مجهولة النسب للكاتبة أم مصطفى

السادس

مساء الخير ع عيونكم متابعيني

#مجهولة_النسب
للكاتبة أم مصطفى
البارت السادس

جوري ..  شنو ذنبي اني بس فهمني
وائل...  انت مالج ذنب بس هاي بعد
امي هذا عقلها وهاي تفكيرها
اتمنالج الموفقيه
مااريد اوكف بطريقج  ربي يوفقج
جوري... سديته منه واني مقهوره
ضليت ابجي ع حالي
يربي ليش هيج  شنو ذنبي اني
بجيت وبجيت
لحد طبت امي علي
لكتني ابجي
كريمه...  جوريه شبيج يمه ليش تبجين
جوري..  يمه اني موافقه ع بهاء
كريمه.. اي الحمد للة  من وافقتي
لعد ليش تبجين تره احنه نريد مصلحتج
يايمه ابن عمج احسلج
جوري.. يمه اني اريد ابقى يمج
وحضنت امي وبجيت
كريمة... والله مايهون علي فراكج
بس شسوي اريد اطمن عليج

يابنتي وتره ابن عمج احسن الج
ماما بس احس بهاء مايريدني
لا يمه لوما مايريدج
جان مدز اهله يخطبوج
هذا زواج مابي جبر 
جوري.. مسحت دموعي وكتلها الله كريم ماما....

دز خبر ابوي الهم يجون يخطبون
وانطاهم الموافقه
حددوا يوم الجمعه الكعده مالتي  يعني خطبه
وائل بعد مااتصل بهاي الايام
او بالاحرى  اني ابد ماخابرته..

اخذتني امي اشترتلي فستان
وحذاء واكسسوارات
قبل الخطبه بيووم
بيوم الخطبه الصبح كعدنا الصبح
نضفنا البيت اني وامي وحضرنا الغده
كالت امي خاف احد يجينه ع الغده
كملنا كولشي
حتى الكيك والشرابت حضرته امي
كالت فوتي اسبحي
وفتت سبحت
جنت اقنع روحي انو ازوج بهاء
واكيد بعدين يحبني
لان اني حلوه وبنت عمه
اسبح وافكر ياتره من يجي شلون
راح يغير نضرته اليى
راح يحبني مثل وائل
لا هو احسن من وائل
وائل سمع حجايت امه وعافني
اي احسن منه خطبني وراح يصير  زوجي بعد لازم انساه وافكر بس بهاء

خلصت سبح لبست دشداشه خفيفه
بعدها لكيت امي دازه ع جوارينه
حتى تمكيجلي وتسحب شعري

سلمت عليها هلو نهله شلونج
باوستني بالعافيه وبالخير صلاوات راح تزوجين
بالعافيه وبالخير
تسلمين حبيبتي
امي كالت اصبلكم غده تتغدون حتى تبدي بيج
تره بالثنتين يجون استعجلي
نهله كالت ادللي خاله
صبت غده النه وتمن ودجاج وروبه
وسلاطه 
كوه اكلت جنت متوتره وقلقه
ومااكلت  يمكن لكمتين بس
وراها كمت
رحت للغرفه اني ونهله لبستني نفنوفي
جان لونه احمر وبي لمع اسود
من الركبه جان فرو اسود
وباديه هم فروه اسود خفيف
جان طويل للكاع
واني طويله وجسمي حلو مربرب
طلع كلش حلو علي

