حدودك وطني

٦

لما عرفت انو خاطب جاني احساس زعل ولا حسد و لا كره لي لين دي غايتو احساس ما مفهوم بس قلت انا جايبيني هنا لي حاجه معينة وبعدها ح اطلع منهم .. هند ساقتني للغرفه ورتني ليها وقعدت ياااخ اخيييرا قعدت لي في مكان زي المكان ياخ 😍 رتبت هدومي و طلعت لي اماني امو بره .. ساقتني فرجتني على البيت و ورتني حاجات النضافه كلها شلت الحاجات و بديت اشتغل في سكات لحدي ما عثمان طلع و هنا واصلت نضافتي لحدي الضهر كدة دخلت الحمام في غرفتي اتوضيت للصلاه طلعت بره لقيت هند في الصاله في مرجيحه كده راقيه . ياسلام ياخ على حيااة العز و الرفاهيه كنت بتتمرجح وبتحرك في رجليها وماسكه تلفونها وبتتبسم للتلفون ماعرفت الفت انتباهها كيف مشيت وقفت قدامها وبقيت باشر ليها بحركه الله اكبر عشان تديني مصلايه .. سالتني انتي مسلمه ؟ هزيت بي راسي بابتسامه وعرفتني كازت مستغربه وهي بتمد لي المصلايه وقالت لي خليها معاك في الغرفه ... بقت مراقباني لحدي ما دخلت ووقفت ولبست العبايه .. استغرابها ده مافهمتو عشان شنو بالضبط يمكن عشان انا ما بعرف عربي ولا عشان اسبانيه ولا ماعارفاها مالها كانت .. بعد صليت طلعت لي بره اكمل نضافه جات لين البت المحظوووظه في الدنيا بي همام قالت لي تعالي معاي فوق سالتها هند عشان شنو ! قالت ليها تنضف غرفتي و غرفة همام !! انا اندهشت بصراحه اكتر! هي خطيبتو ولا مرتو ! ... مشيت معاها فوق نضفت غرفتها براها .. بعدها قالت لي دي غرفه همام نضفيها كووويس لانها كانت مقفوله بديت انضف فيها وهي مراقباني لحدي ما جات امو وهي بتنادي فيها لين لين ! .. لقتنا في غرفه همام ردت عليها ايوة ياخالتي .. قالت ليها اتصلي لي امك دي اتاخرت وعارفه اننا عايزين نخبز لانو باقي لينا بس الاسبوع ده لجيت ولدي .. لين قالت ليها تمام ياخالتو ما تقلقي هسي بشوفها وين .. من السمعتو فهمتا انو لين خطيبتو هي بت خالتو وانها بتقعد معاهم لما يكون هو مافي مرات مرات و غرفتها جنب غرفتو في الطابق الفوق .. بس ماعرفت اذا همام عندو اخو وماقالو لي ولا شنو بقيت بنضف وهي فضلت تراقبني لحدي ماخلصتا نزلت معاها وهي مشت لي هند .. لما دخلت غرفتي يادوووب شلت نفس وفكيت شعري من الكعكه الرسميه دي و اتنفستا .. ده بقى روتيني اليومي اصحى انضف و ادخل غرفتي اتنفس بعد داك ما كان عندي تلفون في يدي ولا اي وسيله تطلعني بره الا انتظر جيت عثمان .. لين كانت قاعده الوقت دة كلو معاهم و في يوم الجمعه جاتني ساقتني لغرفه همام عشان انضفها والمرة دي خلتني برااي فيها و قالت لي طلعي الملابس عشان تغسليها وتكويها كنت بهز براسي وببتسم بس.. شلت الحاجات و بديت انضف  فيها و اطلع في الملابس من ضمنها كان في البوم صور و الشمار حرقني عشان اشوفو من بره كان مكتوب عليهو همامي🎀 بديت افتح و اتفرج فيهو لقيت صور همام وهو صغير و لما دخل الروضه والمدرسه والجامعه .. ولما اتولدت اختو وكل تفاصيلو في البوم نهاية كل صوره كان في شرح مبسط للصورة .. حتى دخلتو العسكريه و تخرجوا منها كان كلو مصور ومكتوب .. صورو