الحلقه ( 34 )
روايه همس الذكريات
بقلم ✍ سحر فرج
جاسر كان وصل على الفندق وهو داخل شاف اللى بيجرى عليه .
حسام ... عمو جاسر انا جيت .
جاسر ... حسام حبيبى .. حمد الله على السلامه .. انا لسه كنت هاتصل على بابا واشوفكم انتم فين دلوقتى .
شادى خدوا بالحضن وقال ... اهلا يا باشا .. احنا جينا اهو من نصف ساعه ويادوبك طلعت امل اوضتها .. وقولت انزل اشوفك هنا ولا هنا .. ايه الاخبار .. والشغل ماشى ازاى .
جاسر بابتسامته المعتادة لشادى ... حمد الله على السلامه يا صاحبى .. ليك وحشه والله .
شادى .. لا اله الا الله .. ما انت لسه قافل فى وشى الموبيل امبارح .. لحقت وحشتك يا هندسه ولا ايه اللى شقلب حالك احكيلى 😉
جاسر .. يا ساتر عليك .. وحشنى لسانك الطويل ده .. امل اخبارها ايه .. ومجبتش الست الوالده ليه معاكم كانت غيرت جو شويه علشان خاطر صحتها .
شادى .. والله اتحيلت عليها اد كده يا جاسر .. بس انت عارف دماغ أمى عامله ازاى .. فافضلت فى الشقه وخليت الشغاله تفضل معاها الكام يوم اللى هانقعدهم هنا .
جاسر .. ماشى يا هندسه .. روح استريح انت والكابتن حسام شويه علشان تفضالى ونشوف اللى ورانا قبل الحفله ونظبط كل حاجه .
شادى .. لا لاااااا انا هاطلع حسام لأمه فوق وانزلك على طول .. انا مش تعبان ولا حاجه .. يالا سلام .
وفعلا شادى ساب جاسر يشوف شغله عقبال لما يطلع حسام لامل .
ريهام ومنه كانوا قاعدين على البحر بيتفرجوا على حازم وباباهم وهما بيلعبوا مع عمر فى البحر .
منه ... احنا لازم انا وانتى ننزل نشترى فستانين حلوين كده علشان الحفله .
ريهام .. لزومه ايه بس يا منه .. نلبس اى حاجه وخلاص .
منه .. نعم يا اختى .. اى حاجه وخلاص ازاى .. انتى عارفه مين هايكون موجود فى الحفله دى .. اكبر روس فى البلد والشرق الأوسط وأوروبا .. ناس كبيرة جدا وجامده ولازم نظهر باحسن صورة .. انتى ناسيه انا هابقى حرم مين ولا ايه .
ريهام بضحكه ناعمه ... لا يا اختى مش ناسيه. بقمارة ما هو اودامى اهو بيلعب فى البحر زى العيال الصغيرة .
منه .. يا سلام يا اختى مش بيلعب مع عمر ابنك برضه .. علشان استاذ جاسر مش فاضيله . . إلا بالحق يا رورو ومن غير ما تقفشى عليا ولا تزعلى .. هو جاسر معجب بيكى 😉
ريهام اتفاجأت بكلام منه وقالت .. انتى ايه اللى خلاكى تقولى كده .. انتى تعرفى حاجه انا مش عرفاها .
منه ... الصراحه يا ريهام يا اختى .. انا وحازم واخدين بالنا اوى من نظراته ليكى اللى كلها حب وشوق ولهفه كده .. بيبقى باين عليه اوى .
