حدودك وطني

١٦

سلمى ورجاء بقوا بصحوا فيني بالمويه لحدي مافقتا و قمتا على حيلي .. لقيتهم مخلوعين بعاينوا لي رجاء قالت لي يابت مالك في شنو ؟ قلت ليها بتبكي مالك انتي ؟ همام مات صح و عثمان كلمك انا عارفه .. قالت لي سندس قولي بسم الله ده ما عثمان انا كنت قاعده و اتذكرت اولادي الليله عيد ميلاد ولدي ناصر الكبير و ماقدرت امسك نفسي .. طوالي حضنتها و بكيت قلت ليها انا خفت شديييد مسكتني وبكت معاي قالت لي استغفري و اهدي والله همام ما عندو شي .. بكيت في حضنها لما نمت على رجولها و سلمى بتعاين لي قالت ليها سندس دي لو حصل ليهو حاجه ح تموت وراهو ماشايفه حالتها كيف ؟ قالت ليها ان شاء الله ما حاصل ليهو شي .. كدي اضربي لي عثمان احتمال يرد قالت ليها طيب و اتصلت وماردا عليها💔 خلوني نايمه في الكنبه في الصاله عشان ما يزعجوني لحدي ماصحيت الصباح لقيت نفسي ناايمه بره قمتا على حيلي وصليت و شلت المصحف قريت يس بالمبين بنيه ربنا يحفظ لي همام من كل شر .. صليت ركعتين شكر و نذرت اني اصلي ركعتين اذا همام رجع بالسلامه و بعدها قمت على حيلي شديت رز بالحليب و عملتوا في كاسات زي مابنعمل في السودان لحنة العريس ... طلعت بره و حمت في الشارع براااي اي مسكين اديتو و بعدها قعدت في الكورنيش براي شايله تلفوني .. اتذكرت همام بس كنت حاسه بإطمئنان بعد العملتو ده و بعد شويه تلفوني ضرب كان عثمان رديت عليهو بلهفه عثمان كيفك؟ قال لي سندس الحمد لله وانتي .. قلت ليهو همام وين و كيف و رجع ولا حصل ليهو شنو قال لي قولي بسم الله همام رجع بس عمل حادث بالعربيه في طريق الرجعه و نقلناهو المستشفى كانت يدو كعبه ما بتتحرك بس يادوب حتى اتحسن و طلب مني اكلمك الليله .. ليهو اسبوع كان في المستشفى و هسي بقى احسن ماكان عايزك تعرفي عشان ماتقلقي عشان كده كان بشوف تلفوناتك وما برد .. قلت ليهو عثمان وبقيت ببكي قال لي اهدي مافي حاجه انا جاي اوديك تزوريهو انتي وين ؟ قلت ليهو انا في الكورنيش ووصفت ليهو مكاني بعد ساعه و ربع كده وصلني .. ركبت معاهو و انا مقلقه لسه لحدي ما وصلت المستشفى و دخلت عليهو في الغرفه و شفتو💔 و ياااه لما شفتو حسيت روحي رجعت لي و اتولدتا من جديد لقيتو راقد مقبل على الشباك قلت ليهو همام .. اتلفت عاين لي وابتسم طوالي قال لي جيتي .. و بدون ما احس مشيت جريت الكرسي و قعدت جنبو وعزيت 😭😭 قال لي يابت ياعويره في شنو هسي بتعزي فوق راسي كده .. ياريتني ما جبتك زاتو قلت ليهو انت واحد كلب .. كيف يحصل معاك كده و ماتوريني طوالي .. انت ماعارف انا كنت كيف وحالتي كانت صعبه كيف ياخ النفس بشيلوا بالقوه ياخ حرام عليك .. عاين لي بحنيه و قال لي خفتي علي ! قلت ليهو ده سؤال ليك يا غبي .. ضحك و ابتسم وقال ربنا يخليك لي وتخافي علي كده و تحني بنفس الدرجه دي لحدي ما اموت .. قلت ليهو هسس الكلمه دي ما اسمعها منك ياخ قلبي اتقطع عليك ياخ انت اهلي و حياتي وحبيبي و دنيتي ووطني و اي شي بخصني اذا انت رحتا انا بروح وراك ياخ💔 قال لي لو عارف كمية الحب دي بتطلع منك لما اغيب كنت زدتا شهرين كمان .. ونحنا بنتكلم اتصلت علي سلمى بتسألني يابت طلعتي وين من الصباح ؟ قلت ليها مع همام .. بقت بتصرخ طوالي همام رجع 😍 الفففف حمد لله على السلامه افتحي الاسبيكر يابت .. فنحتو ليهو مسكت التلفون هي و رجاء و سلموا عليهو وقالوا ليهو ياخ قلقتنا عليك الف سلاامه ليك و ماشفت البت دي اتجرست كيف ياخ .. لما خجلت و هم بفضحوا فيني طوالي كده قال ليهم كويس انها ما ماتت بي وراي .. اديتو ضربه في يدو التانيه 😂😂 سلم عليهم وقفل منهم .. قمت بعد.كده اشوف اليد المجروحه لقيتها شويه احسن بس مجبصه 😭 قلت ليهو سحرووك لي يا ابو عضلات قال لي بعد الكلمه دي عرفت السحرني منو وقعد يضحك 😂 قلت ليهو والله انت كلب و ما وفي كمان .. قال لي سندس 💙 انتي كويسه قلت ليهو والله ياهمام هسي بقيت كويسه الاحساس المر ده ما حصل حسيتو الا لما فقدتك .. قال لي انتي خفتي علي ؟ و لاخفتي اكون من الناس البلعبو بيك ؟ قلت ليهو في الحقيقه اول جاني احساس انك لعبت بي و مشيت خليتني بس لما غيبتك طولت خفت عليك و قلت حتى لو لعبت بي و خليتني اول اتطمن انك رجعت بالسلامه .. فكرت انك رجعت وما عايز تلاقيني و افكار سوده كتيرة جاتني بس الفكره الخوفتني هي انك تكون لاقدر الله متا💔 الاحساس ده كان مدخلني في عالم كلو سواد .. بقيت بتخيل حياتي من غيرك و انك مافي فعلا .. منو ال حيحميني ومنو الح يقيف جنبي و ح القى الامان تاني وين .. منو الحيحسسني بالراحه و انا جنبو و منو الحيخلي بالو مني وانا من ولدوني ما حصل شلت هم زول يفارقني .. اساسا ما كنت قايله التفكير في الفراق في حد زاتو هلاك .. الزول البعني ليك كل الحياه لما يفارقكك فراق ابدي هنا انت بتفقد طعم كل حاجه .. الفتره دي انا ما ح انساها و الخوف و القلق العشتو  والوهم الدخلتو و تخيل حياتي من غيرك دي غيمه سوداء عدت علي و ما ح انساها .. همام انت امي و ابوي و اخواني و اهلي كلهم انا بنتمي ليك انت بس .. ماتفكر تفارقني يوم لأنو الحاجه دي ممكن تقتلني ياهمام .. قال لي و منو القال ليك انا ح اسيبك ؟ انتي يابت مابتثقي فيني ؟ بعد كلامك القلتيهو ده اتاكدتا اني اهم زول في حياتك و ده الكنت عايز اتطمن عليهو .. صدقيني انتي بتي و حبيبتي و ام اولادي ان شاء الله يارب .. قلت ليهو همام انت حلال عليك  تعرسني ؟ قال لي كيف كيف ؟؟ قلت ليهو انا مجهولة الابوين في الدين ممكن تعرسني ؟؟ قال لي ومنو القال انو حرام ؟ قلت ليهو ما عارفه انا بسأل فيك عادي ممكن تعرسني ؟ ضحك و سكت و قال لي ما ح ارد ليك انتي شافعه لسه .. اساسا البخليني اعرس شافعه شنو .. قلت ليهو حيوان ده و انا البخليني اعرس ضابط ممكن يموت في اي لحظه و مهدد بالانقراض شنو .. قال لي انقراض في عينك😂😂 و نحنا بنضحك كده و بنتونس سمعت صوت ام همام واختو بره مع عثمان بسلموا عليهو .. الباب كان مقفول قلت ليهو همام امك جات ؟ و قمت على حيلي قال لي خايفه كده مالك .. قلت ليهو ح تعرفني قال لي ما ح تعرفك بالعبايه و الطرحه واقعدي وما تتلبشي كده .. قعدت في مكاني بس خلاص اتوترت لحدي ما دقوا الباب و قال ليهم ادخلوا .. دخلوا الاتنين شافوني استغربوا و سلموا من بعيد امو قربت منو باستوفي راسو و قالت ليهو اصبحت كيف حبيبي؟ قال ليها تمام و اختو سلمت و قعدت .. ما اتعرفوا علي لانو شكلي اتغير فعلا بالحجاب بس كانوا مستغربين دي منو يا اما وحده من معارف همام يا اما من طرف عثمان .. نظرات اختو لي كانت بدقه احساس انا شايفه الشبه ده و ماغريب علي لكن ماعرفتني اما امو اتلهت في ولدها و بتسال فيهو اكلت و لا لا و هو برد عليها  لحدي ما جات قعدت في الكرسي برضو جنبي انا وبتها و سلمت علي تاني وقالت لي ما اتعرفنا عليك ؟ طبعا سكت ماعرفت ارد اقول شنو .. همام رد ليها امي دي سندس قالت لي مرحب يا بتي ...طبعا انا متعجبه انو المره دي ما عرفتني ؟ لكن بتها تعاين لي من فوق لتحت ونفسها تتذكرني .. قلت لي همام انا استأذن و ودعتهم وطلعت مع عثمان يوصلني البيت .. اختو بس طلعت كده جات قعدت جنبو في السرير و همست ليهو همام البت دي انا شفتها قبل كده متأكده  قال ليها بتكوني شبهتيها .. امو قالت ليهو همام انا اشوف الدكتور و ارجع ليك قال ليها تمام .. خلت اختو السأله .. عاينت ليهو كده شديييد قال ليها في شنو عايزة تاكليني بعيونك ديل .. قالت ليهو ما كنت دايره اقول قدام امك لكن عرفتها البت دي سيلا الجبتها لينا البيت و قعدت معانا و اشتغلت .. و بسببها اتشاكلت انت و لين .. علاقتك شنو بيها و ليه اتغيرت كده و بقت بتلبس كده ؟ همام اوعك تكون عامل علاقه معاها ؟ و الله امك تموت لو عرفت .. قال ليها وطي صوتك ده يا بت ما تسمعك ..قالت ليهوو احكي لي طيب قصة البت دي عشان انا ما مرتاحه كده قال ليها قصه شنو خليني ابقى كويس و بفهمكم .. قالت ليهو همام معقول تكون حبيت الخدامه دي ؟؟ قال ليها هند بنهره كده ماتقولي عليها خدامه .. بعدين عشان اريحك البت دي ح تكون مرت  اخوك عديييل كده .. نططت عيونها و قالت ليهو هماام قال ليها اي ح تكون مرتي و الموضوع ده لحدي هنا اقفليهو لما ابقى كويس ان شاء الله بفتحو مع امك .. لسانك الخفيف ده ما تفتحيهو .. قالت ليهوو سمح يا اخوي بس اخر سؤال البت دي خدامه فعلا ؟ ولا كانت حركه منكم ؟ قال ليها ما خدامه حركه مني عشان اجيبها البيت .. قالت ليهو وااو 😍 بعني بتحبها للدرجه دي .. و انا اقول ياخ اخوي طلع عندو قلب وحنيه وكده .. لكن الصراحه البت سممممحه ونجفه عديييل ما كنت قايلاك عزاال كده .. و ضربتو في كتفو قال ليها اها اقتليني انتي التانيه و ضحك وقال ليها مجنونه و الله زيها .. بتنفع معاك شديد سندس قالت ليهو حبيتها مما جات بس ما ظهرتا كده عشان لين عارفه بتغير من الضبانه .. حتى ك خدامه استلطفتها خليهو تكون مرت اخوي .. قال ليها كويس انها عجبتك يا ام لسان قالت ليهو الباقي على ام لسان اطول امك .. قال ليها يابت ح تتربي بتين انتي .. همام و هند كانوا اصحاب شديد خصوصا بعد وفاة ابوهم همام احتواها و رباها لانها الاصغر و طوالي معاهو في البيت ف كانت صحبتو و هو صاحبها  وبحكوا لي بعض اي شي و بقيفوا جنب بعض .. قالت ليهو اها ما كلمتني بت منو و بيتها وين ؟ قال ليهاماعندها اهل قالت ليهو ماتوا يعني .. قال ليها فقيدة ابوين .. ختت يدها في خشمها وصرخت يعني من المايقوما 😲😲 وشهقت بخلعه كده .. و مع خلعتها دخلت امهم و خلعت همام و هند اكتر