حدودك وطني

٣

كان قاعد بعاين لي وانا بكتب يدي كانت بترجف طبعا كتبت معلوماتي الغلط وانو اسمي شيرين و اني دكتوره وكل معلومات الجواز عشان تتطابق .. لما انتهيت ومديت ليهو الورقه اول ماعاين ليها وشاف الاسم رماها في الارض وقال لي انتي مصره يعني! على فكره انا كان ممكن اساعدك اذا انتي قلتي الحقيقه لكن بطريقتك دي اقعدي كده هنا لحدي ما اجي اتصرف معاك .. و طلع خلاني براي في الخيمه ويادوب ما القلق مسكني والتوتر زاد هو ناوي على شنو ماقدرت اعرف بقيت قاعده بس جوه الخيمه دي بعد مسااافه جاني واحد من الجنود شايل الاكل دخلوا لي جوه وطلع .. يادوب استوعبت اني البت الوحييييده وسط الكم الهائل من الرجال ده ! بديت احس بالخوف الرهيييب هسي لو عملوا لي حاجه ! شلت اكلي و اكلتوا لاني كنت جعااانه وبعدها رقدت في الفرشه المفروشه في الارض بعدها سمعت الجنود بقولوا يلا الصلاه المغرب يا شباب .. فتحت الخيمه برااحه كده استرق النظر لبره لقيت الجنود بتوضوا ولقيت مهر بعيد بتوضا بقيت براقب فيهو من بعيد بتوضا لحدي ما كمل وضوهو .. احساس الامان الجاني اتجاه مهر الوقت داك ماعارفه سببو شنو ! عشان اطمئنيت انو بصلي! ولا عشان شفتو و هو بتوضا .. المهم اني يادوب قلبي برد شويه و انا اكتر وحده بحب الصلاه رغم الفيني من اغلاط .. لما كلهم وقفوا اصطفوا للصلاه كان امامهم جندي كبير كده شكلوا برئسهم هو الوقف يئمهم انا اتسحبت وطلعت بره الخيمه شلت من مويتهم و اتوضيت لما هم في الركعه التانيه انا يادوب رجعت الخيمه فتحتا شنطتي وشلت الطرحه والعبايه لبستها و بديت اصلي .. هم كانوا خلصوا صلاه و مهر وهو راجع لقى الخيمه فاتحه .. ختى في راسوا اني اتسحبتا وطلعتا لانو جا جاري بسرعه لما دخل لقاني ساااجده ببكي مشى قعد بعيييد في الخيمه وانتظرني لحدي ما خلصت صلاه وتسبيح  .. اتلفت عليهو بدون كلام وانا بطلع في العبايه وبطبق فيها وبصلح في شعري بنفض فيهو من التراب حسيت بي انو جذورو بتاكل فيني فكيت المشبك وبقيت بحك في فروت راسي مهر كان بعاين لي بعيون للامعه ونظرات غريبه وحلوه في نفس الوقت .. وهو ساكت وبشوف فيني لحدي ماخلصت من شعري و رجعتو لي ورا جيت قعدت مواجههه ليهو قلت ليهو اتفضل ؟ .. زي ربع ساعه مهر ماقتح خشمو معاي بكلمه بعاين لي بابتسامه رايقه شديد بعدها قال لي سبحان الله انتي جميلة خلقه و اخلاق .. مستغرب من انو زوله بتعرف الله و خاشعه كده في صلاتها بتطلع تفك شعرها ! انتي اصولك شنو ؟ من وين انتي ؟ و عايشه وين في السودان .. قلت ليهو سودانيه من السودان وسكتا علين لي تاني وضحك💜 اول مره اشوف الضحكه والابتسامه الجمييله دي .. هو كان بضحك بطريقه شماته في غبائي و انا رغم ده ابتسمت معاهو .. قال لي ايواا يا شيرين انتي مصره ما تقولي حاجه بتخصك .. طيب انا ح اقول ليك حاجه والقرار برجع ليك .. انتي يا تعترفي لي بحقيقتك عشان انا اقدر اساعدك يا تقعدي هنا تنتظري الامر البصدر من اللواء عشان ننفذوا ولحدي الوقت داك انا مابقدر اضمن ليك يحصل ليك شنو .. انتي فريسه وسط اسوود الحوليك ديل كلهم عساكر مامعروف نيتهم شنو اتجاهك .. لحدي الان انتي ما مر عليك ليل هنا .. من وشك  ورغم القوه البتظهري فيها لي دي انتي خوافه .. غالبا الناس البهربو و البجو بالطريقه دي  ماجات فيهم بت سمحه بالطريقه دي .. انا اصريت اجيك هنا كم مره عشان اشوفك براك ولا في زول حاول يدخل الخيمه دي .. ساعديني لاني عايز اساعدك ماتعتبري كلامي ليك ده عشان اخوفك او اصل لمعلوماتك .. لاني قادر اشوف بعد صلاتك دي انتي زوله مسكينه .. الخلاك تعملي كده شنو ؟ هربتي من اهلك ليه؟ .. في اللحظه دي حسيت بالراحه معاهو في الكلام سكت شويه كده وهو رجع لي ورا اتكى في الجلسه وبقى بشرب بالكوز الكبير الكان قاعد جنب القله الخاتينها في الخيمه .. ماعاين لي كتير واتجاهو كان لمدخل الخيمه انا كنت بيمينو بصراحه اول زول ما احس انو دايرني يمكن ده السبب الخلاني اركز معاهو .. بعد مسافه من السكوت قلت ليهو ح تعمل لي شنو؟ قال لي انا ما ح اضرك ح انتظر القرار وانفذوا بس لكن انا خايف عليك لحدي الصباح وانتي مفروض تخافي .. قلت ليهو انا معاي ربنا وما خايفه من راجل فيكم .. عاين لي بنظره حيره وقام على حيلوا و طلع وفعلا من اللحظه ديك بقيت بفكر في كلامو والخوف اتضاعف جواي .. بعد جو تاني لصلاه العشا وقفت اراقب مهر وهو بتوضا من بعيد لما خلص ورفع راسو عينو جات في عيني طوالي قفلت باب الخيمه بعدها انا صليت برضو وقعدت جوه واحد من الجنود كان واقف بره بكورك لي انا ح ادخل قلت ليهو ادخل .. شايل معاهو صحن فيهو اكل برضو وطلع مني .. اكلت شويه وختيت باقيهو بعيد و رقدتا واتغطيت بي بطانيه .. كان في برد شديييييد بالليل سمعت صوت مهر في الباب من بره بقول لي شيرين؟ .. طبعا وانا مدروخه عايزة انوم نسيت اسمي بعد مسافه حتى قلت ليهو نعم قال لي .. انا ح اكون في المكتب الجنب الكتيبه لو في حاجه تعالي لي هناك قلت ليهو طيب ومشى .. جاني فهم انو مهر ده من قبيل عايز يخوفني عشان انا اجيهو بالليل في مكتبو فكرتي عنو طواالي اتغيرت ... يعني كيف يكون بالرزاله دي .. نمت وانا غضبانه منو لاني كرهتو خلاص وعرفت فهمو شنو وانا نايمه نص الليل جاتني صحيه والله بحبني لاني صحيت على صوت اتنين من العساكر جنب الخيمه بتشاورو انا ادخل اول واجرب معاها واذا اتجاوبت بكره دورك وبضحكوا .. رجليني من الخوف ما شالوني بقيت برجف وبعرق عرق كتييير الكويس انو الخيمه عندها مخرجين فتحتا التاني براحه اتسحبت وجريييييت في نص الليل والضلام جريييت وقفت في طريق الغابه ماعرفت ادخل ولا ارجع .. اللحظه ديك ما كان عندي حاجه غير البكا بقيت ببكي براااي ومنهاره من البكا قعدت في الارض ببكي .. الجنود لحدي ما واحد فيهم دخل للخيمه لقاني مافي اتخلعوا طوالي جرو