حدودك وطني

١٠

قلت ليها العشاء جاهز قالت لي طيب قايمه و شقشت دموعها وطلعنا انا وسلمى ل رجاء بره من سكات .. اتعشينا سوا و كنت بعاين ل سلمى و احنا بناكل كانت ساكته و رجاء بتونس فينا لحدي ما خلصنا عشاء قمت لملمت الصحانه و مشيت للمطبخ اغسلهم بعد خلصت منهم ودخلت للصاله اتفرج في التلفزيون معاهم رجاء قالت لينا بنات انا نعست و دخلت جوه تنوم بقيت قاعده بتفرج بعد شويه جات سلمى بسجارتها قعدت بعيد في السفره حمرت ليها و واصلت تلفزيون .. بعد مسافه بعد ماخلصت سجارتها وطفتها جات قعدت قدامي واتربعت وشالت الريموت قفلت التلفزيون و قالت لي سندس انا اسفه .. قلت ليها ما حصل شي عايزه احضر ممكن؟ قالت لي سندس انا اسفه قلت ليها خلاص غلطانه انا اساسا من البداية انتي مادايره زول يدخل فيك ومن الليله ما ح اتدخل فيك لو لقيتك بتبكي دم .. قالت لي الغنيه دي بتذكرني بي حسام .. عاينت ليها باستفهام؟ قالت لي حسام راجلي اتزوجنا بعد خلصت الجامعه بعد سنه مرض بي كبد وبائي و اتوفى .. الدنيا ضلمت في وشي و حسيت بي اني ح اموت وراهو .. حسام كان بالنسبه لي الاهل و كل شي .. لما لقيتها بدت تحكي انتبهت معاها و سكتا اسمعها .. قالت لي بقيت ببلع حبوب مهدئه و بنوم بيها و بعدها عرفت درب الخرشات و تاني ما فكيتها لحدي ماجات فتره مرضت في السودان وماقدرو يعالجوني العلاج كان غالي .. و ابوي متوفي وانا وحيدة عند امي روحي وصلت للموت وماكان في زول بساعدنا لا اهل امي ولا اهل ابوي و ظروفنا كانت كعبه شديييد ووضعنا كعب .. امي حست بالعجز انو بتشوف بتها قدامها و ماقادره تعمل شي عشانها و حزنها من اهلها و عدم وقفتهم معاها و قلقها على الح يحصل لي كلهم اتسببوا في موتها .. بعد اتوفت انا يادوب حسيت بقيمه الفقد الدنيا ضلمت في وشي اكتر و حسيت يادوب بالوحده في دنياي و الوجع .. فقدت راجلي و امي و ابوي و كلهم راحوا ومافضل لي شي في الدنيا .. قلت ليها ربنا يرحمهم و يغفر ليهم و طبعا استمريتي في الادمان صح ؟ قالت لي لا بالعكس الظروف دي خلتني اتنازل عنو والغريبه القوه جاتني واصريت اخلي المخدرات .. بقيت بعود نفسي بالسجاره العادية و كل فتره بقلل عدد السيجاير .. انتي جيتي لقيتي احسن انا كنت اليوم كلووو بسجر قلت ليها وجيتي هنا ليه ! قالت لي و السبب البخليني اقعد هناك شنو ؟ اهلي الخذلوني؟ ولا الظروف القتلت امي؟ قلت ليها و هربتي؟ قالت لي اي جيت هنا و اتلاقيت مع رجاء كنا مهربين في نفس اليوم و اتعرفنا على بعض و عشنا بعداك .. قلت ليها ايواا عشان كده ساعدتو بعض اي وحده مرت بظروف و عانت شديييد بصراحه اول مره احس انو الأنا فيهو احسن من ناس كتااار .. الحمد لله الماشفت اهل احتاج ليهم و يخذلوني و الحمد لله الما عندي ناس حبيتهم وخلوني .. قالت لي مصيرك يجي يوم ويكون عندك زول عزيز عليك و زول تحسي الدنيا من غيرو عدم .. و قامت قاات لي ماشه انوم تصبحي على خير ماتساهري ورانا شغل بكره..
