#مجهولة_النسب
للكاتبة أم مصطفى
البارت الثاني
كالت امي مااسمعج مره ثانيه هيج تحجين
ماما يعني انت امي
اي يمه اني امج وانت بنيتي يابعد روحي معليج باليحجي
والله يغارون منج
ومن لبسج وشطارتج
يومية اكلج يغارون منج
لان انتي وحيدتي ومدلللتج واحبج
وكلشي اشتريلج
هنه ماعدهن مثل ملابسج والعابج
ولا بشطارتج
ويكللولج هيج
ماما بس اني مااريد اروح للمدرسة بعد
لا لادكولين هيج بعد
باجر اروح وياج واريد اشوف منو هيج ادكلج
اشتكي للمديره عليها
يله كومي اغسلي وجهج
راح يجي ابوج من الشغل مااريده يشوفج هيج
طلعي كتبج خلي اشوف شطوج واجب
مسحت دموعي وابتسمت كلام امي
هواي ريحني
وفرحني
كمت غسلت وجهي وكعدت اكتب واجب
ثاني يوم امي راحت وياي للمدرسة
حاجت المعلمة
وراها صاحت علي المعلمة
تعالي جوري
نعم ست
منو هيج تكلج
ست هاي
وهاي وهاي
كومتهن المعلمة تعالن ولجن
مسويات عصابة شنو هنا
باجر اجيبن اولياء امورجن بعد ماتجن
الا اهلجن وياجن يله رجعن لرحلاتجن
وياوليجن اذا اسمع وحده تحجي حاجية وي جوري
ادزكم للمديره وهي تصرف
يله روحن
بوكتها حسيت اني بنصر عليهن فرحت كلش
ونفخت نفسي اكثر من المعلمة كالت جوري اشطر وحده بالصف
ويغارن منها لان شاطره واحبها .
راحت امي واني كعدت برحلتي فرحانة
دكت الفرصة واجت اسماء علي
إذا مااجيب امي عليج بسيطة
كتلها جيبيها شسويلج يعني كالت شوفي هسه
رجعت للبيت حجيت لامي ع اسماء
كالت ختولي معليج بيها
شوية واندك الباب رحت فتحته
لكيت ام ايهاب جاية هي واسماء بتها
صاحت بيه وين امج
كتلها جوه كالت صيحيها بساع يله
وعلت حسها
واسماء تبوعلي بمكر
طبيت جوه
كتلها يمه هاي ام ايهاب
بالباب هي واسماء
كالت وينها الله جابها الي
طلعت امي واني وراها امشي
ام ايهاب مره طويله وسمينة
وصاحبة لسان سليط
امي كالت الها هله خيه فوتي تفضلي ليش واكفة
صاحت لاافوت ولا اتفضل
اكلج شني راحه اتشكين ع بنتي يم المعلمة
ماتستحين مادكولين جيران وعيب
ها لو زايحتها انت وبتج النغلة المتدري متين مامنين جبتيها
امي كالت الها لادكولين هيج
هاي انت لعد معلمة بتج ع هالحجي
مو عيب تصيح ع بنتي هيج كدام البنات
ام ايهاب؛- عشتوا مصدكة بتها
ام جوري:- اي بنتي وغصبن عليج
جان استحيتي مره جبيره وتعلمين بنتج هيج سوالف
ام ايهاب:- انت الي ماتستحين
والله اشهرج وافضحج بالمنطقة كلها اليوم
امي سدت الباب بوجها وطبت
وهي ضلت تحجي مدري شنو وتصيح وتغلط
وامي تتحسب عليها
وكامت تبجي واجت حضنتني كالت
شلون راح تعيشين وي هيج مجتمع مااعرف
اول مره اشوف امي تبجي
كمت ابجي وياها
ماما كافي لا تبجسن
مسحت دموعها وكالت ماابجي حبيبتي لا تخافين
اجه ابوي من الشغل
وامي حجتلة
كالها ختولي هاي وحده السانها متبري منها
لا تحجين
وياها ابد عوفيها هي والله احنه ناس مستورين
وهاي وحده لسلنها متبري منها
ونهار كله تعارك
نقلي بنتج لغير صف وخلصينة
باجر اروح وانقلها اني ..
