#مجهولة_النسب
للكاتبة أم مصطفى
البارت الاول
جوري ماما يله كومي اكعدي اليوم
اليوم اول يوم راح اداومين مدرسه
يله كومي
جوري: اي ماما كايمة
صار الصبح همزين
جوري : الليل كله كاعده افكر باجر راح اداوم واصير بالمدرسه مثل البنات
قبل لا انام
حضرت صدريتي النيلي وقميصي الابيض وشرايطي البيض
وجواريبي وحذائي وجنطتي جانت ورديه بيها ساندرلا مرسوم عليها
يم راسي
شوكت يصير الصبح والبسهن
امي اشترتهن الي كلهن جدد
وفرحانه بيهن مثل فرحة ملابس العيد
الليل كله اتخيل نفسي لابستهم
ماصدكت صار الصبح
من كعدتني ماما طفرت بسرعة
جوري:صباح الخير ماما
ام جوري صباح النور ماما كومي حبيبتي اغسلي وجهج
حتى ابدلج وامشطج
وتتريكين واخذج للمدرسة
جوري:اي ان شاء الله ماما
بسرعة ركضت ع المغسلة فتحت المي وكعدت اغسل وجهي
وافرجت اسناني خلصت
نشفت بالخاولي
واجيت اركض ع ملابسي
اول شي شلعت العلامات منهن
لبست القميص دكمته
ولبست الصدرية
جانت قصيره جوه الركبة
ولبست الجواريب ام الكركش وياهن
جان جو زين لا حار كولش ولا بارد
نص الشهر التاسع
لزمت الشرايط والمشط وركض لامي
كعدت تمشطني وتعد ع راسي
( يمة البنات سبعة واكول كليلات )
واني افرح هواي بهاي الكلمات
تضفر كصايبي ودكول
(جوري وشحلالها كصايبها وراها اجه الخطاب يخطبها وابوها مانطاها )
خلصت وباستني يله يمه جوريتي
كومي تريكي
كعد بابا
ركضت عليه صباح الخير يابة
هله بوردتي الجورية
صباح النور بويه باسني
وكال هاي شطالعة تخبلين
بابا حلوات ملابس المدرسه
وافتر كدامة
اي بويه يخبل عليج
بس كون تصيرين شاطره وعاقلة
وتسمعين كلام معلمتج
اي بابا ان شاء الله
صاحت امي يله تعالوا تريكوا
كعدت بالكاع ع الصينية
امي طاكة بيض وتصب جاي كاعده النه
اكلت بسرعه وكمت
امي شالت الصينيه
ولبستني الجنطة ولبست عباءتها
كالت يله ماما نروح للمدرسة
واني كيفت رجلي ماشالتني من الفرحة شوكت اوصل للمدرسة
بطريقنا لا كتني جيرانه ام ايهاب
ماخذه بنتها للمدرسة
سلمت على امي
كالت لامي ها جوري سجلتيها بالمدرسة
كالت الها اي والله
وكلت اخذها اوديها لحد ماتتعود
وتضل تروح وترجع وحدها
ها خوش جا بنتي اسماء هم سجلتها
صف اول بلكت يرحن ويردن سوه
اي والله علواه
وصلنا للمدرسة واني طايره فرح
اريد بس افوت
امي لزمتني بيدي وطبت وياي
جانت هوسة بعدها المدرسة
وكفونا بالساحة وبدوا يصيحون الاسماء
لحد وصل اسمي كال جوري شعبة ب روحي
امي لزمتني واخذتني
كعدتني اول رحله ووصت المعلمة علي وراحت
واني كلش فرحانة ومكيفة
بدت المعلمة تصيح باسمائنا
وراها وزعونه كتب ودفاتر وقرطاسيه
كلش فرحت بيهن
من خلص الدوم طلعت لكيت امي وام ايهاب بالباب
منتظراتنه رجعت للبيت وياهم
الطريق كله اسولف لمي ع المعلمة
والكتب
بس وصلت طلعت الكتب والدفاتر والقرطاسيه اشوفهم لامي
كالت ضميهن لا يشككن حتى اجلدهم الج
