ميرا : كعدنا سولفنا اني واحلام ، شويه وراحت تشتغل بالمطبخ وتسوي جاي لان راح يجون عمومتي
كعدت اعاين للغرفه الله شكد مشتاقه لغرفتي ولاهلي ولكلشي ، اذكرت كلام احلام شلون يحجون عليه كمت ابجي ، شريد اكول عليك يا قتيبه عذبتني وعذبت اهلي ، شلون ابويه تعبان وشيب تارس راسه
وامي من مستشفى لمستشفى ، حتى اهلي شكو بي والثقه ضااعت بينا من الله لا ينطيك العافيه ياقتيبه
انت مجروح ومحروك قلبك على ابوك اني شلي دخل تحرك قلبي ، شلون ارجع ثقتي باهلي شلووون ، ابويه ايكلي شعندج جاايه واحمد يصفن بوجهي ولا كأنه جنت عايشه وياهم واعمامي يكولون اتبر منها وكلمن يحجي على خر اذنه ..
كمت غسلت ونزلت ، سمعت اصوات اعمامي بالستقبال ، كلت اجو رحت للمطبخ ، امي واحلام يشتغلن ، شافتني امي
الأم : شعندج نزلتي بنتي روحي ارتاحي شوفي وجهج شلون شاحب ومصفر ..
رحت يمها وشبكتها يمه مشتاقتلج خليني اشبع من ريحتج ..
الأم : بنيتي حبيبتي واني هم مشتاقتلج طول هاي الفترة النوم مشاف عيوني ..
رحنا كعدنا بالصاله وامي راح تخابر دكت عليها خالتي الضاهر افتهمو بالخبر ..
سمعت صوتهم اعمامي وابويه كام يعلى ومثل الصياح والجدل بينهم ...
عمي ناصر عود هذا الجبير وقرارة يمشي على الكل اسمعه يكول : وانت صدكت كلامها هاي جذبه منها حتى ترجعها ..
شردت ويا وتالي عافها وطلعت جذبه عليه انو خاطفها ..
بنتك لازم تربيها من جديد لان مامتربيه لو تتبره منها
ابويه : كام يحجي بعصبيه وصياح بنتي متربيه غصبن على الراضي والزعلان ، وكلامها صدكتها واني اعلمه ذاك الكلب ، وبنتي مااتبره منها ، ولك هاي ضناي هاي لحمي ودمي شلون تسمح لنفسك تكول هيج ، شتريدني اشمرها بالشارع واكول اني متبري منها ..
عمي ناصر : وترفع صوتك على اخوك الجبير علمود خلك طفله ..
ابويه : انت اخويه على عيني وراسي والسموحه منك ، وكام باس راسه ، بس هاي بنتي مااقبل احد يحجي عليها لو يطعنها بشرفها ..
اني جبتكم هنا علمود انحل السالفه ويا ذاك الكلب خو مو توكفون ضدي ..
عمي الخ كال : صلو على النبي ياجماعه الخير بالهدوء تنحل المشكله مو بالصياح ..
على المكان صوت الصلوات ..
ابويه : ذاك الكلب الي اسمه قتيبه ايكول الحادث مقصود وعلساس انو اني دعمت عن قصد وعداوة
واني لا عندي شي ويا ابوة ولا عداوة ..
عمي ناصر : ساكت الضاهر ماعجبه الكلام ولا مصدك
عمي الخ : اي لازم انخبر عليه الشرطه ونخلي ايتختخ بالحبوس الدبسزز ..
عمي الصغير محمد : زين واذا رادو دليل لازم يكون عندنا دليل على الخطف ..
ابويه : شهاده بنتي دليل كافي ..
عمي محمد : لا هذا مو دليل كافي لازم اكو غير دليل يكفي ، وانت تعرف الشرطه اشلون تحجج والحقوق ضايعه ..
عمي الخ : اكول وينها ميرا خلي نشوفها ...
ابويه : احمد كوم صيح اختك ..
احمد : ماشي بويه ..