صباحنا كان مختلف المره دي 🍃 حاسين بي راحه اتجاه بعضنا و اي وحده بقت عارفه حكاية التانيه .. قمت من الصباح بفكر في همام و انا ماقادره انسى تفاصيل الزول ده و على سيرة الحب امبارح حسيت انو انا عندي زول فاقداهو .. مروا شهرين كمان وحياتنا الروتينيه زي ماهي بس بقينا بنتونس و نفطر سوا و نتغدا و نتعشا ولغينا فكره التلاجه المقسمه بقينا بنخت الاكل بدون اسامي و حجوزات😂😂 و سلمى بقت تتحسن وتقلل من السيجاير .. غيرنا جدولنا شويه و بقينا يوم الخميس بنطلع التلاته سوا مشوار .. و يوم الاتنين والاربع والسبت لللزومبا بالليل كده التلاته برانا .. طلع كل وحده فينا بدا يتغير واولهم انا بقيت بضحك كتير و بهظر وبشاغل و بمشي الشغل مبسوطه مع سلمى وبرجع معاها مبسوطه .. سلمى كانت اقرب وحده لي في العمر فرقنا من بعض خمسه سنين .. لكن رجاء فرقي منها ١١ سنه .. كنت كأني اختهم الصغيره و رجاء عايشه دور الام .. كانت بتقسم بينا الملابس بالايام و هي بقت بتطبخ لينا يوم الجمعه بالحلل وتدخلهم التلاجه .. الراتب بتشال منو الايجار والباقي ليك .. بدينا نعيش دور الاسره و اتغيرنا شدييد و اي وحده بدت تغير في التانيه بعد سته شهور من قعادنا مع بعض كنا خلاص ألفنا على بعض .. انا بديت احس بالحنيه اتجاه رجاء و سلمى و كأنهم اهلي بكون عيانة سلمى بتعمل لي نعناع مغلي و تجي رجاء تغطيني و كل دقيقه وحده تدخل الغرفه علي تسالني بقيتي كيف ! .. احساس الاسره والام و الاخت ادوني ليهو رجاء و سلمى امورنا نحنا كانت كويسه بس امور الشغل بدت تدهور .. المطعم بدا يتدهور تاني و قرر محمد العم الكبير يقفلو ! انا وسلمى لما عرفنا بالخبر راسنا ضرب .. ده كان دخلنا الوحيد و هسي ح نتصرف كيف لكن ! استمرينا نفتش في شغل و لشهرين ورا بعض ما لاقيين .. رجاء كانت بتدفع الايجار كلو و  كنا الفتره ديك بس بناكل رز و عدس لانو الدنيا شتا و مامعانا قروش .. لحدي ما جاتني الفكره ! قعدت رجاء و سلمى في السفره و قلت ليهم .. اسمعووني هنا نحنا التلاته بنعرف نعمل الدلكه السودانيه و الريحه .. وطبعا اليبيات بموتوا في الحاجه دي و نفسهم فيها ... من بكره نجيب حاجاتنا بي باقي قروش من رجاء و نعمل الدلكه اول و نعرضها .. سلمى قالت لي نعرضها وين يا الشاطره ؟ قلت ليها في الشارع ! قالت لي الشارع ؟ قلت ليها جنب السوق الشارع الداخل على السوق نشيل التربيزة و نختها و نعرضها قالت لي فكره والله لكن بتظبط ؟ قلت ليها وليه ما تظبط نعرض كم يوم ورا بعض و بعدها نكتب عنوان بيتنا للزباين يجو يشلو من هنا تاني .. و لما يجو ح نكون جهزنا غرفتي و غرفتك  نفصل السراير الاتنين من بعض في كل غرفه و نخت  كراسي السفره بره .. كل الحاجات المهمه نختها في غرفه رجاء .. لما يجو يستلموا الدلكه ح نوريهم انو عندنا حنه سودانيه .. حتى السودانيات الهنا ح يسمعوا بينا و ح يجوا و ح نرفع اسعار الحاجات دي .. عشان نتفادى ناس الضرايب الشغل جوه بيتنا .. لقيتهم الاتنين بعلينو لي وانا بتكلم قالوا لي انتي متاكده ما قريتي جامعه بمخك الواسع ده ! قلت ليهم الشارع