طاقة تحمل

6 ج2

الـسـلامُ عـلـيـكـم 🌻🌼

طاقة تحمل
الكاتبه_العباديه
البارت_6_ج2

‏كُنـت حقيقي للغاية وكُل الذيـن
عبـروني لم تُناسبـهم حقـيـقـتـي.

~~~~~~~~~~~~~~~~~~~~~~~~~~~~~~~~

زهراء

فتح الباب محمد وصارت بوجهه سجى مدمايه وتبجي وواگفه گوه مستنده ع الباب وتشهك بالبجي ووجهه خريطه اني بالنسبه الي ماعرفتهه اله من صوتها من كالت

- الحگوللييي فددوووه

عمتي لطمت على وجهه وعاطت

ام محمد.. شكو ولچ شبيج؟

ظلت تشهگ وماتگدر تحجي .. محمد اخذهه من إيدهه دخلهه جوه وگعدهه بالاستقبال .. گعدت وحطت وجهه بين إيديهه وتبچي .. اني واگفه اتفرج والكل هم واگفين بس هوَ گاعد يمهه يهدأ بيهه .. آني ساكته واباوع .. عاط بيه بعلو صوته

محمد.. شبيج واگفه ماتروحين تجيبيلهه ميييي

صفنت بيه علّطى صوته نتر بيه

محمد.. روحييي جيبي مييي شبيجج

خزرته ماراضيه ورحت جبت مي وانطيته اله بنتر اخذه مني شربهه وسألهه وعمتي اخذتنه حاصل فاصل باللطم

ام محمد.. ولج احجي شبيهه إختي إحچي

جاوبتهه من شهگاتها وصوتهه المتقطع

سجى.. أمي بالمستشفى صارت بيهه جلطه

عمتي شهگت حيل ودگت على صدرهه

ام محمد.. يممه صخام بوجهي راحت اختي كوم محمد اخذني ليها

- يوم وين اخذج ماتشوفين حالة سجى

ابو محمد.. كرار روح اخذ امك

كرار.. غير اعرف السالفه من سجى يلا اروح

ابو محمد.. كرار بعدين تعرف رروح يابه ررروح

گاللهه البسي وتعاي .. راحت چكت جواريبهه واجت تركض اخذهه وطلعوا.. وآني وساره مصفصين ونباوع بسجى ..

محمد.. سجى ٱحچيلي شبيج ليش هيج شكلج صاير؟

رفعت راسهه باوعت عليه وعلى ساره ورجعت باوعت بمحمد هوَ إفتهم گال بصيغة أمر

محمد.. زهراء ،، ساره .. بررره

ظليت متفاجئه على إسلوبه الجاف ! ساره طلعت واني ظليت واگفه صافنه .. گال بصوت عالي

محمد.. شبيج ياااابه شاربه شي انتِ اليوم؟؟ ماتطلعين ادري چلبتي

حبيت أكبسه قبل مااطلع گتله

زهراء.. اكو شي إسمه إسلوب وإلحچي بإحترام ماعدنه عركه إحنه

خزرني بعيونه ووجهه احمر من العصبيه اشرلي على إبوه واني من وحدي خليت وطلعت بره ومن سديت الباب رگعته رگع ..