اجى احمد كالي وكمت ويا عدلت ملابسي ودخلت
ميرا : السلام عليكم
سمعت صوت اعمامي رددو السلام واني عيني اجت على عمي ناصر كاعد وساكت حتى مرد السلام بس صافن بوجهي ..
دخلت وقلبي يرجف عبالك داخله لحكم اعدام ولا كأنو ذوله عمومتي وابويه موجود ..
مشيت بخطوات بطيئه ..
ابويه : دخلي بابا سلمي على عمومتج ..
رحت لعمي ناصر سلمت عليه رد السلام بكل برود ..
رحت لباقي عمومتي سلمت وسلموا عادي ..
بس عمي محمد حضني وكالي مشتاقيلج بابا حمد لله على سلامتج ..
اني اكثر عمو .. الله يسلمك
ورحت كعدت يم ابويه شويه واجت امي سلمت وقدمت الجاي وغيرو السالفه على الحال والأحوال وشويه وطلعو ..
كعدنا بالصاله الله شكد مشتاقه لجمعتنا ولمتنا وسوالفنا ، سولفنا شويه وحجيتلهم شلون جنت محبوسه وسلفولي على الوضع شلون صار ؛ وعلى مغامرات احمد شلون يدور عليه ..
ضلينا انسولف وشويه اجن عماتي ودخلت سلمت على عماتي واولادهم واجو بيت خالاتي واولادهم وهوسه صارت حتى خوالي اجو رئسن من الشغل لبيتنا يشوفوني وسوينا عشا قسم راحوا وامي جلبت الا يبقون على العشاء بمناسبه رجوعي وتالي بقو ..
للعشرة بليل كلها راحت نضفنا المطبخ اني واحلام ..
اجت امي كالت اليوم انام يمج اووف شكد مشتاقتلج كتلها واني كثر يوم شبكتها و رحت فرشت بالكاع وشبكتها ونمت وتسولفلي شصار بغيابي احلام طفت الضوء واجت شبكتني من هاي الصفحه صرت بالنص كالت اني هم مشتاقتلج عووبه ..
كتلها عوبه اني هم مشتاقتلج وكمنا نضحك ..
شويه وانفتح الباب وانشوف احمد واكف ..
كلناله شكو شتريد ..
كال سوولي مكان يمكم اني هم اريد انام يمج
ميرا : هههه بعد اخوي تعال قلبي اندحس بصف احلام ..
احمد ماصدك اج جفت واندحس يم احلام كلنا كمنا نضحك ..
ميرا : صدك احمد بعدك تتناكر انت واحلام ..
ضحك احمد كال لا بطلنا لان اغلب البيت صار هدوء ومحد يحجي ..
بس انشاالله من باجر نرجع ..
احلام : عاااا اني ماصدكت خلصت من مصايبك وهوستك ..
كمنا نضحك وجان يدخل ابويه وبدون سابق انذار اج ونام بصف امي لان بس هناك جان مكان فارغ ..
امي : شكو اجيت ؛ اني مو شردت منك
الأب : ههه اني مااجيت يمج اجت يم بنتي مشتاقلها
ميرا : فديتك يابه واني اكثر مشتاقتلكم ..
وضلينا نسولف ونضحك الى اني استسلمنا للنوم ..
الله شكد اتمنيت هاي الليله متخلص من شوكت واني افتقد هاي الضحكه الي بوجي اهلي ؛ ماصدكت اني بحضنهم ونسولف ونضحك واكول خاف هذا حلم ومااريد اصحى منا .....
🍁🍃🍁🍃🍁🍃🍁🍃🍁🍃🍁🍃🍁🍃🍁
دمتم بخير ..
في امان الله .
أنت تقرأ
خطفني فَأحبني
Fantasíaقصة فتاة كانت حياتها سعيدة بين احضان اهلها فجأة تتغير حياتها الى ظلام بسبب شاب يهوى الانتقام لثأر والدة ، وتقع الفتاة هي الضحيه وتدفع الثمن ، وقد يشاء القدر ان يَحول قلب الشاب من كرة الى حب تجاه الفتاه ، لنرى هل يفوز الشاب بكسب قلبها ام يخسر ؟
