حدودك وطني

١٣

ودعني بعد كلامو القالوا و مشى .. خلاني زي تايه بتلفت خلااني😍 كمية السعادة الدخلت قلبي بعد كلامو ده .. اول مره كان احس بالاهتمام من زول و اهتمام انا عارفاهو من ريدة ما من رغبه لحاجه معينه .. دخلت جوه لقيت العفاريت منتظرين و النعاس خلااص غلبهم قلت ليهم بضحكه عاليه مناظركم بتضحك والله انتو مجاهدين قدر ده ليه 😂 قالوا لي تعالي يابت اعملي لينا قهوه نفتح و بعداك احكي قلت ليهم طيب نوموا والصباح بحكي ليكم قالوا لي لا هسي بس .. قلت ليهم طيب ودخلت ظبطت قهوه انا زاتي احترت في نفسي لما ظبطتها بالطريقه دي  و جبتها ليهم قعدنا في السفره التلاته و كبيت ليهم .. سلمى قالت لي يا الله ياسندس عمررري ما شربت قهوه زي دي رجاء قالت ليها عاد لكن ما المزاج عالي كان قلنا ليها قومي نضفي هسي بتقوم تقلب البيت .. قلت ليها والله معاك حق😂😂 بقوم هسي انفضوا ليكم قالت لي كدي احكي يلا حصل شنو ؟ بديت احكي ليهم كنا بنقول في شنو وطبعا الاتنين مجربين الحب قبل كده .. كانوا متحمسات وانا بحكي ليهم وعيونهم بتلمع من الحب و تقريبا اي وحده فيهم كانت شايفه نفسها فيني و شافت حبها جواي و انا بتكلم عن همام لحدي ما قلت ليهم انو بكره ح نطلع سوا نفتش المحل و قالوا لي لااازم طيب تقومي هسي تنومي عشان السهر ما كويس و لاازم نظبطك بكره للطلعه .. قامت سلمى ساقتني غرفتها وطلعت لي بلوزه راااقيه شديد منها باللون الاسود مع بنطلوني الجينز و شبطي العالي اللحمي 😍 اللبسه كانت وااو جدا انا انبهرت فيها .. نمت كأنوا بكره العيد وانا ملابسي في السرير جااهزه لما صحيت الساعه تسعه كانت جريت للحمام واستحميت كده .. جاني تلفون من همام صباح الخير قلت ليهو صباح النور قال لي كيف اصبحتي قلت ليهو بخير وانت قال لي تمام والله انا متحرك عليك برضو ساعه و نص كده عشان اصلك تمام ؟ قلت ليهو تمام وقفلت الخط .. طبعا في اضاني اليمين سلمى و اضاني الشمال رجاء بسمعوا فينا😂😂 قلت ليهم الوقت قررب وانا لسه .. قالوا لي ما تتوتري بنحضرك سرييع  سريييع قومي البسي وتعالي اقعدي لينا لبست كل حاجاتي وعملت كريم مرطب و بدرة جسم معطرة بالورد .. و جيت قعدت لي سلمى عملت لي ميك اب نهاري حلو و احمر خدود خفيف و قلوس شفايف فيهو لمعه .. لاحظت لانو سلمى بتفهم في الميك اب شديييد و رجاء بتظبط الشعر بطريقه رهييبه قلت ليهم يا بنات انتو ليه ما لاحظتو للحاجه دي قبل كده قالوا لي شنو بصوت وااحد ؟ قلت ليهم نجهز عرايس ! الاتنين عاينوا لي بعض وضحكوا .. قالوا لي والله انتي مانصيحه القروش دي ماكله راسك تفكيرك كلو بزنس😂😂 قلت ليهم عواليق خلاص دي الحاله بفكر فيكم ياسجم قالوا لي كدي انتي انتهي من موضوع المحل و بنتفاهم بالمساء قلت ليهن والله الموضوع ده يجيب لينا قروش تجهيز عرايس في الكوفير يا بنات ! رجاء سرحت كده وكانت ماسكه المكوه بتفرد في شعري بعد عملت ليهو استشوار قلت ليها يا اختنا انتبهي قبل ما تحرقي لي راس مالي ده 😏 قالت لي والله انتي داهيه الفكره دي بتجيب قروش خرااافيه اتخيلي ياسلمى مكياج العروسه بكم ح يكون و انا ح اعمل الشعر وسندس ح تلبس العروسه  الفستان .. متخيله الحاجات دي هنا غاليه كيف .. سلمى عاينت لي كده بنظرة جاده قالت لي بس انا ما بظبط رسمه الحواجب قلت ليها انا بظبطها لاني اساسا برسم قالت لي والله يازوله اتوكلنا على الله .  