حدودك وطني

٢٠

التقينا و الدهشه هي الاتكلمت .. قبل الايادي العيون هي السلمت .. نفس الغنيه كده كان منظرنا انا و همام لما شفنا بعض بعد خمسه سنين فراق ! خمسه سنين الحصل فيها كتييير و غير كل شي الا ملامح همام ما اتغيرت نفس الوجاههه ياخ و الملامح السمحه زي ما هي .. كان مستغرب مني شكلي الاتغير و شعري المقصوص وقفنا زي نص ساعه ما عارفين نبدا الكلام من وين بس كيفك ؟ تمام وانت كيفك ..تمام و كده لحدي ما انتهينا اننا بنردد في نفس الكلام قال لي اولادك كيف؟ قلت ليهو كويسين الحمد لله تمام و الله .. قال لي ربنا يخليهم ليك و زوجك ؟ قلت ليهو نحنا منفصلين قال لي اي عارف بس هو كيف كويس؟ قلت ليهو بخير والله .. ابتسم كده و قال لي الليله جابك شنو ! قلت ليهو عرس سلمى ولازم نجهز قرب و كده .. التوتر كان ظاهر علي و هو بسأل اسئله عارف جوابها .. قلت ليهو والله قلت اديها اليومين ديل عشان تاني ح انشغل مع الاولاد وما ح نتلاقى الا نهاية الاسبوع للعرس .. قال لي ايوا كويس والله قلتي تقيفي مع صحبتك و تسانديها .. قلت ليهو يغني متوقع ما اقيف معاها ! و ما اجي اطلها ! ابتسم بسيط كده و عاين لي قال لي سندس البعرفها ما بتقيف مع زول ابدا .. ملامحو اتغيرت و هو بقول في الجمله دي ظهر غضب كده عجييب ياخ في عيونو و فجأة اتغيرت ملامحو للصر و العتاب .. حسيت اني عايزة ابكي لما هو بطعن فيني بكلامو قلت ليهو كتر خيرك ..ابتسم تاني بتريقه و قال لي ياستي الله يوفقك عن اذنك قلت ليهو اتفضل .. دخل جوه ل ناس رجاء و ماقدرت اتحرك لما هو دخل كاني اتجمدتا و بقيت كتله تلج وكاني وقفت في نفس اليوم قبل خمسه سنين ونحنا بنفارق بعض انتظرت بره لحدي ما هو طلع و مشى دور ب عربيتو حتى دخلت جوه .. عديت اليومين و تاني هو ما جا بالغلط ليهم و لحدي ما رجعت بيتي و استلمت الاولاد من ياسر و عزمتو ل عرس سلمى زي ما كانت سلمى حابه تعزمو .. يوم الخميس كان عرس سلمى لبست فستان اسود لامع و قصير تلت اربع و لا فوق شويه كدة و لابسه حجاب و زمام و عامله بس استشوار لشعري ولابسه اكسسوار فضه و زي ما انا انيقه ونحيفه وجميله شديد .. كنا ماشين الصاله انا و اولادي مع ياسر هو ح يوصلنا و ح يرجعنا اي نحنا منفصلين بس علاقتنا طيبه و في حدود من ناحيتي اما من ناخيتو هو لسه ودايرني و انا بحاول اتجاهل مشاعرو .. نزلنا معاهو و الطريق كلو بعاين لي من مرايتو معجب كل الاعجاب بي و باستايلي الجديد ياسر ولا يوم فكر يقول لي اتحجبي او البسي طرحه او البسي طويل نزلنا للعرس و هو قعد مع الاولاد انا وقفت مع رجاء في الباب بنستقبل في اهل محمد و الضيوف كل النسوان البدخلوا بقول لي حلااتك ماشاء الله قمر انتي مخطوبه؟ كنت بضحك و بقول ليهم انا ام تلاته .. الخلعه كانت واضحه فيهم لانو شكلي ابدا مابيوحي اني كنت متزوجه اصلا .. جا همام متأنق داخل سلم على رجاء و لما جا ل دوري مدا يدو بكل رسميه وقال لي كيفك قلت ليهو تمام اتغظتا من تجاهلوا لي و قربتا اصر ليهو في وشو بس مسكتا نفسي و اتجاهلتو و بعدها دخلت امو و اختو .. عرفتني اختو بس امو ما عرفتني سمعت هند بتقول ليها بهمس ماما دي سندس قصت شعرها ؟ اتجاهلوا وجودي زي ولدهم و اتجاوزوني و دخلوا .. طول الحفله كل ماعيون همام تجي علي بيلقاني قااعده جنب ياسر و الاولاد بعاين لي من بعيد و كأنوا نفسو يقتلني من الكره الكان ظاهر في عيونو .. الحفله مستمره و الاجواء متوتره بيني وبين همام اساسا م فهمنا حاجه من العرس و نحنا متغايظين كده من بعض .. جات رجاء و قمتا معاها ارقص طوالي همام قام و وقف ورانا و لا كان برقص بس واقف عشان ياسر ما يجي يقيف معاي .. لما اتلفت لقيتو وراي بعاين لي اتخلعتا و مشيت طوالي منو .. العرس مرا و نحنا متوتريين من بعض لحدي ما قرب ينتهي ياسر قرب مني و قال لي سندس نمشي ؟ قلت ليهو في جرتق ولازم احضرو قال لي جرتق ؟ ضحكتا و قلت ليهو عادة من عاداتنا طبعا لاننا ماعملناها انت ما ح تعرفها .. اذا انت ح تتاخر امشي انا بطلع مع رجاء قال لي لا ما بخليك براك هنا قلت ليهو ياسر بجد برجع مع رجاء اساسا عربيتي عندها ح انوم معاها و الصباح رباح و بعدين رجاء الليله براها ... قال لي تمام براحتك طبعا خلاص سلام و سلمي على رجاء ما عايز اشغلها و هي في الحفله قلت ليهو طيب مشيت معاهو لحدي الباب و انا شايله بتي ودعتو ومشى .. ام همام اتلفتت عليهو وقالت ليهو همام بتعاين هناك ليه؟ قال ليها هناك وين ؟ قالت ليهو قوم خلاص نمشي البيت قال ليها عايزين تمشوا ؟ قالت ليهو اي و هسي .. جوا ماريين جنبي و انا في الباب كأنت بتعاين لي بكل احتقار امو و هي ماره من جنبي .. هند مسكت همام من كتفو وقالت ليهو ياخ البت دي قرررضه بشكل ياخ .. قال ليها اي  و سكت رمب وصلهم البيت و هدف انو كان انو هو يرجع من العرس عشان ما يلاقيني كتير بس لما وصلهم ما نزل قالت بيهو ماشي وين ؟ قال ليها راجع للجرتق قالت ليهو مافي داعي الوقت اتاخر قال ليها امي من بتين بتمشيني زي الشافعي قالت ليهو ماقصدي حاجه بس ما ترجع قال ليها امي انتي خايفه اني الاقي سندس؟ ع فكره انا لاقيتها و اتكلمنا قبل العرس بطلي خوفك ده و ادخلي جوه تصبحوا ع خير .. بما دخلت قالت لي هند شفتي اخوك ده ح يجيب لينا الكفوه و يرجع ليما الاذى دي تاااني .. هند قالت ليها ماما علييييك الله ماتضغطي عليهو و عليهو براحتو الضغط الكتير ح يخليه بكره البيت بعدين هو زول واعي و فاهم خليهو اصل سندس من ناحيه همام  اخوي البعرفها مستحيل يرجع لي بت خلتوا و مشت لغيرو و باعتو ...
