مجهولة النسب للكاتبة أم مصطفى

الثامن

#مجهولة_النسب
للكاتبة ام مصطفى
البارت الثامن

كمت طفيت الشمعه 
رجعت كعدت ع الجربايه
بقيت كاعده  شجاه
كله من رواء هسه كون عندي مبايل جان خابرتها ورزلتها
شكد متستحي شكو مخابرتنه بنص الليل لزكه شنو
اووف ع حضي وفكري
طلع رسه من البطانيه وكام يتكلب
اباوع عليه ضليت
ساد عيونه مسوي روحه نايم
بس اعرف كاعد 
اني هم تعبانه رحت تغطيت  ونمت
كعدت ع صوت مرت عمي ادك الباب وتصيح
عيني العرسان اكعدوا 
جابولكم  ريوك
كعدت كمت غيرت ملابسي وطلعت
كام هو هم بدل وطلع
عمتي كالت شعجب مسبحون 
كتلها  هاا
كالت شنو بس لا دكولين ما وصلج 

جنت هواي استحي ومااعرف شي بهاي السوالف
دنكت ورحت
اشوفها تبسبس ضلت وي مرت عمار
رحت سلمت ع امي وابوي
امي حضنتني وضلت تبجي البيت فارغ خلافج يوم
وابوي هم حضني
اجه بهاء سلم
بهاء ..صباح  الخير
عدنان ..صباح الخير وليدي
الف مبروك  بالرفاه والبنين
بهاء ..اشكرك  عمو
ام مهند... تفضلوا تريكوا سوه  خطيه ام جوري ممقصره جايبه اشكال الريوك 
كريمة..  الف عافية  ع كلبكم حبيبه
جوري.. التمينا ع الصينيه  ناكل
بهاء يباوعلي  ويدير وجهه من انتبه عليه
خلص الريوك  
امي طلعت مبايل جديد  مشتريه  الي
كالت هذا هديه مني الج
حتى تخابرينه 
اشوف  مرت عمي وجها كام يطي  الوان
ام مهند ..المن هالتليفون  مانريده  يسوي مشاكل
كريمة  ... اسم الله قابل شعدنه  ونسوي مشاكل
هو نطمن عليها نريد
ام مهند ... خابروا علينا  ع ابو مهند ع بهاء
بهاء ... خليها ع راحتها يمه هي كلها عدها مبايلات
ام مهند ... بكيفك يمه 😏
جوري.. اخذت المبايل من امي وتشكرت منها
اهلي بقوا ساعة وراحوا امي كلشي محجت  ولا سئلتني شي
كمت اني دخلت للمطبخ لكيت مرت عمار تغسل اماعين
كتلها عوفيهن اغسلهن اني
كالت براحتج عيوني اني هم اريد اسوي غده
كتلها لعد عوفي الاماعين
غسلتهم ونضفت المطبخ
خلصت رحت للغرفه لكيت بهاء
بالغرفه محجيت شي وياه
صرت اشبه بالابكم
مااحجي ولا كلمة
بهدوء اخذت ملابس ودخلت للحمام سبحت طلعت عمتي تبتوعلي صفح
شبيها هاي تغيرت ١٧٠° شكو
ولا جنها مرت عمي القديمه اشو كالبه وجها علي
خب حضي  كلت بكلب هي ضلت عليها
دخلت للغرفه
بهاء كاعد ع الجربايه
ويكلب بالمبايل ماادري يكتب
المهم عينه بمبايله
كعدت انشف شعري
مشطت شعري
كال جوري
جوري.. ها اا
بهاء...  مااريد احد يعرف اني ماوصلتج
جوري..  هزيت راسي بمعنى اي
بقى صافن علي واني امشط
شلت شعري بقراصه
وكعدت يمه ع الجربايه
تبسمت اله
باوعلي وكام اخذ مبايله وطلع
بقيت ع كعدتي
ليش هيج يسوي زين شنو ذنبي اني
مو كال راح اعوفها راح انساها
اشو كلب علي
بعدني كاعده
دكت الباب  مرت عمي
صاحت جوري كومي ساعدي مرت عمار بالغده
جانت مرت مهند عازله فوك 
وبس هيام مرت عمار  وياهم
كتلها اي خاله جايه
يعني معقوله من اول يوم تشغلني
اشو سامعه العروس تبقى اسبوع متشتغل
يله هسه عاد شلون عروس اني
من الصفحتين سوده مصخمه
خليت حجاب ع راسي وطلعت
كاعده مرت عمي بالهول
كالت يله خفي ايدج بعد منا وهيج مو اله اكلج
وكت غده ترحين للمطبخ تساعدين مرت عمار
كتلها حاضر عمه
دخلت للمطبخ كتلها هيام شنو اسوي تردين
كالت اشطفي  المواعين وصبي تمن
كتلها صار
صبيت وخلصت  بدينا نودي الاكل فرشنا سفره
وكعدوا كلهم
اجيت اخر وحده اني تارسه سراحية مي
اباوع ماكو مكان
عمي كال بهاء سوي لمرتك مكان
اشر ع ابن عمار ادنه عمو خلي عمتك تكعد
بمعنى مايريدني اكعد يمه
كلها ضلت تباوع علي
كلش انقهرت
كعدت بصف الجهال وهو كبالي
كلما يرفع عينه اخزره بعيوني
ردت احسيه بالي سواه
كوه اكلت لكمتين
كمت عمتي كالت ضلي كاعده
يخلصون حتى تلمين السفره
فشلت مره ثاني كعدت انتضرهم كلمن
نكت ايده وكام
واني بقيت الم بالسفره واعزلها
اخذتها وغسلت الاماعين
طاحت ايدي من الغسل
متعوده ع اهلي شي قليل اماعينه
هنا كومه
رجعت للغرفه دنيا ضهر وحاره تكتل
لكيته يخابر
هزيت ايدي
هو شافني هزيت ايدي واباوعله
كال يله مع السلامه 
اني فتحت الكنتور وجاي اطلع دشداشه
لان دشداشتي تنكعت
راسا جرني من ضهري
شنو ست جوري جنج ماعجبج الوضع
اشو تهزين بيدج
محجيت باوعتله بعيوني
كال من احجي وياج لا تباعيلي هيج
عينج نزليها بالكاع 
نزلت عيني
كال شنو معاجبج الوضع 
كتله  اسئلك سؤال اذا تحبها ليش ماازوجتها
كال ميخصج انت
كتله يخصني ونص
وهاي رواء اذا خابرت بعد  اخابر عمو واكله الزم بنتك
راسا ضربني راشدي ولزمني من شعري
شوفي ولج اذا اجيبين طاريها احركج انت وعشيرتج سمعتي لو لا
فوك مااخذتج وقبلت بيج
هالنوب تشرطين علي
اخابر احب ازوج بكيفي سمعتي لولا
هدني واخذ تليفونه من ع الكومدي وطلع
كعدت ع الجربايه ابجي ع نفسي وع الي صار بيه
ليش شنو ذنبي  اكوو وحده باول يوم عرسها تنضرب 
شبعت بجي  وين اروح  جنت بوكتها صغيره صح بس تفكيري بعيد
جنت اكول باجر يحبني وينصلح
كلت اصبر عليه بلكت الله يعوضني ع صبري
والله هو بي مجال بس هاي مخبلته ليل نهار تخابر وتراسل
.....
لليل دخل نزل فراشه بالكاع وفتح مبايله وكعد يراسل
حتى معبرني بكلمه  ولا كأنما يشوفني

