حدودك وطني

٥

في عربيه الصباح ح تطلع تمشي العاصمه انتي ح تطلعي معاهم بدون ما يسألوك .. انا اتفقت مع ضابط اسمو احمد هو الح يطلع بالعربيه وفهمتو انك شغاله مع بت ما كويسه و هو ح يوصلك ليها ونحنا بعدها ح نلقاك عشان نستفيد منك اعتقد انك فاهماني ! يعني هو ح يساعدك عشان يلقى يوم معاك بس ما عارف انك ح تهربي بعدها ح تصلي هناك اول محطه ح تقيف فيها العربيه ح تهربي منها ومدا لي ورقه فيها رقم تلفون قال لي اول ما تصلي هناك تتصلي لي رقم البت دي هي بت ما كويسه لكن ح تقعدي معاها يومين في بيتها ما تحاولي تتدخلي في حياتها او تسألي من حاجه بتخصها بعد اليومين ديل احمد ح يرجع ليك بعد يومين عشان يسال من البت الانتي قاعده معاها لكن ما ح يلقاك .. انا فهمتو انك ح تهربي لكن هو يخليك ويراقبك لحدي ماتصلي للبيت داك بعدها يخليك يومين وكل مره يراقبك وبعدها يرجع ليك .. انتي ح تهربي فعلا لكن قبل اليوم التاني يخلص ح تكوني طلعتي من البيت ح تمشي لي ضابط اسمو عثمان انا كاتب ليك رقمو برضو ح اديك قروش من هنا عشان تتصلي من اقرب تلفون تلقيهو عثمان ده صحبي وهو بعرف المكان الانتي ح تقيفي فيهو ح يجي يسوقك و يوديك  لي امي و اختي انا ح اتصل واكلمهم من هنا انو انا مرسل ليهم شغاله جابها عثمان عشان دايما هو بجيب لينا الشغالات .. ح تقعدي معاهم وتشتغلي تنضفي البيت لمدة اسبوعين كده امي ح تديك مصاريف الاسبوعين .. الهدف انو يكون عندك قروش بتكفيك انا ح اوري امي من هنا تديك كم بالضبط .. و حافهمهم انك ما بتتكلمي عربي ويتكلموا معاك بالاشاره ح اوريهم انك اسبانيه لانو ملامحك بتوحي لي كده .. تقريبا مافي زول ح يشك بانك سودانيه بعد تتمي الاسبوعين وامي تصرفك القروش ..ح تلمي حاجاتك و تضربي لي عثمان يجي يسوقك ح يقول لي ناس امي انو اخوك اتصل وقال انك مسافره اسبانيا ولازم ترجعي عشان يطلعك من بيتنا .. بعد يطلعك من البيت ح يوصلك العاصمه  طرابلس بعدها يا سندس ح تنسي كل الارقام العندك وتمسحيها من ذاكرتك وتنسي انك بتعرفيني تمام ! كده ح اكون دخلتك ليبيا العايزة تدخليها دي .. وتتصرفي بطريقتك بعداك تمام ! .. قلت ليهو تمام اوعدك اني ما ح اتعرض ليك بعد اصل للعاصمه قال لي تمام يلا جهزي حاجاتك للصباح ان شاء الله .  فعلا طوالي بديت الملم حاجاتي ومنتظره الصباح يجي بفاارغ الصبر .. لما الصباح جا و انا مستعده ومتحمسه فعلا ركبت العربيه بالدس و العربيه اتحركت قبل ما اشوف همام 😭 كنت متوقعه اني الاقيهو قبل ما اسافر بس ما جا كان  في المكتب .. اتحركنا لحدي ما وصلنا لاول محطه كان كاتب لي اسمها فعلا هربت او عملت فيها هربت و اتصلت على البت ردت علي من صوتها عرفتها بت ما تمام كان اسمها شغف ..  اتسائلتا عن العلاقه البتربط همام ببنت زي دي بس ما ركزت كتير مع الموضوع البت جاتني و مشيت معاها بيتها فعلا الضابط احمد اختفى بعد كده ..  