جا همام الصاله و لقى الجرتق خلاص في الاخر كنا واقفين انا ورجاء و را سلمى ولما خلصنا خلاص والصاله فضت ما فيها في العرسان و هما وانا ورجاء واولادي نايمين في الغرفه بتاعت العروس جوه الصاله رجاء قالت لي سلمى عليك الله اركي الوردة ياعروسه نشوف الدور الجاي على منو فينا سلمى قالت ليها يا مره احساسي عرس شنو تاني ليك! ضحكنا فيها قالت ليها رجاء هييي مالك علي صغيييرة وحلات الدنيا علي .. همام و محمد ما قدروا يمسكوا الضحكه وفكوها محمد قال لي سلمى عليك الله ارميها عشان نخلص رجاء قالت ليهو انت مستعجل كده مالك يا عريس .. ضحك و قال ليها انا خايف انك تبارينا الفندق قالت ليهو اساسا ح امشي معاكم يا عريس نططت عيوني وقلت لها رجاء .. قالت لي وحاااتك ما اخلي سلمى تمشي براها الليله عشان حركاتو دي .. همام ضحك فيها ومحمد قال فيها الله يضبرني على ام العروس .. قالت ليها يابت ارمي الوردة انا و رجاء كنا واقفين وراها و همام ومحمد قاعدين في الكوشع وسلمى واقفه بزفافها عيون همام كانت علي لما سلمى رمت الوردة ورجاء رفعت يدها الوردة وقعت في رجليني تحت رجاء قالت لي عايني الشقيه .. اصلو النسوان البسألوا فيك قبيل ديك تلقيك اديتي وحده رقمك عاارفاااك انا يا ام عيون .. ضحكنا كلنا فيها لانها جاادة عايزة تعرس مشينا بعدها نطلع رجاء طبعا سبقت العرسان لعربيتهم و قالت لي محمد ارح نجيب الشنطه بتاعت سلمى و وصلوني البيت و بصوتها العاااالي دااك قالت لي همام انت يا اخوي وصل سندس و عيالها ديل لما تتمحرك وتطلعهم انا ما بقدر اصبر عليها .. مشت اتغذت وسط العرسان عشان تجيب شنطت العروس😂😂 بقيت انا و همام برانا اي زول ما عارف يبدا من وين .. قلت ليهو ما ااهرك انا ممكن اطلب تكسي انت امشي قال لي اولادك وين؟ بكل رسميه منو بتكلم .. قلت ليهو جوه الغرفه قال لي طيب يلا .. دخل شال فؤاد و فادي و قال لي شيلي ياسمين طبعا ما فتحت خشمي بحرف زي ما اتكلم برسميه شلت اولادي و ركبنا معاهو .. الطريق كلو هو ساكت لحدي ما وصلنا البيت و دخلنا الاولاد جوه .. رجاء شكلها مشت توصل العرسان لسه😂😂😂 واقفه لمحمد في حلقو .. اتصلت عليها وقالت لي جايه مع صاحب محمد في الطريق قلت لي همام شكرا عذبتك قال لي رجاء ح تطول قلت ليهو اي .. قال لي طيب ما ح اخليك براك و قعد في الصاله ابتسمت ليهو ودخلت غرفتي قفلتها .. اول مره احس قلبي دقاتو عايزة تطير خوف ولافرح ما عارفه .. لما نص ساعه مرت و رجاء لسه ما جات اتصلت عليها قالت لي في زحمه طلعت قلت اتشجع و اعمل قهوه اقدمها بيهو لو احرجني ما مشكله المهم اكون عملت الواجب .. طلعت بره و لقيتو نايم في الكنبه و هو متمحن .. سرحت اعلين ليهو مسااافه بكمية من الحب و الحنيه جواي .. انا ليه اتخليت عنو؟ و كسرت خاطروا ! الزول لما يجرب احساس الامومه حنيتو بتزيد .. مشيت قعدت في الارض جنبو و هو نااايم بعمق كده 😍 بدون ما احس قلت ليهو انا اسفه؛ اسفه على كل شي عملتوا فيك و لاني ظلمتك و كسرت خاطرك بس انا بجد كنت برييدك وللآن انا بحبك .. و اندفعتا شديييد ورا شعوري و شلتا يدو حضنتا راحة يدو بي وشي و شميت عطرو من يدو .. و هو صاح من نومو لقاني في الوضع ده