في البيت وهو بشرب في الشاي و صورو وهو برش في الشجر .. بعاين للصور بفرحة ماقدرت افهمها زاتي فرحه عشان شنو بالضبط .. لحدي ما وصلت صور خطوبتو شفت اول صورة وتاني صورة وقفلتها بضيق .. مشاعري دي ما قادره احددها هي شنو ! اول مره احس بالفرح والضيق في نفس الوقت ! و عشان زول ! .. لميت الالبوم ورجعتو مكانوا و شلت الملابس و طلعت بره ختيتها في الغساله و بديت اغسل فيها و اشرها .. لنهاية اليوم كنت بكوي فيها واليوم داك تعبت بالجد و هم كانوا مرتاحييين طبعا الشغل كلو علي حتى ام لين الجات ما بتعمل شي ولا اختو .. حتى لما ادخل اصلي كلهم مستغربين مني! وانا عرفت استغرابهم كان عشان شنو ..  لا ام لين ولا اختو ولا خطيبتو كانوا ملتزمين بالصلاه .. بس ام همام الكانت بتصلي الخمسه صلوات اما البقية بقطعوها او بالاصح ممكن يوم كامل ما يركعوا ولا ركعه .. انتهى اليوم المرهق بكل تفاصيلو وصحيت لليوم البعدو بعد اتجهزت وبرفع في شعري سمعت جرس الباب برن و طبعا انا ما بفتح الا تجيني تعليمات من الهوانم ديل .. بعد شويه سمعت صوت لين بتصرخ صرخة فرحه حبييييبي !! انا كنت جوه الغرفه مستغربه هي بتتكلم مع منو .. بعدها كان في جوطه و حمد لله على سلامتك واشتقنا ليك .. عرفت انو الزول الخبزو ليهو ده جا .. فتحت باب الغرفه القاهو همام ! همام زاتو وشايل شنطتو و بسلم على امو .. استغربتا لانو ما كان ضمن الخطه اني اشوفو تاني وانا باقي لي اسبوع ومفروض اطلع هو ماقال لي كده ولا عثمان جاني ! قلت في سري ياربي معقول يزعل لو شافني قاعدة ؟ .. طبعا عايزة اتكلم لكن ما قادره بقيت بعاين ليهم من سكات وهو لسه ماشافني .. لين كانت واقفه جنبو كانها مرتو مادايره تزح ولا سنت لحدي ما همام اتلفت علي وشافني قال لي السلام عليكم .. طبعا قربت ارد 😂😂👊 هزيت بي راسي مبتسمه وهو ابتسم في شكل ضحكه .. لين قالت ليهو يلا حبيبي اطلع غير ملابسك وارتاح عشان السفره طويله .. كمت بعاين ليها بطريقه مستفزة من دلعها وحنكشتها البتعمل فيها ليهو .. شلت حاجاتي و مشيت انضف .. هو طلع قوق لقى الغرفه نضيييفه طبعا بسببي ..  بعد خلصت نضافه لحدي المساء باعتبار دوامي خلص باكل وبدخل لغرفتي .. ديل يادوب نزلوا الصاله يتونسو و هند كان صوتها عالي لازم تضحك وتصرخ ... ماقدرت انوم لحدي ما طفطفو و اي زول مشى لغرفتو .. الصباح بعد صليت و لبست لبسي الرسمي طلعت بره لقيتهم مافي عررفتهم نايمين بسبب سهرتهم الطووويله الامس وانهم ما بهتمو بصلاة الصبح حاضر ... كانت عاجباني المرجيحه بتاعت هند مشيت قعدت فيها واستغليت فرصه نومهم دي فكيت شعري يتهوا و قلعت الجزمه وبقيت حفيانه بتمرجح و بعاين لخلخالي 💜 بدون ما اشعر بحركه اي زول نازل فجأة احس بي زول من وراي بقول لي ايامك ياخ .. اتلفت مخلوعه هماام ! قال لي بضحكه ماتنسي انك صمه و بكمه وعمياء .. قلت ليهو خلعتني ضحك كده ضحكتو البتفتن ديك ياخ 🙈 .. قال لي صباح الخير قلت ليهو صباح النور .. لما الصباح يبدا من زول انتي احساسك معاهو غير عن كل الناس هنا بس بتسمى صباح الخير .. قعد في التربيزه قدامي وانا لسه بتمرجح قال لي ارتحتي هنا! قلت ليهو ايوه .. قال لي سندس طبعا انا ما كان في حساباتي ارجع بس حصل ظرف خلاني ارجع االشهر ده هنا .. قلت ليهو ما مشكله اساسا ده بيتك يعني .. نحنا مش عند اتفاقنا ! قال لي طبعا الاسبوع الجاي عثمان ح يجي يسوقك من هنا .. قلت ليهو تمام  تمام تمام .. وانا بردد في تمام راجعه للمرجيحه عشان اسند ضهري فيها وبهز برجلي هو كان بعاين لي بنظرات اعجاب لما اتسندتا غمضت عيوني وانا بلف في شعري بي اصبعي لحدي نهاية الشعره الطويله وتاني برجع بلفها .. الحركه دي نعستني انا و فتنت همام💜 بقى ماقادر يشيل عيونو مني .. لحدي ما انا غفيت في المرجيحه و رجلي وقفت و حجلي بقى مابعمل صوت .. همام لسه كان قاعد بعاين فيني وفي ملامحي وشعري و حجلي وانا نمت .. وهو بعاين كده جات لين نازله من فوق ما انتبه لنزلتها لما شافت المنظر اتخلعت وبصوت عالي نادتو همااام !! هو زاتو اتخلع لانو كان سرحان فيني .. قال ليها بسم الله مالك ! شفتي شيطان! قالت ليهو البقعدك هناك شنو ؟ و دي قاعده هنا بتعمل في شنو ! ونزلت سريع من السلم جاتني هزت لي المرجيحه صحيت بخلعة  .. همام نهرها بصوت عالي لين ! ده شنو ! .. قمتا مخلوعة نزلت طوالي من المرجيحة ولفيت شعري سريع .. كانت بتعاين لي بكمية من الغضب والحقد ولو في يدها تقص شعري من فوق وتنتهي منو .. همام قال ليها مالك! قالت لي : انتي جابوك عشان تشتغلي ولا عشان تتمرجحي! .. طبعا ماممكن ارد عليها لانها ست البيت ولانني مابتكلم عربي .. فهزيت براسي لتحت نظام اسفه .. قالت لي اطلعي فوق للمطبخ وجهزي الساي لي ناس امي قبل ما يصحو .. هزيت ليها بنعم و طلعت طوالي فوق بالسلالم .. من وراي همام قال ليها بتتكلمي معاها كده لي ! قالت ليهو وانت بتعاين للخدم ليه ؟ .. لما سمعت كلمتها دي وقفت نص السلم ماقدرت اتم العبره خنقتني اتلفت ل تحت وعيني جات في همام ونظراتو كانت اعتذار عن الكلمه دي لي .. طريقة اسلوبها القالت بيهو الكلمه حاجه ما نسيتها لي لين ابدا .. كملت للمطبخ و مشيت يومي عادي .. الساعة وحده صباحا بعد ما هم ناموا كلهم سمعت صوت همام بره غرفتي سندس افتحي .. فتحت ل همام دخل وقفل الباب وراهو سريع .. قلت ليهو خير! وانا زعلانه والزعل ظاهر فيني .. قال لي جاي عشان اعتذر منك عن القالتوا لين .. قلت ليهو ما حصل شي واصلا قالت الحق قال لي لا ده م حق انتي ما خدامه قلت ليهو الموضوع ما بفرق معاي وخليها تقول العايزاهو يومين وح اغور من وشها الفقر ده .. طبعا نسيت نفسي وانا بنبذ فيها بعد شوية اتلفت لي همام القاهو بعاين لي منطط عيونو بتنبذي خطيبتي جنبي ! قلت ليهو نسيتك ياخ😂😂 وبقيت بضحك .. قال لي ده المطلوب اساسا ! عاينت ليهو بنظرة ريدة ياخ .. الزول ده نزل من فوق الساعه دي عشان يشوف ضحكتي ؟ كمية الانسانيه الفيهو ياخ .. جا طالع مني وقال لي تصبحي على خير قلت ليهو تلاقي الخير وهو بمد لي يدو قال لي شيرين تاني ضحكتا وقلت ليهو مهر .. لما شال يدو مني لقيت كت كات في يدي قلت ليهو دي شنو؟ قال لي مخدرات  وغمز و مشى .. قفلت الباب وانا اول مره في حياتي كلها اتبسط كده احساس الفرحه الجاني مع همام ده والشكولاته الجابها ترضيه لي ومعاملتو دي سبب كافي لسعادتي .. صحيت تاني يوم مبسوووطه نسيت كل عمايل لين وبقيت ماشغاله بالبتعملوا لي .. بشتغل و بنضف و بخلص كان باقي تلاته ايام وعثمان يجيني .. اليوم الاول فيهم بعد ما نضفت وانتهيت طلعت لغرفه همام فوق بقيت بنضف فيها زي اول و اشيل الملابس واكويها لانو هو كان بره البيت مع لين طلعوا يتغدوا لما رجعوا كنت منتهيه من التعب و هم كانوا منتهيين جوا داخلين الساعه عشره مساء لما شفتهم دخلوا مع بعض وهي مشت لغرفتها فوق جاني احساس شين عديل .. كان نفسي اقتلها اللحظه ديك .. ماعارفه ليه بقيت حاقدة وحاسده للدرجه دي؟ .  كانها شالت مني همام .. مشاعري كانت جايطه وكتيره فيها حب وكره وغيره وحقد وحسد .. المهم اني بقيت بحس يعني؟ و عندي مشاعر ما زي زمان .. وخايفه اخسر زول ؟ .. زعلت لما شفتهم مع بعض وهو بهظر معاها بالطريقه دي اتمنيتها تموت وتختفي من حياتي وهمام يبقى لي .. و هنا جاني السؤال انا بحبو !!! .. ماقدرت اجاوب غلى نفسي بي اني بحبو لاني عارفه نفسي شنو و هو شنو .. ايه المصير لما الارض تتمنى يوم عشق السماء !! دي كنت انا مع همام .. من الزعله حسيت بنفسي مخنوقه وبما انو الناس كلهم فوق طلعت الحديقه بي ورا بتاعتهم فكيت شعري و طلعت الجكت وبقيت بي اسكيرتي المسطر بالأزرق والابيض القصير البعد الركبة و بلوزتي البيضاء الربع كم .. قاعده براي في و مدخله رجليني في حوض السباحه بتاعهم و غضبانه .. ماقدرت اسيطر على غضبي اللحظه ديك و بهز في رجليني في المويه عملت صوت ..همام منشباك غرفتو فوق عاين لي بهز بالسرعه دي ... نزل لتحت وجا واقف بعاين لي من سكات لحدي ما اتلفت عليهو و عاينت ليهو بحقد كده .. قال لي المره الفاتت حجلك والمره دي المويه .. رجلك دي غضبانه مالها ! .. و قاعدة في الضلام مالك ؟ هسي لو جااك ثعبان! قلت ليهو بزعله مافي ثعبان .. ضحك وقال لي صاره مالك ! لحدي اللحظه ديك ما كان منتبه اني لابسه ربع كم .  لما قمت من مكاني ووقفت شاف اسكيرتيني قصير وبلوزتي! قال لي ما عارفه انو البيت فيهو راجل ؟ .. عرفنا شعرك لابسه كده مالك ؟ وهو بتكلم ما اشتغلت بالكلام البقول فيهو ... كنت تعبانه ومرهقه من الشغل و زعلانه وكاتمه جواي الزعل عشان شفتهم سوا وعارفه ومتاكده انو ما ح يكون حقي في يوم .. لما اتكلم معاي في اللبس انفجرتا بالبكا ودموعي نزلت .. هو استغرب لانو الموضوع ماببكي بس هو ماكان جوا قلبي عشان يعرف السبب الخلاني ابكي قدر دة شنو ! .. بقى بقول لي سندس ! اسف والله ما قصدي انبهك عشان تبكي .. معليش .. وهو بتكلم معاي ماعارفه السبب الخلاني امشي اقرب عليهو و احضنو شنو ! نسيت اي شي في الدنيا و قربت منو على حضنو و ضميتو .. السبب الخلاني اعمل كده شنو ما عارفاهو .. حضنتو وانا ببكي و شديييد وبعدها قمت منو عاينت ليهو في عيونو و مشيت .. هو لحدي ما اتحركت كان مستغرب من الحضن و من الدموع !