الحلقه 33
روايه همس الذكريات
بقلم ✍ سحر فرج
فضلوا يلفوا فى كل مكان ويتفرجوا على المحلات والمعارض .. وبعدها دخلت عمر لعب فى الملاهى كتير .. واشترت ليه لعب كتير جدا ولبس حلو اوى .. والايس كريم اللى بيعشقه .
وفجاه فى حد جه من ضهرها وحط أيده على كتفها .. وده اللى خلى ريهام تتخض وتلف تشوف مين ده .
منه بضحك .. بتعملوووا ايه يا حلوين هنا .
ريهام ... اخس عليكى يا منه خضتينى والله .
حازم ... سلامتك من الخضه يا دكتورة .. اختك بقى وانتى عارفه هزارها الرخم وجنونها .
منه ... نعم يا استاذ حازم بتقول حاجه .
حازم .. لا يا حبيبتي مفيش اى حاجه هو انا اقدر .. دى الدكتورة ريهام قلبها ضعيف شويه وبتتخض من اقل حاجه .. وبص لعمر وقال .. وايه الحاجات الحلوة دى يا عمورة .
عمر .. ايه رايك يا انكل حازم شوفت مامى جابتلى حاجات اد ايه .
حازم .. حاجات حلوة اوى .. ربنا يخليلك مامى واخت مامى 😉
تعالوا بقى اعزمكم على العشاء زمانكم موتوا من الجوع .
عمر ... عاوز بيتزا
ريهام .. تعالوا نروح ناكل فى الشاليه كفايه كده انا تعبت من كتر اللف .
حازم ... لا يمكن بدام عمر قال بيتزا يبقى بيتزا .. ولسه بدرى اصلا .. وبالمرة اتصل بجاسر يجى يأكل معانا .. زمان الجماعه اللى فى الشاليه ناموا من بدرى .
منه ... فعلا عندك حق يا حازم زمانهم ناموا من بدرى دول مش بتوع سهر خالص .
عمر .. الله انكل جاسر هايجى يقعد معانا .. وحشنى اوى .
حازم .. اى خدمه يا عمر باشا .. تعالوا نروح المطعم واتصل عليه .. يالا بينا يا معلم هات ايدك .
وفعلا خدوا بعضهم وراحوا على المطعم بتاع البيتزا وقعدوا على التربيزة .. واتصل حازم بجاسر .
حازم .. الوووووو جاسر باشا فينك .
جاسر ... اهلا يا حازم خير فى حاجه انا فى الفندق .
حازم ... فندق ايه بس لحد دلوقتى يا هندسه . احنا بقينا نصف الليل وبتصل بيك علشان تيجى تتعشى معانا ونسهر مع بعض كلنا شويه .
جاسر .. أنت فين دلوقتى ومين اللى معاك اصلا .
حازم .. احنا قاعدين فى مطعم بيتزا .. علشان الكابتن عمر عاوز ياكل بيتزا .. ومعايا منه والدكتورة ريهام .. وقولت اتصل عليك انت كمان وتجيلنا ونسهر كلنا مع بعض .
جاسر .. انا مش فاضى يا استاذ انت للكلام بتاعكم ده .. انا عندى افتتاح مشروع كبير خلال ساعات . اسهروا انتم براحتكم يالا سلام .
حازم باستغراب .. ايه ده .. ده قفل فى وشى . ماله الاخ ده قالب كده ليه ؟؟؟
ريهام بحزن ظهر على ملامح وشها بس حاولت تداريه قالت .. هو لسه فى الفندق ولا ايه .