خليت ونمت 
مر اسبوع ع هالحاله
اني انام ع الجربايه وهو بالكاع
ابد ميحجي وياي بس طلعيلي ملابس
وجيبيلي هذا بس ينخي علي
...
بيوم السبعه خابرت امي كالت اليوم تسوين سبعه كتلها مااعرف والله اسئل عمتي
وارجع اخابرج
رحت كتلها عمه نسوي سبعه
كالت بكيفج اليوم يجن البنات  كلهن
سون شعدنه قابل
كتلها زين لعد خلي اخابر امي
خابرت رجعت كتلها نسوي ماما
كالت راح اشتريلج فستان واجي
كتلها اوكي
هو اشوفه مخبوص كل شويه يفتح بالكنتور
ومحتار شنو يلبس
معقوله ع مود السبعه ويريد ياخذ صور

طلعت  عندي بدله قصيره اشتريتها بالنيشان جانت ورديه
كلت البسها ع ماتجي امي
سمعت صوت طلعت
لكيت هبه جايه هي وجهالها
باوستني وهلهلت
جانت تحبني وصديقتي كلش
كالت لسه ممبدله تعاي امكيجج
فتنه للغرفه
لكيت بهاء لابس تشيرت اصفر  وبنطرون اسود  وتارس نفسه عطر
يجنن طالع
كالت هبه صلووات شطالع هذا كله لجوري
والله عمي تستاهل
ضحك هو وكال منو اجه
كالتله بس اني
بس العصابه كلها جايه اليوم انام ع كلبك
كال اويلي  اليوم نشيل
وطلع يضحك
يا الله  كلت اليوم يضحك
هبه...  جوري شلونه وياج بهاء
جوري.. زين الحمدلله 
هبه تره بهاء طيب بس هاي رواء لزكة لازكتله شكد كتلها احنه
خاطبيج وابتعدي منه
بس ماكو فايده غيوره كلش
ديري بالج منها هاي وحده مسمومه وغيوره لو بيها خير جان ازوجت
مو لازكه لبهاء وتدري بيه من الصغر خاطبيج اله
جوري...  الله كريم
مكيجتني وكالت شراح تلبسين
طلعت الها البدله كالت كلش حلوه
لبستها وسدتلي السحاب
ورتبت شعري
سمعنا صوت الهلال كالت اجن خواتي
حمواتي جانن اربعه كلهن مزوجات اصغرهن هبه
مريم الجبيره وشهلاء و امل وسطانيات
طلعت تلكني باوسني الف مبروك
وصار البيت هوسه
شويه واجت امي جايبه الكيك والشرابت
وياها
البنات بسرعه خلوهن ع الطبله
وصاحو ع بهاء يجي حتى نطك صور
اجه وكف يمي 
وبدن ياخذن صور
جان اطب رواء مبدله ومكيجه هي وامها
وللحكايه بقيه ام مصطفى