الحلقه السابعه والعشرون
روايه همس الذكريات
بقلم ✍ سحر فرج
فجاه مسك موبيله وقرر يتصل بريهام ويعترف لها بأحساسه وحبه بل وعشقه ليها .
ورن الموبيل وفضل يرن لحد ما حد رد عليه واتفاجأ جاسر للاسف انها مش ريهام .
بظروفها كانت مامت ريهام معاها فى الاوضه وبيتكلموا على اللى حصل فى الخطوبه .
ام ريهام .. الحمد لله يا ريهام يا بنتى انها عدت على خير .
ريهام .. الحمد لله يا ماما .. وما شاء الله منه كانت طالعه زى القمر . زى الأميرة فى الحواديت .
ام ريهام ... اه الحمد لله كانت زى القمر . وشكل اهل حازم ناس محترمه وكويسه جدا .
ريهام ... اه يا ماما . حماتها ست طيبه اوى وست محترمه وشكلهم يعرفوا فى الاصول والواجب جدا .
ام ريهام .. اه فعلا يا بنتى وحازم شكله شاب ابن حلال ومؤدب واخوه جاسر كمان شكله انسان محترم وابن ناس بس شكل حظه مش كويس ونصيبه وحش وعلى طول عيونه حزينه .
ريهام ... الله اعلم يا ماما ربنا يسهله . بس شكله جرىء اوى.
الام .. ولا جرىء ولا حاجه .
ريهام فهمت تلميح امها وكلامها عن جاسر وحبت تهرب منه .. وقالت لها . عن اذنك هادخل اخد شور سريع كده يا ماما . ولو الموبيل رن ردى عليه حضرتك لا يكون من المستشفى .
ام ريهام .. ماشى يا بنتى بسرعه ما تتاخريش اصل تعبت اوى النهارده وهلكانه وعاوزة اروح انام .
ريهام .. ماشى يا روحى خلاص اتفضلى حضرتك روحى استريحى وانا هاخرج على طول لو رن .
الام .. لا روحى يا حبيبتى خدى شور بسرعه وانا هستناكى متقلقيش .
ريهام قربت من امها وباست اديها وقالت لها ما اتحرمش منك ابدا يا روح قلبى .
وبعدها دخلت على الحمام بعد ما خدت لبس النوم والروب علشان تلبسه بعد الشور .
وبعد شويه موبيلها رن والام اعتقدت أنه من المستشفى ومسكت الموبيل وردت عليه .
الام .. سلامو عليكو .
جاسر ... استغرب من الصوت وعرف أنه مش صوت ريهام وقفل بسرعه الخط .
الام ... الوووو الووووو
ريهام خرجت على صوت كلمه امها وهى بتقول الوووو . وسألتها مين اللى رن .
ريهام .. مين يا ماما اللى رن المستشفى ولا ايه .
الام ... مش عارفه يا بنتى الموبيل رن وعماله اقول الوو بس مفيش حد رد عليا وشكله قفل السكه .
ريهام خدت الموبيل من مامتها وبصت على الرقم اللى اتصل وعرفت أنه نفس الرقم اللى بيرن عليها على طول .
ريهام .... خلاص يا حبيبتى روحى حضرتك استريحى زمانك تعبانه وانا هاسرح شعرى واصلى ركعتين وانام على طول .