البت جات وسلمت علي و وصلنا للبيت دخلتو وانا متوتره لانو عارفه نفسي داخله بيت شنو ! بس زي ماوصاني همام ما اسأل من اي تفصيله في حياتها وما احاول اتدخل فيها كانت نظراتها مريبه بالنسبه لي حسستني انها عايزة تعرف مني اذا ح اشتغل معاها ولا لا .. حاولت اتجنبها و دخلت الغرفه النزلتني فيها قعدت يومي كلو جوه الغرفه دي بسمع الباب بفتح و يقفل بس منو ما بعرف .. بقيت متوتره لحدي ما جا الليل 😑 وكان اسوء ليل يمر علي رقدت وانا خايفه اصحى الصباح ما القى نفسي زي ما انا .. الساعه اتنين صباحا سمعت جرس الباب وبعد شويه صوت راجل فتح الباب بالمفتاح ! طيب دق الجرس عشان ينبهني ! معناها الزول ده عارف بوجودي بعد شويه سمعت صوتها بتسلم على زول و بتسالوا اتاخرتا ليه ! كان بقول ليها انتظرت مرتي لما نامت ! الزول طلع متزوج !! النوم غلبني بعداك وانا قاعده جنب غرفه عاارفه بحصل فيها شنو .. بقت بتضحك ضحكه مسخره وهي بتقول ليهو طيب مدام بتخاف من مرتك البجيبك عندي شنو ! بعد شويه بقوا بضحكوا الاتنين وتاني اصواتهم اختفت .. فتحت الباب براااحه اتاوق اشوفهم مشو وين لقيتهم واقفين جنب باب الغرفه التانيه و منظرهم كعب شديييد وهي بتقفل في الباب .. قفلت بابي براحه وانا برجف وبقيت بستغفر .. جريت اتوضيت جوه الغرفه بالمويه الجابتها لي للشراب وبقيت بصلي .. اقمت الليل كلو لحدي ما الصبح جا وصليتو ونمتا .. صحيت زي الضهر كده من التعب ما حسيت بي اي شي لما صحيت اتذكرت الحصل امبارح طوالي قمت اتنفضتا ومشيت الحمام و جيت صليت بعدها طلعت للصاله وبقيت بنادي عليها شغف! جاتني قالت لي صباح الخير .. قلت ليها صباح النور وانا بعاين لي شكلها وهي بتعاين لي ولشعري و لجسمي ! قالت لي جعانه! قلت ليها ايوه .. دخلت المطبخ جابت لي سندوتش و ختتو مع الشاي قالت لي انا طالعه طبعا لما اجي ح القاك مافي! قلت ليها ايوه قالت لي لو محتاجه لشغل وريني؟ قلت ليها لا شكرا .. و طلعت كل كلامي معاها كان محدود بعد طلعت عاينت للاكل وانا عارفه انو مال حرام ! ياخ انا بقلل في كمية الحاجات الحرام الفي حياتي ليه كل حاجه سيئه مصره تلازمني .. مشيت جدعتو بالشباك للعصافير و قعدت جعانه بطني بتقرص فيني لحدي العصر كده طلعت من البيت واتصلت لعثمان عشان يجي يسوقني .. فعلا بعد طلوعي من البيت الضابط احمد جا يشوفني في البيت مع شغف ولقاني مافي ونواياهو ما كانت سليمه .. لما جا عثمةن وسلم علي كان زول محترم زي همام🎀 الاحترام كان ظاااهر فيهو سلم علي و ركبني في العربيه قلت ليهو انا جعانه وح اموت من الجوع .. وقفني في مطعم واشترى لي اكل بقيت بامل زي الشرفانة .. لي يومين ما ماكله حاجه بسبب شغف استغرب من طريقة اكلي وهجومي على الاكل بس انا الوقت داك ما واعيه لي اي حاجه اكلت بشرف شديييد و كانوا اول مرة اشوف اكل .. هناك