الحلقه الثانيه
روايه / همس الذكريات
بقلم / سحر فرج
ريهام قامت علشان ترد على اختها وبعد ما قفلت معاها طلعت رقم باباها واتصلت عليه على طول .
ريهام ... السلام عليكم
حبيبى اللى وحشنى .
عامل ايه يا بابا ؟
الاب ... الدكتوره ريهام بنتى حبيبتى .
عامله ايه يا قلبى .
انا كويس الحمد لله يا قلب ابوكى.
اذيك انتى وازى عمر وفريده حبايبى اللى وحشنى اوى .
ريهام ... وانت والله يا بابا انت وماما وحشنى اوى اوى .
مستنيه يوم الجمعه يجى علشان أجلكم انا واسلام ونقضى اليوم كله معاكم .
الاب ... تنوروا يا حبيبتى .
ريهام بتردد قالت ... كنت عاوزة حضرتك فى طلب كده يا بابا وياريت ما تكسفنيش .
الاب باستغراب رد وقال .. عيونى ليكى يا دكتورة ريهام خير يا بنتى فى ايه يا حبيبتى !!
ريهام ... الصراحه يا بابا منه اختى هى اللى عاوزة مش انا .
الاب ... منه طيب ليه هى ما طلبتش منى من غير ما تقولك وتزهجك معاها .
ريهام ... هى عارفه غلاوتى عندك يا حبيبى وعارفه انك مش بترضى تزعلنى ولا هاتكسفنى فى اللى هى عوزاه من حضرتك علشان كده خلتنى انا اكلم حضرتك بالنيابه عنها.
الاب ... خير يا ريهام منه عاوزة ايه يا حبيبتى وموسطاكى فى ايه اصل انا عارفها كويس اوى ؟؟
ريهام ... منه يا بابا عندها رحله تبع الكليه فى شرم الشيخ اربع ايام .. والطلبه كلهم هايروحوا مع بعض .
الاب ... رحله والكليه والطلبه وشرم الشيخ كمان واربع ايام .
يرضيكى انتى يعنى يا ريهام اللى هى عوزاه ده .. البنت دى مش عارف طالعه كده لمين .. انتى اهو عمرك ما طلبتى منى طلب زى كده طول حياتك ولا عمرك زعلتينى فى اى تصرف ليكى .
ريهام ... يا بابا بدام حضرتك واثق فى منه وفى تربيتها وعارف انها هاتقدر تحافظ على نفسها ليه لا .
ليه ما تخلهاش تحس هى بالثقه دى وتخليها تحس انها ادها واودود .. وبعدين الزمن بقى غير الزمن .
الاب ... بس يا ريهام انا بخاف عليها يا بنتى .
منه طايشه ومجنونه وغيرك انتى يا ريهام .
انتى كنتى فى حالك طول فترة الكليه وعمرك ما طلبت منى الطلبات الغريبه اللى هى بتطلبها منى دى .
ريهام ... كل سن وله حياته يا بابا وانا عارفه ومتاكده أن منه شاطره وهاتقدر تخلى بالها من نفسها حتى ولو فى وسط مليون شاب .
المهم حضرتك توافق وما تكسفنيش معاها بقى .
ولا عاوز تكسفنى يا حاج سالم مع منه 🤔
الاب ... خلاص يا ريهام يا بنتى علشان خاطرك انتى بس وانا هأكد عليها انها تخلى بالها من نفسها طول ما هى بعيد عننا .. انتى عارفه غلاوتك عندى اد ايه ومش هاتهونى عليا برضه .
ريهام ... ربنا يخليك لينا يا حبيبى انت وماما ويبارك فى عمركم .
لو سمحت بقى ادينى ماما اسلم عليها واسمع صوتها.
الاب ... حاضر يا دكتورة ثوانى اشوفها خلصت الصلاه ولا لسه .
انتى عارفه انها بتقعد كتير فى الصلى عقبال لما تخلص ..كأنها بتصلى التراويح فى الشهر الكريم.
اديها جت اهى على السيرة خدى معاكى اهى يا حبيبتى .