كلموا مهر وهو هنا قلق شديد .. قال ليهم ما ح تكون بعيده من هنا و قسمهم على الاتجاهات عشان يفتشوني اللحظه ديك انا كنت مفكره انو مهر الرسلهم لي عشان انا ماجيتو بالليل و كرهتو زياده ... وهو فكر انوو انا هربت وكنت منتظره الليل عشان اهرب .. بقى بفتش فيني وهو غضبان والعساكر مشوا بعيد .. وهو جايي لاتجاه الغابه بالكشافه بتاعتو سمع صوت البكا سرع خطواتو ووقف بعيد ناداني شيرين ؟ .. لما سمعت صوتو شلت رجليني وجريت و هو جرا بي وراي .. لحدي ما مسكني من يدي بقيت بكورك فيهو فكني ياحيوان يا كلب فكني ياحقير ... كان مخلوع " البت دي مالها وبتبكي مالها ! ..  افتكر انو زول اتعرض لي بقى بقول لي استهدي بالله حصلت ليك حاجه ؟ طوالي ولا اترددت لصقت ليهو كف حاااار قلت ليهو ده الكنت دايرو مني صح ؟ .. هو طواالي ولا اترردد ولصق لي كف حاااار برضو .. قال لي انتي بت كلب .. بعد كفتنا بعض سكتنا مسافه اي زول عايز ياكل التاني بنظراتو .. قلت ليهو رسلت لي جنودكم عشان يجربوني ؟ انت قايلني بت ليل ؟ .. قال لي جنودنا؟ قلت ليهو كانوا واقفين قدام الباب وسمعتهم .. طوالي هو هنا فهمني انا ببكي ليه وهربت ليه وعرف انا قصدي منو ..  بقى بقول استغفر الله العظيم قلت ليهو استغفر اي لسه ما استغفرت .. قال لي ممكن ما تكوركي ! بعدين انا قلت ليك لو في حاجه تعالي لي ماقلت ليك اهربي انتي عارفه الغابه دي مليانه شنو؟ قلت ليهو ما دايره اعرف وخليني عليك الله اموت فيها احسن من اموت في احضانك .. بقى بعاين لي مستغرب وانا بكورك و منفعله شديد قال لي طيب خلينا نرجع واتكلمي هناك .. قلت ليهو ما راجعه اذا عايز تقتلني اقتلني هنا خلاص انا زهجتا وبقيت بنكش في شعري زي المجنونه وبكورك بدون ما احس .. تقريبا جاني انهيار عصبي ممن القلق والخوف مهر ما قدر يتكلم وانا بتجنن كده ضربني في راسي بطوبه اغمى علي طوالي .. بعدها شالني وداني جوه الخيمه كبى لي مويه كتيييره في وشي وراسي لما صحيت و فتحت حسيت بوجع في الراس وما قادره اتكلم .. لكن متذكره الحاصل كلو لما لقيتو قاعد في الخيمه معاي ! قلت ليهو انت مابتخاف الله ! قال لي يا بت انا لو داير اعمل شي زمااااان كان خلصتو  اسكتي ونومي لحدي الصباح القى طريقه ارجعك بيها بلدك .. طوالي قمتا اتنفضتا من السرير ونسيت كل البعمل فيهو قلت ليهو بلدي! انا ماعايزه ارجع السودان عليك الله ما ترجعني وبكيت طوالي ..
مهر : الله يصبرني على المصيبه دي .. هسي بتبكي مالك تنتهي من قصه تبكي في التانيه ؟ ..
قمت من مكاني ومشيت قعدت جنبو .. لفت راسو علي وقلت ليهو عليك الله ما ترجعني .. نزل يدي من حنكو وقال لي ما تتعدي حدودك .. اتهجمت بصراحه راجل يقول لي كده! ده لو الغيرو البره كان ماصدقوا .. قلت ليهو انا اسفه قال لي ارجعي مكانك واقعدي بعيييد مني .. مشيت قعدت واتكتفتا وبقيت بعاين ليهو زي الاطفال الصغار لما يخافوا من زول