رجاء رفعت لي شعري كعكعه نازله منها خصل كده و لبستني خناق رفييييع جدا ذهبي و همام اتصل وانا بلبس في الشبط .. قال لي انا بره قمت اتعطرت بالعطر كتير شعري بي فوق و ملابسي و كلي .. قلت ليهم تطلعوا تسلموا عليهو ؟ قالوا لي هسي خليو وقت تاني بنلاقيهو .. لما قربت للباب و بودع فيهم رجاء قالت لي سندس! و قفت قلت ليها نعم قالت لي قربي و ختت يدها في راسي قرت لي قرآن و حصنتني و هي بتقرا لي في القرآن حسيت بكميه من الراحه و حسيت بحنية رجاء جاني شعور كأنها امي لما خلصت و باستني في راسي جاتني رغبه في البكا بس مسكت نفسي و حضنتها لما هي استغربت وضحكت قالت لي مالك يا بت قلت ليها انا برييدك شديد و بستها في راسها و ختيت ليهم التلفون لانو كان وااحد الطالعه فينا بتشيلو قلت ليهم لو عايزين حاجه دقوا لي في رقم همام تمام .. قالوا لي يلا تمام وطلعت لي همام لقيتو واقف بره العربيه متكل بعلين للساعه لابس جينز و تشيرت ابيض والعضلات كانت بتفتن😍 وقفت قداموا و لاحظ للعطر قال لي سندس ورفع راسو .. قلت ليهو اهلين قال لي متعطره كده ليه ؟ قلت ليهو بصره وش مالو عطري قال لي حلو والله بس تاني ما تكتريهو قلت ليهو وعشان شنو ؟ قال لي لأنو بسكر ❤ قعدت اضحك و قلت ليهو يلا طيب و مشيت ركبت قدام معاهو واتحركنا .. كل ما نلقى استوب بتلفت يعاين لي و يبتسم بي وجناتو دي 💟 لحدي ما وصلنا جنب البحر الكورنيش في محل بتاع فطاير و شيبس نفس الاكلت منو مع رجاء .. قال لي فطاير الزول ده جربتيها؟ قلت ليهو اي حلووه شدييييد قال لي ما جربتها انا لكن جعان لاني ما اكلت من امبارح غير كيكتكم قلت ليهو طيب ارح ونزلنا .. الجو لانو شتاء البحر بااارد و هاااديء مافي ناس اشترينا كم صحن كده بتاع فطاير بالشيبس والصوص كنت بضحك فؤهو لانو الجوعه ظاهره من الصحانى الكتيره الاشتريناها و مشينا قعدنا جنب البحر .. قلت ياريت لو عارفه نفسي ح اقعد هناك كانت اتخميت بي بطانيه مش كمي ال حدو كوعي بس 💔 قعدنا قريب بنتفرج في البحر و بناكل قال لي بردتي ؟ قلت ليهو لا بابتسامه وانا من جوه البرد قتلني قال لي طيب دقيقه برضو هناك كان في عربيه بتاعت شاي و قهوه في كبابي ورق مش جاب لينا كبايتين كبار شاي وجا قعد .. يادوب حتى دفيت شويه بقينا بنعلق على البحر كل ما الموجه تقوم ونضحك و نتشارط انو الموجه ح تقرب لينا و ماتقرب ونضحك برضو .. باقي صحنين من طلبنا شلناهم و مشينا ركبنا دورنا العربيه في الطريق همام شاف بت صغيره سوريه قاعده بتبيع مناديل في الارض وقف ونزل اداها الصحنين ديل و قروش .. طبعا البت انبسطت بطريقه ماعاديه وجا راجع الطريق كلو انا فرحتي ظاااهره من وشي بيهو كل ما هو يتلخم ولا يتلفت لحاجه بسرق النظر والمحو و في جواي كلمه بريدك كتيييره