بس اغلس
عمو رضا صاح علي فطومه تعاي
ها عمو خير
كال يمعوده امج ثبرتني عليج مدري منين جايبه رقمي وتخابرني
شنو شتريد عمو
دكول اريد فاطمه جيبوها اريد اشوفها
كتله شكو خاف صاير شي
كال لا مااصور تحجي كلشي مبيها لسانها شطوله شسوت بيها
خذتوها وماجبتوها ووو
رحمه لبوج خابريها من احمد عنده رصيد
خله الرقم بمبايل احمد وكام
بقى احمد كاعد يمي
دك انطاني المبايل ا
الو الو
ها ماما اني فاطمه
كالت فطومه حبيبتي بنيتي مشتاقتلج يمه
شلون هيج تكطعين بينه فد كطعه
اني من سمعت حجبها صرت هيج 😨
كتلها شنو نسيتي انت طردتيني
بنص الليل وكتيلي بعد لا تجين
احنه مرتاحين بدونج
يمه فاطمه جانت ساعة عصبيه وجنت مقهوره منج لان رحتي
وي عمامج بس هسه طك كلبي عليج
ومحمد وساره كلو كلبي عليج
كتلها جدو ميقبل بعد اجي ولا تخافون علي اني بخير
يمه فاطمه بس تعاي نشوفج
جان يجر احمد المبايل مني
وكام يغلط ع امي يله ولي متجي الج مشرفنا نخليها عدج
كالتله وانت منو وشعليك تدخل
كلها اني احمد ابن عمها رضا وخطيبها وعن قريب راح نزوج
وسد المبايل بوجها
وللحكايه بقيه
ام مصطفى
