طاقة تحمل

13

                   السـلامُ عليـكـم🌻🌼

طاقة تحمُـل
الــعـبـاديـــه
البارت //13//

ساره . .

كملت كلامي وياه وكتله

_ قصدك منتظر اروح من إيدك واتزوج

انتفض وصار عصبي حتى كام ينتر نتر

_ شحده الي يحاول يزوجج اقتله والنبي

_ فدوه تعال اخطبني كافي تمدد وتماطل والله اذا جدو يعرف بإلي صار اليوم يقتلني

مااسمع الا صوت ورايه (وشنو صار اليوم ياعار)

إلتفتت واشوف بابا وعمه هيفاء ... بقيت أبلعم اريد اتحرك مااگدر احس إذاني يطلع منهه بخار من گد الصدمه وعيوني أجحضت كامت طبول تدگ براسي .. اضطربت انفاسي واحس رجلية خدرت وإيديه ارتعشن .. وگع الموبايل من ايدي وبس صوت بلال بعيد وهو يصيح الوو لان سكتت عنه .

تقرب بابا عليه يخزر بيه وسألني

_ شنو صار احجي كلشي هسه لااقتلج بإيديه !

صوتي احاول ارفعه مااگدر احس نفسي فاقده النطق

مدمع عيوني جف !!  مااكدر ابجي ولاانزل دمعه  مصدومه لان انكشفت ! حاولت احطي بكلمات متقطعة

_ ب ب بابا !!!!

إرتفع صوته إلى عياط وعيون جاحضه .. ايديه ترتعش من شدة العصبيه .. شرايين جبهته برزت ودمارات رقبته كادت تطق .

تقرب يمي ويهز بيه

_ شمسوي بيجج ساااره حتموتيني احجيييي

الكل طلعو على صوت العياط ومتفاجئين واحد يباوع بالثاني مصدومين وهيفاء عيونهه تبث سعاده وشماته ،،، جدو أخذ دور المتفرج يريد يشوف شنو النهايه

اجتي زهراء شافتني حطت إيديهه على فمهه ولطمت على خدها .. عيونهه يذرفن الدموع وتباوعلي بصدمه .. شفتهة استغلت الموقف وغافلت الكل .. سحبت الموبايل ضمته بردن الثوب مالتهه ورجعت تبجي وحاطه ايدهه على خدها .. نقذتني بهذا الموقف .

حسيت نفسي بعالم آخر وهذا مجرد حلم فزيت على حرارة بخدي !!

بابا ضربني راشدي ..  معقوله !! من ضربني اذرفت دموعي بغزاره ! بابا ابد ميضربنه اول مره يضرب وحده بينه وهي اني !

عطت بصوت عالي لان ضربني مصدومة

_ بابا والله مسوالي اي شيء صددكككني

حسيته إنصاب بحالة جنون

_ هههه لج سمعتج بإذاننننييي سمعتج تكوليله اذا يعرفون يقتلوني !!! شنو الشي الجبير لهالدرجه يوصلج للقتل شنوووو ؟؟

بقى يدور على الموبايل وجسمه يرتعش ويعيط بأعلى صوته صابته حالة هيستريا .. عمو ركض شبك إيديه وهو فرفح بين إيديه جسمه ينزل للاسفل ويرافس يريده يعوفه.. ركضوا عليه ولد عمامي شبكوه وجدو إجه عليه  ضربني راشدي مرة ثانية !!!!
وخزرني وكال (انتي عار)