همام كان اتصل لي اختو وكلمها انو في شغاله جديدة اسمها سيلا ح تجي تشتغل و كلمها اني ما بعرف انجليزي او عربي واني اسبانيه .. لازم يتعاملوا معاي بالاشارة بس .. طبعا عثمان بعد شاف حالتي و بهدلتي دي قال لي لازم نمشي للسوق عشان ام همام ما تستغرب من شكلك .. وداني هناك واشترى لي قميص ابيض واسكيرت اسود لحدي بعد الركبه بشويه .. قال لي ادخلي حمام المول اتجهزي وانا منتظرك برة .. دخلت استحميت نضييييف لانو كان لي خمسه ايام ما مستحميه ليشت الملابس الانيقه دي و سرحت شعري كعكه لفوق .. اشتريت ميك اب بسيط و براي جوه الحمام شلت وشي و حواجبي واتظبطت واتمكيجت و اتعطرت و طلعو بره اخترت جزمه كلاسيك راقيه .. عثمان لما شافني قعد يضحك وقال لي سبحان مغير الاحوال من سودانيه بقيتي اسبانيه بحق و حقيقه .. اشترى لي اربعه طقوم بنفس الطريقه وشرح لي انو الناس هنا بهتمو بالمظهر ولازم اكون انيقه ونظيفه عشان اقدر اشتغل حتى لو خدامه .. طول الطريق انا ساكته وهو بتكلم عن ليبيا والسودان والاوضاع في كل الدولتين وبقارن بالحياه هنا و هناك والناس ومعاناتهم .. بقيت بسمع وانا سااكته لحدي ما وصلنا بيت همام .. ما توقعت همام يكون زول عز كدة! اتوقعتو انسان بسيط شغال في الجيش ماعندهم حاجه .. اتخلعت لما شفت البيت الفخم العايش فيهو نزلت وانا منبهرة .. عثمان دخلني جوه للبيت ودخل قدامي سلم على امو في راسها وعلى اخت همام اسمها هند كانت جميييله جمال ماعادي وامو كانت اجمل من بنتها ومعاهم بنت تانيه ما عرفتها منو بس قلت احتمال اختو لانها بنفس الجمال .. سلموا على عثمان بشوق وبقوا بسالوا فيهو عن اخبارو وكده كانوا قاعدين في حوش الحديقه البره و عثمان شبه اتلخم بالونسه معاهم التلاته و نساني .. بقى بسال عن الخاله الماني وهند والبت الاسمها لين .. لما بعد مسافه انتبه لي قال لي اتفضلي يا سيلا  .. لقيتهم التلاته اتلفتو بعاينو لي بقيت ماشه برااحه برااحه من الارتباك وقفت قدامهم وابتسمت وهزيت براسي نظام اهلا .. كلهم ابتسموا لي و هزو راسهم برضو عشان مافي لغه بينا مشتركه .. ام همام قالت لي عثمان ماشاء الله البت الجميييييله دي كانت شغاله وين ! قال ليها كانت شغاله في مطعم و خلت الشغل .. اخت همام هند قالت ليهو بتكون عملت مشاكل بجمالها ده انا هنا ابتسمت .. كنت عايزة اضحك لقيت عثمان حمر لي نظام الناس ماعارفين انك بتتكلمي عربي .. طوالي كتمت الضحكه .. امو ابتسمت لي تاني وبصراحه ياهمام امك زولة بتتراد وبتخش القلب طوالي بوشها البشوش و روحها المرحه ... عثمان قال لي : دي ماما اماني الام الكبيره .. دي هند ماما الصغيره بقى بأشر كاني ما فاهماهو و انا بهز براسي بس وببتسم وهم بعاينو لي 😂 .. قال لي و دي ماما الصغيره برضو لين دي خطيبة بابا همام .. هنا انصدمتا ونططت عيوني وكان ظاهر في وشي .. همام طلع خاطب😭