بعلم اكتر من كده .. و استنينا لحدي ما الصباح جا مشينا السوق جبنا الحاجات و عملناها و رجاء كانت بتدينا في التعليمات .. لما خلصنا نهاية اليوم جا .. اليوم البعدو شلنا التربيزة و مشينا السوق  و فعلا بدينا نعرض فيها .. انا امسحها في يدي و اعركها و اليبيات يجو يسالوا و كانت سلمى بتتكلم ليبي كويس و انجليزي كويس .. كانت بتشرح للناس انها حتجه بتفتح اللون و بتخليهو ينضف بتشيل الاوساخ و البكتريا والفطريات من الجلد .. وطبعا الابتسامه لهناك لما يعرفوا كده😂😂 .. بتوريهم انها طريقه سودانيه للنضافه والتفتيح .. مروا علينا سودانيات و اشتروا و كلمناهم بالحنه .. انا كنت بعرف ارسم لاني اساسا برسم الانيمات بس ماخبيره في الرسم شديييد .. كل الاشتروا اديناهم عنوان البيت .. استمرينا تلاته ايام في السوق كده في الشارع ساي و بعدها وقفنا غبنا يومين و الناس بدت تسأل مننا لحدي ما عرفوا عنوان البيت و بدوا يجوا البيت .. بدينا نحنن و ننرسم و نصبغ الشعر .. الشغل كان متعب علينا انا وسلمى برانا واليوم كلو مافي راحه ومرات رجاء بتجي المغرب كده وطوالي بتكون مدت يدها تساعد تصبغ شعر او ترسم يد ولا تعمل وش و حواجب .. كنا منتهييين شديد بنرقد نزوم ونصحى تاني يوم .. الشغل مشى معانا كويس و اشترينا استشوار و مكوه للشعر و شبه قلبنا البيت لكوفير اشتغلنا كويس شديييد و القروش كانت ماشه في يدنا زي الرز .. لحدي ماقفلنا سته شهور تاني من شغلنا ده كنت انا تميت سنه في ليبيا و عدت سريييع زي الهوا .. ناس الضرايب عرفوا بينا و جونا البيت و ده الما كنت متوقعاهو😭 ادونا خطاب من القسم القرييب لينا انو تاني ممنوع نمارس الشغل جوه  البيت و الا دي مخالفه لازم نفتح محل .. بدينا نفتش في محل يكون صغير وما غالي سلمى فتشت معاي لاسبوع و مرضت بعدها بالتهاب .. المسؤوليه بقت علي رجاء بتطلع لشغلها وبترجع بدري وانا بطلع افتش في المحلات القريبه واسأل .. كان عندي تلفون صغير بس حايمه بيهو فيهو ارقام رجاء وسلمى بس و من ضمن الارقام اتذكرت انو انا كان عندي رقم عثمان ..نزلت من المواصلات و رجعت البيت فتشت ملابسي و شنطتي و كل حاجاتي ما لقيتو .. مشيت لسلمى في غرفتها وسألتها سلمى كان في رقم كاتباهو في ورقه كبيييره؟  لكن ما رميتو متاكده قالت لي ما شفتو ياسندس ؟ .. انتظرت رجاء تجي من شغلها واول ماجات  وفتحت الباب  قلت ليها رجاء بسرعه الحقيني في رقم باسم عثمان في ورقه رسم بيضا كبيييره انا مارميتو كان في شنط هدومي و ينو ؟ ثالت لي كدي قولي بسم الله بتين جيت .. غايتو انا ما هبشت حاجاتك من دخلتي البيت .. لما قالت كده قنعت وقعدت في نص الكنبه متمحنه قلت ليها خلاص ورقة الحظ العندنا ضاعت😭 .. قالت لي عثمان ده منو ! قلت ليها زول كان ح يساعدنا نلقى محل قالت لي حاجه زي دي مفروض تهتمي بيهة وما تجدعيها ساي .. فقدت الامل خلاص اني القى رقم عثمان تاني و الم فيهو .. دخلت غرفتي زعلانه و قفلتها علي في الحقيقه احساس الزعل الجاني الوقت داك ماعشان عثمان بس .. يمكن لاني حسيت انو تاني مافي حاجه ح تلمني بهمام .. 😭😭😭