امي بيومها كلش انقهرت وضلت اليوم كله تباوعلي وتبجي
ابوي يكلها عليمن تبجين
دكله خايفة عليها من تكبر
يكلها لا تخافين احنة موجودين
وياها
جنت ماافتهم ع شنو يقصدون ويحجون شنو شراح يصير بيه وامي تبجي علي
كلما اشوفها تبجي
انقهر زايد عليها
ثاني يوم اول درس اجت ام ايهاب
للمدرسة وتعاركت وي المعلمة
دكلها بنتي ممجذبة هاي وحده نغلة وربوها عدهم
والمنطقة كلها تعرف بيها
وكلها دكللها النغلة
وضلت تصيح بعلو صوتها والبنات كلها ضلت تضحك علي
وراحت
كمت بس ابجي خاله راسي ع الرحله وابجي
حاولت المعلمة تحاجيني ماحجيت
بس اشهك وابجي
وضامة راسي
طول اليوم لاقريت ولاكتبت بس ابجي
استحي ارفع راسي
حتى لفتي بقت بالجنطة ومصروفي
ولا طلعت بالفرصة
نايمة ع الرحلة وابجي
بالدرس الاخير اجاني ابوي
لكاني وارمة عيوني بجي
المعلمة حجتله الي صار
كالها رحمه لوالديج اريد انقلها لغير صف
هاي متخلص السالفة
كالتله والله حرامات تنقلها اني مااقبل اشطر وحده بالصف عندي
كلها شسوي ست اتكفى الشر والمشاكل
كام ونقلني لشعبة ج
تعرفت علي صديقات جدد
كيفت وياهم يحبوني لان شاطره
والمعلمة هم كيفت بيه
خلصت سنة ع سنة واني مرتاحة منهم
إلى أن صرت صف خامس
رجعن بصفي مااعرف شلون
وبدت نفس المشاكل ونفس الكلام ينعاد علي
فديوم داومت ووزعولنة شهايد الشهر الاول جان اطلع ناجحة بدرجات عاليه اقل درجة عندي ٩٥
من وزعت الشهايد النله المعلمه
صاحت اسمي وكالت الاولى ع الصف جوري عدنان
كالت صفكولها صفكولي
جنت فرحانة كلش
ضميت الشهادة بالجنطة
دك الجرس فرصة
رحت اشتري من الحانوت رجعت لكيت
شهادتي مشكشكه وخاليها ع الرحلة
واسماء وشلتها يباعولي ويضحكون علي
كمت اباوع عليها وابجي
ورحت عليهن ليش هيج تسون
كالت اسماء ولي هو منو يمج انت
شعلينا احنه
كتلها لا انتي وياهن شككتنها
كالت شعلينة احنه تذبين علينه تهايم
احترك كلبي ملشتها من شعرها
كامت وضربتني وتعاركنة خرمشت وجها وهي عضتني
اجت المعلمة اخذونه للمديره
المديره كالت اثنينجن باجر اتجيبن اولياء امورجن
رجعت للبيت واني ابجي لميت وصل شهادتي بالجنطة
حجيت لابوي كتله بعد مااروح للمدرسة بطلت
كال ابوي بعد احسن
ما نريد مدرسة
مدام المدرسة تغثج ختولي
ومن يومها بطلت من المدرسة وكعدت بالبيت
ولا طلعت الباب ابد
بس مرات نروح لبيت عمو محسن
لو همة يجونه
عمي محسن كلما يشوفني يكلي هلة بمرت ابني
جنت اضحك واخجل من حجايته
عمو محسن عنده ٣ولد واربع بنات
مزوج مهند الجبير وباقي عمار و بهاء
والبنات الجبيره مزوجه والبقيه بعدهن صغار
علاقتنا كلش قوية بيهم
نروح الهم ويجونة دوم
سنة ع سنة بديت اكبر
وكلما اكبر عمي يكول محجوزة لبهاء
جوري متصير لغيره
ابوي يكلة ان شاء الله الكم ومااطيها لغيركم
امي هم دكله مانلكة احسن منكم
بديت اكبر جنت أسعد وحده يم اهلي
امي وابوي يحيوني كولش
ومدلليني
جنت اتمنى عندي اخ احت العب وياهم
ودوم اكولها لامي يمه ليش ماعدي خوان
امي دكلي منريد غيرج
نريدج بس انت
وابقى اتوسل بيها جيبينة جاهل صغير
وهي تمسح ع راسي الله كريم يمه
ربج هو يرزقنا
بنات دوم يجن يمنا نسولف ونلعب سوه
بس من يرحن انقهر هواي واضوج وحدي
مرات امي تكللهن باتن عدنة ويباتن ع مودي
بس هم يرحن
مرت الايام واني ع الحال مدرسة بطلت منها ومااطلع
كبرت وصار عمري ١٣ سنه
كبرت اكبر من عمري ضخمة وطويله وبيضة
بزر دلال صرت
رغم ابوي ع كد حالة بس مامخلينه بعازه اشكال الاكل يجيبلنه من السوك يجي محمل تحمل
واني بس اكل لا طلعة عدي ولا طبة
اكل وتلفزيون
فديوم كاعده واجت امي كالت يمه جوريه
انت كبرتي وصرتي جبيره لازم تعرفين الحقيقة
كتلها شكو يمه شنو
كامت تمسح بكصتها احسها عركت
وشفتها ترجف
يمه اريد اعترفلج بسالفة
اخاف اضمها عليج وتسمعيها من الغير
وتنقهرين
كتلها كولي يمة
جوريه يمه مها يكون تبقين بنتي انه ربيتج وسهرت عليج ويشهد الله احبج اكثر من روحي
كتلها شكو يمه
كالت جوريه انتي مو بتنا احنى اخذناج من مره وربيناج
كتلها شنووووووو
وللحكاية بقية ام مصطفى
أنت تقرأ
مجهولة النسب للكاتبة أم مصطفى
Ficción Generalتتكلم القصة عن فتاة مجهولة النسب وعن معاناتها مع المجتمع وكيف يتعاملون معها
