حدودك وطني

١٤

نزلنا مشينا الشارع طوييل كان ونحنا لسه ماشيين فيهو قلت ليهو في شنو ؟ قال لي اصبري بس .. سكت و مشينا تاني نهايه الشارع في بيت قال لي البيت ده شايفاهو؟ قلت ليهو مالوا؟ قال لي ده بيتي براي المفروض اعرس واسكن فيهو مع مرتي قلت ليهو و اها؟ قال لي ومافي وحده شافتو غيرك ما تسأليني ليه انا بعمل معاك كده ولا انا بفرض عليك الحاجات دي ليه لأني مالاقي جواب لي نفسي بس لما اقول ليك لفي طرحتك او البسي عبايه ما لانك ما بت ناس ولا بت ما محترمه انا بس بقول ليك كده من خوفي عليك .. مابت ناس دي ذكرتني بي اصلي الأنا متجرده منو و ذكرتني بي اني بت من المايقوما و حقيقة رغم الجمال الفيني و رغم طبيعت واحترامي بس ما نسيت ولا يوووم اني وحده من المايقوما كلمتو دي بدل تطبطب علي جرحتني زياده و نبهتني تني فعلا ما بستحق ود ناس زيو حسيت بقلبي وجعني من جوووه عاينت ليهو جوه عيونو بقوه وقلت ليهو انا فعلا ما بت ناس و فكيت العبايه و الطرحه رميتهم ليهو في الارض و مشيت .. رفعهم وجا لاحقني بنادي فيني بقى بعتذر رغم انو ظاقال شي غلط بالنسبه ليهو انا بت ناس وبالنسبه لي برضو ماقال شي غلط انا بت حرام زي مابقولو علي هناك و انا وين و هو وين .. يمكن الفرحه شايلاني ونسيت نفسي معاهو بس همام ح يفضل حلم في السماء ركبت العربيه ومافتحت خشمي بكلمه والغضب كان باااين علي ركب جنبي وتاني قال لي سندس انا غلطت في شنو ؟ قلت ليهو ولاشي رجعني البيت بس .. لما شافني قفلت خلاص ساق العربيه ورجعنا نزلت منو بزعله و مشيت دقيت الباب بقوه كان واقف بعاين لي لحدي ماسلمى فتحت لي الباب قالت لي رجعتي بفرحه كده .. لقتني صاره قلت ليها سلام ودخلت طوالي لغرفتي عاينت لقت همام واقف هزت راسها سلمت عليهو .. هو شال العبايه والطرحه و جا قرب منها سلم عليها و قال ليها دي تبع سندس قالت ليهو طيب اتفضل قال ليها لا شكرا سلمى ولا رجاء؟ قالت ليهو سلمى قال ليها اتشرفنا ردت ليهو وانا اكتر ومشى .. دخلت وهي مافاهمه الحاصل نادت رجاء من المطبخ وقالت ليها تعالي وجوا داخلين لي في الغرفه لقوني غيرت لبست البجامه و اتدفيت بي كنزة الشتاء و فكيت شعري ولسه صاره .. سلمى دخلت وقعدت في السرير جنبي سالتني مالك و ختت لي العبايه قلت ليها شيلي القرف ده مني .. عاينت لي رجاء بخلعه قالت لي في شنو ؟ قلت ليها مافي حاجه و بكيت .. سلمى حضنتني وبكيت زياده قلت ليهم انا عارفه اني مابشبهو ولا زيو انا وسخانه و هو نضيف .. هو نضيف شديد وبستاهل البتشبهو .. رجاء جات قعدت جنبي برضو ومسكتني من سلمى ضمتني  قالت لي حصل شنو ؟ قلت ليها هو نفسو تكون مرتو بتلبس كده ومحترمه نفسها و انا .. قبل ما اتم قالت لي وانتي ممكن تبقي كده وتتغيري عشانو ؟ قلت ليها لا .  قالت لي سلمى لا بتقدري وتفتكري بعمل كده عشان انتي بت كعبه .. لا طبعا هو عارفك وعارف اخلاقك ودي الحاجه الناقصه فيك نفسو يتمها والله لو ما برييدك الزول ده ما كان عمل كده قلت ليهم انا عارفه اننا ما لبعض ومستحيييل نكون لبعض .. رجاء قالت لي وهي بتضم فيني وانا ببكي انتي قلبك ده مافي انضف منو .. ذنبك شنو اذا اهلك غلطوا ؟ انتي ربنا خلقك انسانه براك ومسؤوله من نفسك ما ترمي كل حاجه غلط بتعمليها لي اهلك .. في الاخرة ح تتحاسبي براك من كل حاجه عملتيها ما تلومي اهلك على غلط انتي بتعملي فيهو .. قلت ليها انا ما غلطت زيهم قالت لي ايمانك بي ربنا ضعيف قلت ليها ماضعيف وقمت من حضنها .. سلمى قالت ليها خلينا نطلع لما تهدا شكلها ما ح تهدا هسي .. قاموا طلعوا من الغرفه وخلوني براي ببكي و ببكي وببكي و بعد مسااافه حتى سكتا .. اتغظت من كلمة رجاء انا ايماني ضعيف ! بقيت بفكر هي قالت كده ليه .. اتذكرت غلطي الزمان لما حضنت همام و اتذكرت لبسي الكعب و اتذكرت شعري المطلعاهو الوقت كلو بره و اتذكرت ثقتي في ربنا الهزيتها لما قلت مستحيل اكون لهمام وانا ما بعلم الغيب كيف اقول حاجه زي دي .. عرفت انو رجاء كانت قاصدة الحاجات دي كلها و انا رغم صلاتي بس بعمل غلط كتييير قمت على حيلي بعد كلام رجاء وقع في راسي و دخلت دفيت مويه استحميت واغتسلت و جيت استشهدتا من اول و بعدها صليت .. صليت اربعه ركعات واول مره اخشع في الصلاه بعد انتهيت سجدت سجدة شكر وبكيت فيها ما عارفه لي سبب يخليني ابكي غير اني بعتذر لي ربنا اني بغلط و بعصي فيهو وهو رحيم بي .. بعدها اتكلمت براي في الغرفه وانا ببكي وبنادي في الله
"  يارب انا عارفه اني بعصي فيك بس انا بحبك .. بدون ما اقول انت عالم بي انا بحبك و نفسي اكون من الصالحات يا الله .. يا ربي انت عالم بي نفسي اغير نفسي و اكون زي ما انت بترضى عني حتى لو نفسي غلبت علي انت عالم بي وبضعفي .. انا صاح بسمع الاغاني وبتلذذ في سماعها و مممكن اغتاب زول و ممكن اظلم و يمكن اني عملت معاصي كتيره انا زاتي جاهله انها معصيه .. و معاصي انا عارفاها سيئات بس مستمره فيها .. يارب اهديني ليك و قربني منك و كل ما ابعد من طريقك ردني ليك و قرب مني كل زول بحبني فيك فيك انت بس يارب اغفر لي واعفي عن ظلمي لي نفسي و ظني فيك و انت عالم اني رغم كل الذنووب الفيني انا متمسكه بي حبك و بي طريقك ف اهديني ليك "