حدودك وطني

١٥

قال لي شيرين❤ و ضحك .. قلت ليهو ايييك ياخ لسه متذكر كمان قال لي من اول يوم شفتك عرفت انك وحده مستهبله و كذابه كمان😂😂 قلت ليهو دي عادتي من زمااان يا زول غير الكذب ماعندي شي للناس .. قال لي هو انتي ح توريني قلت ليهو حيوان ده  شفت زمان كان حابيني واحد في الدار معانا كنا صغار في سنه تامنه كل ما اجي الولد يعمل لي فيها روميو و يشاغل يوم كنت اساسا زهجانه منو و معاي صحبتي حنان دييك الهربت وخلتني قلت ليها بس الولد الكلب ده لازم ندقوا ..انتظرنا نهايه اليوم و هو طالع و كالعاده لازم يعمل فيها قيس و يلحقني شلت حجار من الارض واول ما ناداني سندس شلت الحجار و بقت بفلع فيهو بقى بكورك يا مجنونه انتي متخلفه وبتغطى بالشنطه بتاعتو .. حنان الكلبه بقت بتضحك بس لما الحجار خلصت ما عرفت امشي وين الكلبه من زمااان خاينه😂 شالت رجلينها و هربت مني .. خلتني بتلفت براي و بس الولد قام على حيلو و لملم الحجار وقلت خلاص الليله ح يرجموني قلت ليهو ياود الحرام نزل الحجار دي و ابقى راجل بس و افلعني .. الولد ضحك و ضحك وقعد في الارض يضحك قال لي كلنا هنا اولاد حرام لكن 😂😂 انا زاتي بقيت بضحك لما انتبهت لنفسي بنبز فيهو و بنبز في روحي .. و طبعا استغليت الضحكه وجريت خليتو يضحك زي الاهبل براهو .. همام كان بضحك وانا بحكي ليهو قال لي من زمان مجنونه يعني 😂😂 قلت ليهو مره برضو طلعنا انا و حنان كان نفسنا في حفله و هناك ما بخلونا نطلع .. بالليل حنكنا بتاع الحرس و طلعنا مشينا عرس الوقت داك عمري ١٨ سنه لابسين قصير و فاكين الشعر الصاله الدخلناها مابنعرف زول فيها اللهم عرس والسلام .. سلمنا على الناس و قعدنا جابوا لينا اتعشينا و شربنا البارد ولا كانوا حاصل شي و فجأة تظهر لينا وحده هناك من الدار معانا ابتسمنا ليها وقلت لي حنان صحي اولاد حرام 😂😂 بعد شويه لقينا الصاله نصها بنات من الدار خاشين زي حلاتنا كده لما انتهى العرس اتلمينا كلنا زي عشره بنات واتصورنا و جينا طالعين مشينا اتنين ورجعنا سيره😂😂 الشارع كلو بنضحك في بعض .. همام قال لي والله صحي ما نصيحه انتي قعدنا شويه كده سكات و بعد كده مسك اصبعي الصغير تاني باصبعو السبابه 🙈 قال لي انتي جميله كده ليه ياخ بتسحري الروح ❤ اقول ليك سر يا سندس .. امبارح انا كنت عارف اني زعلتك بس ما رضيت ارد عليك في التلفون لاني كنت زعلان منك للاخر وانتي ماعارفه السبب .. لما جينا نركب العربيه من البحر بتاع الفطاير كان بعاين ليك نظرتو دي قتلتني من جوه حسيت بيهو عايز ياكلك بس .. ماقدرت امسك نفسي والغضب الجواي كان ممكن يخليني اقتلوا سالتك من الصلاه عشان اعملها حجه ليك عشان تتستري وعرفت انك متضايقه بس ماحبيت ابرر ليك موقفي قلت ليهو البخليك تضايق شنو طيب لما شفت الراجل بعاين لي ؟ قال لي لاني حسيت انك حاجه بتخصني براي و حقتي ❤ حسيت انو الزول ده عايز يعتدي على حاجتي او يتعدى حدود وطني .. وهو بتكلم انا شفت في عيونو حنيه و خوف و حب ماشفتو في زول قبل كده سكتا عشان هو يتم كلاموا .. و بعدها قلت ليهو والاحساس الجاك ده مش مفروض يجي لحاجه هي فعلا حقتك وقف على حيلو و قام اتحرك و تاني وقف و قبل عاين لي قال لي انا بريدك ❤ انا دايرك تكوني حقتي براي تكوني مرتي و وطني❤ عايز احافظ عليك من عيون الناس و من العالم البره ده كلو عايز اديك الحنيه الجوااي و اكون بيتك و تكوني ست البيت❤ .. طبعا التوتر الجاني اللحظه ديك ماعرفت اعمل شنو او ارد بشنو وكويس انو قام حتى اتكلم مني بعيد لاني كان ممكن اتهور تاني 😂 سكت وعاين لي منتظر مني رد وانا كاني خرستا ماقدرت افتح خشمي بحرف قلت ليهو همام انا ماعارفه والله ارد اقول ليك شنو انت فاجئتني .. جا اتربع قدامي و مسك يدي كلها ضماها بي يدينو الاتنين و قال لي بالعربي الواضح طيب موافقه بي ؟ بتحبيني؟ دايراني في حياتك؟ موافقه تشاركيني بقية عمري و اكمل بيك نص ديني؟ بحلقتا فيهو زيادة ونططت عيوني قلت ليهو همام بخلعه .. قال لي اي انا بطلب في يدك منك انتي زاتك لانو ماعندي حل غير كده والله و ضحك .. ضحكني كمان ورديت ليهو بخجل نفسي اجيب بنت منك و اسميها حنين ❤ ماعرفت كيف اتمالكتا نفسي والجمله طلعت مني قلت ليهو انا برييدك اكتر من ما انت بترييدني والله .. الفرحه كانت في عيونو باينه لما سمع ردي وكيف اكون ما بحبو ياخ اساسا سؤالوا غبي في وحده ما بتحب همام ! .. قال لي سندس و قبل ما يتم كلامو الباب فتح والعفاريت ديلك رزعوا الباب و قطعوا كلامنا السمح كالعاده .. سلمى قالت لي شكلنا جينا في وقت غلط صاح يا رجاء .. همام قال ليهم العفو ياخ وقام سلم عليهم الاتنين قال لي رجاء اتشرفت بمعرفتك قالت ليهو وانا اسعد بشوفتك .. قبل علي وقمتا اتنفض من مكاني قلت ليهم اها جبتو الحاجات بي ابتسامه عريييضه الاتنين استغربوا فيني البت دي مبسوطه كده مالها .. قالوا لي ايوه .. همام قال لينا طيب انا استأذن واخليكم تشوفو شغلكم حسيت بي انو راجلي وبودع فيهو ياخ ❤ احساس الامان انو في زول في الدنيا شايل همك معاك ده براهو احساس عظيم .. طلع و قفلت الباب و صرختا ليهم يابناااات ما شفتو  طبعا هو سمعني بره بصرخ ضحك ومشى ركب ودور .. وطوالي بديت احكي و ارص ليهم في الحصل مما هم مشوا و خلونا فرحتهم معاي كانت زياده لي فرحتي خصوصا رجاء الاتحرمت من حبها حست كانو هي في مكاني.. بعدها قمنا ظبطنا المحل ورتبنا الحاجات ونحنا مبسوطين .. تلاته ايام بنرتب و بنكتب في الحاجات والاسعار و كانت المفاجأة من همام .. اليوم التالت من الترتيب كنا ماشين التلاته الصباح للمحل واول ماوصلنا لقنا لافته كبيرره معلقه فوق عنوانها " كوافير ريحة بلدنا " و تحتو .. استشوار .. فرد .. حنام زيت ..  حنه .. مبيعات سودانيه .. تجهيز عرايس .. رسم بنات .. مكوة سيراميك .. و تجهيز شباين و مكياج عادي .. مشاط سوداني .. و رقمي تحت .. دخلنا المحل لقينا عدة حمام الزيت .. زي تلاته كده قاعدات جوه .. عرفت الحاجة دي وراها همام طوالي شلت رقمي و اتصلت عليهو قلت ليهو همام ده شنو .. قال لي كنت عارفكم ح تاخدوا وقت وتتشاكلوا في اسم المحل فاخترت الاسم ده وان شاء الله يكون عجبك .. قلت ليهو همام و الحاجات الجبتها ؟ همام الحاجات دي غاليه ! قال لي مافي حاجه غاليه عليك بعدين انا عايز اكون في كل تفاصيل حياتك عندي بصمه .. قلت ليهو انت قاعد في يومي كلو بس ما كان في داعي للصرف ده .. قال لي سندس خليك هسي من الكلام ده وشوفي شغلك قلت ليهو لازم نتكلم فيهو .. قال لي خلاص لحدي بعدين انا هسي مشغول وانتي وراك شغلك قلت ليهو طيب قال لي في حاجه مهمه كان مفروض اكتبها فوق في اللافته  قلت ليهو شنو تاني ؟ قال لي .. هنا تعمل حبيبة قلب همام و معذبته في نفس الوقت .. ضحكت وخجلت وقلت ليهو وبرضو نسيت حاجه قال لي شنو ؟ قلت ليهو .. هنا تعمل البت البتريدني شدييييد ❤قال لي وانا بريييدك اكتر والله .. بعدها بدينا في الشغل التلاته الزباين الكانوا بتصلوا علينا وعارفين بينا جونا طوالي لما عرفوا بالمحل وده غير الناس القريبين .. المحل مشى كويس شدييد و تجهيز العرايس كان بدهل لينا قروش هائل .. فعلا سلمى كانت بتمكيج حلو و بدت باسعار بسيطه و انا كنت بلبس و رجاء بتسرح ده غير الشغل التاني .. يوم الجمعه زاتو بقينا بنعمل فيهو الحاجات السودانيه من دلكه وبخور وريحه وغيرو ... ودي اكتر حاجه مشت هناك .. رجاء اضطرت تبكل شغلها عشان الشغل كتر علينا واساسا وظيفتها كانت شايله الراتب بس مننا .. التلاته ختينا يدنا في يد بعض وبقينا بنشتغل صباح ومساء بنرجع للنوم بس .. همام كان بتكلم معاي بالتلفون بس و اسبوعين ما اتلاقينا بعدها كلمني انو راجع للحدود اسبوع و ح يرجع .. مالقيت طريقه مع زحمه الشغل اني الاقيهو و ودعني بالتلفون بس 💔 اتلخمنا تاني في الشغل الكتير المرهق بس القروش الكان بدخلها كانت بتبسط الزول من جووه الروح .. عدى اسبوع و همام ما رجع و ما كان عندو تلفون هناك .بالي انشغل عنو بس قلت اكيد ح يكون بخير بقيت بدعي ربنا يحفظو بس .. سلمى بقت تسجر مرتين بس في اليوم والحاجه دي كانت باسطاني شديد منها و بقت بتخت طرحه في راسها .. وبدت تتأثر بي رجاء و بي تغير سلمى فرحني لانو انا اكتر وحده مجربه التغير لما يكون للاحسن .. و شويه شويه سلمى بدت تتعدل في الصلاه و تحافظ عليها .. بصراحه التلاته كنا ماشيين في الطريق للاحسن بقينا نطلع من البيت التلاته لابسين عباياتنا و لافين طرحنا .. ويمكن ده السبب الوسع لينا الرزق❤ بنصلي جماعه هناك في الكوافير و بنرجع سوا بالمساء بنفتح قرآن في البيت و الجمعه لازم كل وحده تفتح مصحفها .. احساس الراحه ده ما جا الا لما سلمى اتغيرت والبيت كلو بقى ماشي بنفس النهج و الطمأنينة .. مر شهر وهمام مامنو خبر و بديت افقدو و اقلق عليهو والمشكله انو مافي حل غير الانتظار لانو انا في بيتهم كنت عارفن اهلو زاتهم ما بتكلموا معاهو الا يرجع من الحدود .. لاول مره احس بالقلق لبعد زول مني ! ايامنا ما كانت كتيره مع بعض بس كل المشاعر كنت بحس بيها اتجاهو هو بس براهو .. بعد الشهر سمعنا في الاخبار انو في ضرب في الحدود من تشاديين داخلين تهريب و عندهم اسلحه و حصل ضرب رصاص على الحدود .. الاخبار ككلها كانت بتتكلم عن الضرب و القلق زاااد عندي💔 بقيت ما فاهمه شي لي يومي بس بقرا و بدعي انو ما يكون حصل ليهو شي و ديل شهرين عدوا .. اتمنيت لو كنت ودعتو قبل ما يسافر وخفت انو ما اكون ودعتو وده اخر وداع .. تفكيري كلو كان في انو خلاص حصل ليهو حاجه .. رجاء وسلمى كانوا بطمنوا فيني انو ما ح يحصل شي واقوي قلبي و اتمسك بالدعاء بس .. في يوم السبت بعد رجعت من الشغل و فتحت التلفزيون سمعت انو في جنود ماتوا ؟ احساسي اتخدر خلاص ما عرفت اتحرك .. كانت جنبي سلمى و قربت انهار بس هي مسكتني وبقت بتقول لي يابت اوعك تفقدي الامل في الله .. همام كويس وماعندو شي اووعك تخافي .. بعاين فيها وانا خلاص اتخدرتا و حسيت بي انو همام حصل ليهو شي .. جات رجاء طالعه من الغرفه وكانت ماسكه تلفوني و هي بتبكي وجايه علي 💔 منظرها ده و هي جايه اكد لي انو حصل شي و همام مات وعثمان ضرب يوريني .. ماقدرت اتمالك نفسي قبل ما تصلني اغمى علي ..