تغدينة وامي صدك جلدتهم الي بجرايد وفوكاهن لايلون وكبستهن كبس الي طلعوا يخبلن
كمت يوميه اروح وارجع وي اسماء وبنات هم بالدربونة
اني جنت شاطره ونضيفة كلش
بمرور الوقت المعلمة حبتني
والمديره تطلعني بالخيس بالساحة يصفكولي
لان شاطره ونضيفة وعاقله
كل شهر اطلع الولى
جنت كلش احب المدرسة
الى ان بدوا البنات يصيحولي النغلة
ويضحكون البنات علي
مااعرف شنو معنى الاسم ولا اعرف ليش هيج يضحكون علي
كمت ابجي هناك بالمدرسه
امي لا حضت علي
ماما جورية ليش تبجين
ماما مااريد اروح للمدرسة بعد
ليش حبيبتي
البنات بصيحولي نغلة مااعرف يعني شنو
بس يضحكن كلهن علي
ومحد تلعب وياي بعد
ماما ليش هيج يكلولي اني بيه شي
يعني مو حلوه اني ويعيبون ويضحكون علي
لا ماما انت تخبلين حبيبتي
هذن يغارن منج لان شاطره ونضيفة
خلي يولن
العبي وي اسماء
لا مااريد العب وياها هي علمت البنات
يصحون علي نغلة
ختولي اني اروح لامها واحاجيها
انت معليج بيهن
صيري شاطرة حتى المعلمة تبقى تحبج
دنكت وكلت بكسرة خاطر
ان شاء الله ماما
اني جوري عمري ٢٣ سنه
راح احجيلكم قصة حياتي واعرفكم ع عائلتي
اني وحيدة لامي وابوي
اعيش ابغداد مدينة الصدر
ابوي يشتغل ركاع احذية اتكرمون
رجال فقير و ع كد حالة
ومعيشنه الحمد لله
يحبني ابوي هواي ومداريني
امي مره ع مالت الله مثل ميكولون فقيره كلش
وتحبني ومداريتني شحب شريد اتجيبلي تقصر ع روحها وتجيبلي
جنت طفله كلش مرحة واحب الحياة
وسعيدة وي امي وايوي الى ان
سجلت بالمدرسة
زادت فرحتي وسعادتي
بس كرهت المدرسة بسبب
البنات جانوا يضحكون علي
رغم اني شاطره
امي تشجعني دوم دكلي معليج ماما بيهم يغارون منج
بس اني ضاله ابالي
دوم اباوع ع روحي بالمراية
اكول ليش يضحكون علي اشو اني حلوه ونضيفة وماناقصني شي
زين نغلة شنو وشنو معناها
كمت اكبر ودوم اسئل روحي هذا السؤال
نجحت سنة ع سنة
وصرت صف ثالث
وأكثر البنات يضحكون علي
ومن يعاركوني يصوحيلي النغله
الى ان فد يوم
سولفت لبنت عمي جانت اكبر مني
كتلها شنو نغلة يعني
دوم اسئل امي ومااجاوبني
كالت نغلة يعني هذول
مو امج وابوج يعني لاكيج بالشارع
كمت ابجي كتلها لا امي وابوي ذولي
كالت انت سئلتيني وجاوبتج
ماكتلج هذول مو امج وابوج
جانت بنت عمي صف سادس وكلشي تعرف
ضليت طول اليوم ابجي
الى ان رجعت للبيت عيوني ورامة
امي سئلتني شبيج
كتلها انت امي لولا
اتفاجت بسؤالي كالت اي امج لعد شلون
كتلها لعد ليش يصحولي نغله
كالت وشنو يعني
كتلها هبة كالت يعني اني مو بتكم لا كيني بالشارع
ركضت شبكتني وكالت لا ماما انت بنيتي
خلي يولون يرحولج فدوه
مااسمعج مره ثانيه هيج تحجين
وللحكاية بقية ام مصطفى
كل عام وانتم بألف خير احبائي
أنت تقرأ
مجهولة النسب للكاتبة أم مصطفى
General Fictionتتكلم القصة عن فتاة مجهولة النسب وعن معاناتها مع المجتمع وكيف يتعاملون معها