بدت تمكيجني
خلتلي بودره جان اسمها سمر كيك
تخلي بالسفنجه مي و تخلي وتمسحها بالبودره
بعدين بوجهي
وراها كحلتني
وخلتلي حمره حمره
وضلال اسود
فتحت عيوني
ماصدكت روحي هاي اني
اخبل طلعت
بعدين بدت تسحب شعري
وسوتلي برجم بالشسوار
طبت امي شافتني
ضلت تهلهل
يمه صلوات شطالعه من فدوه رحت لطولج
كلش فرحت بنفسي
عبالك الممثلات صرت
وره شويه اجويه بيت عمي همه وبيت عمي عثمان وعمتي مديحه
وبناتهم
بقيت كاعده بالغرفه اجت امي كومتني
للهول كادتني وفتت
وكلها تباوع علي وتصلي ع محمد
كعدتني ع الكرسي جانت خالته الي
جنت مستحيه كلش حتى بنات عمي
سلمن علي كوه حاجيتهن
ورديت السلام
شويه وطلع ابن عمي من الاستقبال
كال هلهلو قروا الفاتحه
ضلن يهلهلن ويهوسن
ويركصن ويدبجن
اني مدنكه امي توزع كامت كيك الهم وقواطي ببسي
شويه وكالن راح يطب الشيخ والعريس
لبسنها عبايه خلي يعقد الهم
فوتني للغرفه
ولبسوني عباية امي وفوكاها خبلن شال ابيض ع وجهي
كمت كلشي مااشوف شي
اسمع صوت ابوي
تفضل شيخ تفضل
اشوف شي مغوش من الشيله
دخل بهاء وعمو  وابوي وره الشيخ
كعد الشيخ كبالي
وبهاء بصفه
ضل يسئل بيه
هل انتي موافقه...
كتله نعم انت وكيلي
خلص عقد الشيخ
كال الف مبروك
كام كام بهاء وياه
راد يطلع وي الشيخ
صاح عمو عليه
ابقى يم مرتك
طلعوا كلهم فاتت هبه بنت عمي وخرت الشيله متي
ونزعتني العبايه
بهاء كبالي  داير وجهه مني
كالت هبه بهاء
بالعافيه بالخير خويه
كالها عليمن
سكتت
كالتله يله كوم خطيبتك حتى تلبسها الحلقه كالها انت كوميها
ويحجي من وره خشمه
اني ارجف من المستحه والفشله
كالت يا تستحي اكيد
يله جوريه تعالي اطلعج اني وبهاء يجي ورانه
اني كمت وياها بله كلام
طلعت وبهاء وراي
كعدت ع الكرسي
يمكن راد يطلع
امه صاحت وين تعال لبس الحلقات
رفعت عيني عليهم
صارت رواء كبالي بنت عمي الي يحبها
هو عينه مانزلت منها
اجه كعد بصفي
كامن يهلهلن ويهوسن
ومن هاي السوالف
تالي كال فضنه وين الحلقات
كالت مرت عمي يستحي تره هو
خلنه يلبس الحلقات يريد يطلع
جابوا العلبه
يلبسنه وعينه ع رواء
وهي تتبسم بحزن
اله
خلص شمر ايدي وكام
ذبيت حصره ع حضي الي مبين من عنوانه
طلع  وراها طلعت النسوان راحت
اجه عمي انطاني ١٠٠الف كال هذا بياضج  بويه باسني بكصتي وطلع
سلم ع ابوي وراح
بقينا وحدنه
ابوي اجه باركلي وامي هم
دخلت جوه نزعت البدله
واني حاسه بخيبة امل
جنت اتمنى بس يباوعلي بنظره
لو يبتسملي
لو حتى يسمعني كلمة حلوه
كرهت رواء وكرهت نضراتها
سبحان الله  من وره ماعقدلنا الشيخ
حسيت بي صار خاص الي
وتحركت مشاعري اله
بسرعه غرت من نضرات رواء اله
نزعت ملابس لبست تراك

وطلعت غسلت وجهي
امي تمشي وراي
ماما ميخالف لا تضوجين
كتلها ع شنو
كالت ع بهاء
ان شالله  بمرور الايام راح يتقبلج
كتلها ان شاء لله 
رحت للغرفه لفيت راسي ونمت
الصبح لكيت مكالمه من وائل
مسحتها وشمرت المبايل هذا شرايد بعد
عفته مالي شغل بعد بي...

وره اسبوع مرت عمي  اجت كالت نريد نشتري ذهب ونيشان لان العرس بسع بسع نريده
يعني احتمال هذا الاسبوع نعرس
امي كالت الها وليش مستعجلين
كالت الها والله ابو مهند عمج مستعجل كلش
ابوي سمعها اجه
كالها ام مهند شني بهاء لابين لا اجه منهد الخطبه ماشفناه
شني شو جنه واحد مجبور
مرت عمي وجها كام يطي الوان
كالتله لا والله  مشغول
وتعرف صبغنا الغرفه
وشترينا لخشاب
وشغل هو شغلته هم اتعب
كال ابوي ميخالف يفرغله ساعه ويجي
يكعد وي خطيبته
يتعودون ع بعض
كالت قابل هوو غريب
لو ماشايف جوري
اشو رابين سوه
ان شاءالله  يجي لا تخاف
كالها خير ان شاءالله 

بالليل اجه عمي وبهاء
ابوي صاح علي تعاي بويه كعدي يم خطيبج
جنت لابسه تراكسود تركوازي
وشايله شعري ذيل حصان
اجيت كعد بصف بابا
لابويه  روحي اكعدي يم رجلج
استحيت اكوم
كال كومي
كمت كعدت بصفه
كام ابوي وعمي
كالوا اخذوا راحتكم
طلعوا وسدوا الباب
بفيت مدنكه استحي ارفع راسي
هو بس يتأفئف
تالي كال باعي جوري
من الاخير اكولج
اني احب رواء  ومااحب غيرها
بس شسوي لابوي وامي جبروني عليج

هاي من هسه اكولج مودكولين ماكالج
بقيت مصدومه من صراحته
وللحكاية بقية
ام مصطفى