قاعده نفسها تطلع لحدي ما وصلنا للزول بتاع المحل قعدنا معاهو و طلب لينا عصير .. بقيت بشرح ليهو عايزين المحل بسعر كم و لشنو و بوصف بي يديني .. همام قاعد في الكرسي المقابل وشي كان ببتسم لي الوقت كلو وبعاين فيني .. لما جينا طالعين و اتفقنا مع المحل وقال من بكره ممكن نكتب العقد وندفع لاايجاره المحل عجبني لانو نضييييف و حلو عباره عن غرفتين كبار فاتحين في بعض و نصهم صاله طويله و بي بره صاله فيها مكتب بي كرسي و جنب المكتب حمام و بفتح المحل للشارع طوالي .. شكلو كان عياده او ماشابه و صانوهو بس بقى حاجه رهيبه والاحلى من كده سعرو .. لانو بعرف همام نزل لينا المحل شديد بعد خلصنا منو كان الوقت بدري الساعه اتنين ضهر قال لي الضهر اذن بس انتي ح تصلي كيف ؟ اللحظه دي اتحرجت فعلا من لبسي ما اتوقعتو يسالني سؤال زي ده قلت ليهو ماعارفه .. قال لي اركبي طيب و ساقني وهو ساكت لحدي ما وصلنا محل ولا نزل منو قال لي انزلي شوفي عبايه مقاسك نزلتا وانا ساكته دخلت جوه قلت ليهة وين العبايات اشرت لي ومشيت اعزل لي وحده .. اللحظه دي سلمى ضربت لي في رقم همام و رد عليها هو .. اول ما سمعو صوتو الاتنين فتحو الاسبيكر😂💔 همام ؟ قال ليها ايوه رجاء كيفك؟ قالت ليهو انا سلمى قال ليها ايوااا سلمى كيفك ! قالت ليهو تمام قال ليها سندس دي بعيدة بس مني قالت ليهو ما مشكله ح تتاخرو ؟ قال ليها لا ان شاء الله .. لفحت التلفون رجاء وقالت ليهو هماام البت دي امانه عندك تخلي لي بالك منها كووويس سمعتني .. قعد يضحك فيها وقال ليها جوه عيوني .. سلمى لكزتها بيدها وقالت ليها ده شنو البتقولي فيهو ده 😏 هسي الولد يقول بندخل فيهو .. رجاء معروفه انها مابتركز بدل ترد لي سلمى بهمس ردت بصوت عاالي في التلفون لهمام .. لالا ما تخافي ما بقول نحنا بندخل فيهم بعدين هم ناس واعيين .. همام ماقدر يمسك نفسو وضحك😂 قال ليها والله ارجعها ليكم سااالمه .. رجاء ما عرفت تودي وشها وين وقفلت الخط وبقت سلمى تضحك فيها وهي بتقول ليها فضحتينا الله يفضحك .. لما جيت انا طالعه لقيت همام بضحك براهو! دقيت ليهو القزاز زعلانه وصاره طبعا خرب لي لبستي و هو بضحك براهو .. نزل قزاز وعاين لي نظرتو المره دي كانت مختلفه وكأنوا بقول لي انتي حلاتك.كده 💟 قال لي قمررر وربنا يحفظك قلت ليهو انا خلصت مامعاي قروش .. قال لي و لو معاك تفتكري ح اخليك تدفعي انتي ؟ ونزل مشى دخل للبت انا ركبت ولسه ماده بوزي لحدي ما جا وركب ابيت افتح معاهو خشمي .. بعد التسريحه و اللبسه والاناقه ديك يخربها لي ب عبايه ..ولافه طرحتي وصلنا جامع وقال لي ننزل نصلي الظهر قلت ليهو بعد نصلي رجعني طوالي ومشيت منو .. عرفني من طريقة كلامي زهجت عاين لي ومشى اي واحد صلى و جينا راجعين تاني للعربيه ركبت و برضو ماده بوزي .. قلت ليهو يلا نرجع قال لي تمام و اتحركنا طبعا انا ما حافظه الشوارع و هو ماشي كان في شارع تاني و انا قايله انو نحنا راجعين .. فجأة وقفنا في شارع و قال لي انزلي قلت ليهو ده شنو ؟ قال لي انزلي بس .. نزلت معاهو ..

#