حدودك وطني

٤

جا الصباح ولما طلعت من خيمتي .. منتظره الح يحصل لي شنو ! لقيت مهر ماشي وجاي وماشي وجاي بفكر جنب مكتبو شلت هم يرجعني السودان فعلا .. دخلت جوه متوتره لما جابوا لي الشاي ماقدرت اشربوا كان يوم من اصعب الايام في حياتي كنت منتظره مهر يجي يوريني الح يحصل .. بعد قعدتي طولت براي شلت الشاي وجغمتو بالعافيه بعد انتهيت منو كده جا مهر داخل قال لي السلام عليكم .. رديت ليهو وعليكم السلام قرب وقعد في الجلسه وقال لي شيرين اللواء قال ترجعي الليله السودان في الباخره الح تطلع من العاصمه لازم تكوني متجهزة الساعه عشره ح يسوقوك ب العربيه للعاصمه ومن هناك ح يعملوا ليك اجراءات الخروج ح يرافقك جندي مننا لحدي السودان ويوصلوك هناك ح يودوك بعدها لحرس الحدود وهم ح يتصرفوا معاك .. قلت ليهو مهر ما ترجعني انا كلمتك ما دايره ارجع السودان وبديت ابكي طوالي .. قال لي شيرين قشي دموعك دي و اسكتي انا كلمتك امبارح القرار ال ح يصلني انا ح انفذو ما عندي طريقه غير كده .. قلت ليهو طيب لو وريتك اي شي ح تساعدني؟ قال لي اتكلمي طيب!.. عشان اشوف انا بقدر اساعدك ولا لا ..
قلت ليهو انا جايه من المايقوما .. فاقدت ابوين او زي ما بقولوا لينا في السودان اولاد حرام .. ما عندي هويه عشان اوريك ليها اتعلمت لحدي الثانوي ووقفت .. البنات مننا بعرسوا الاولاد الزينا لانو الناس البره عايزين مننا حاجه وحده .. اي انا جيت بطريقه حرام للدنيا ولليبيا .. بس انا ما عندي نيه اعمل حاجه حرام .. انا بصلي وبصوم بعد مظهري ده .. هربت لهنا عشان اشتغل شغل كويس واسس حياتي براي انا ما عندي لا اهل ولا قبيله .. ما بنتمي لي اي زول حتى السودان ما بعتبرو وطني .. اتهنت فيهو بسبب العقول المتخلفه شفت فيهو ايام كلها سواد وعلاقات حرام كتييره و شغل كل غش وفساد بطريقه خفيه ما ظاهره في العلن ولسه ماشي للاسوء .. وطن كلو مآسي وقصص بتقطع القلب لما خلاني قاااسيه اتجاه اي زول .. انا ماعندي ذرة حنيه لاي زول في الدنيا دي ولا يوم اتمنيت اشوف اهلي والاقيهم خاته دايما الصوره الكعبه لاي زول .. لما هربت جيت مع صحبتي وهي من خوفها على نفسها مشت بالباخره وغيرت الخطه عشان ما تقع في خطر والمصيبه انها غدرت بي ! خلتني نزلت تحت و سافرت .. يعني ياتو وطن العايز ترجعني ليهو انت ؟ الوطن ده تراب و اهل و ذكريات و قصص حلوه عشتها فيهو و اصحاب و احزان و وقفات مع بعض وريحه بلد .. الوطن الانت بتتكلم عنو ده ما عندي ! انا كل الحاجات دي فاقداها في السودان .. جيت افتش عن حياه جديده يمكن هنا القى المستقبل والقروش بس برضو ما ح القى الوطن .. انا ما عندي مكان بضمني ك وطن انا زوله متفردة بنفسها بس لقيت نفسي براي و ح اموت براي .. انا سندس يا مهر وما اسمي شيرين الاسم ده سمتني ليهو امي لما جابتني هناك ليهم وكانت كاتباهو في الورقه في فرشتي قدام الباب .. بس لما كبرت سميت نفسي سندس و بقى ماشي على كل الناس .. اما الولد الساعدنا للتهريب ف هو زاتو ما عارف اسمي سندس .. هسي انت عارف اي حاجه بتخصني و انا ماعايزه ارجع للبلد الكلها هموم ومآسي دي انت عشان ماعارف الناس عايشسن كيف هناك .. ما بتطلع الشارع او بالاصح ماجيت من الشارع زينا ..  ماعارف الناس بعانوا كيف عشان يلقوا حق الاكل وماعارف اي شي بقى بطرد فينا من السودان وانك كل ما تحلم بي حاجه تاني يوم حلمك ينهار قدامك وماتقدر تفتح خشمك بكلمه .. مهر انت لو ماعايز تساعدني اقتلني احسن لكن ما ترجعني لي بلد اي زول فيها بفتش على عيب التاني عشان يزلوا بيهو و اي زول بفتش على غلط في التاني عشان يعيش كل عمرو بهين فيهو ... مهر كان ساااكت وهو بعاين وبسمع فيني بتكلم وبحرك في يديني والعبره خانقاني قال لي رغم الكنت متخيلو عنك هسي ماقادر اصدق انك انتي كده .. مد لي يدو و سلم وقال لي انا الضابط همام بس الاسم ده اسم العائله ..  صدقيني احترامي ليك زاد يا سندس انا ح اساعدك تطلعي الليله من هنا .. امبارح لما خفتي زول يضرك عرفت انك عندك اخلاق ..كتار البتقبضو هنا وبعملوا كده في سبيل انو يدخلوا ليبيا وعلى فكره صحبتك حنان اتقبضت امبارح في وقتها ورجعت السودان بقيت الاجراءات بنفذوها العساكر هناك يعني نحنا ح نرجع بس .. قلت ليهو طيب انا ح يحصل لي شنو همام ؟ قال لي اول حاجه دايرها منك تثقي فيني وما تختي في راسك اني ح اغدر بيك لانك لو فكرتي في حاجه زي دي ح نضر بعضنا .. قلت ليهو ح تدخلني ليبيا يعني؟ قال لي ح ادخلك لكن اديني اليوم ده عشان افكر كيف اطلعك من هنا وديل كلهم عرفوا موضوعك لحدي م اجيك راجع اوعك تعتبي باب الخيمه متفقين؟
قلت ليهو تمام متفقين .. طلع مني وبقيت منتظراهو لحدي المساء متلهفه الغريبه اني وثقت فيهو بدون ما اخاف انو يغدر بي .. لما جاني دخل المره دي دخلتو غير كان مبتسم ومبسووط شافني لابسه فستان ابيض كمو تلات ارباع مقسوم بي حزام في النص دهبي و عامله شعري كيريلي و متكحله وعامله قلوس خفييف .. لما شافني ابتسم كده وقال لي مساء الخير قلت ليهو مساء النور اتفضل .. جا و قعد في الارض في الجلسه وانا قعدت مقابلاهو .. كان بعاين لي بنظرات اعجاب شديييد .. لما اتخجلت قال لي ما بردانه ! قلت ليهو بضحكه كده لا .. قال لي لانو فستانك ده ما بردك ؟ قلت ليهو لا شكرا ليك .. قال لي طيب يا سندس 💜 قلت ليهو نعم يا همام .. ضحكنا الاتنين لانو كنا شايلين اسماء ما اسمائنا ... تاني ابتسم بفرحه كده وقال لي اسمعيني طيب الح يحصل كالآتي ...