طاقة تحمل

24

                   الـسـلامُ علـيـكـم
طاقة تحمُل
الكاتبه :-الـعـباديـه
البارت//24//

زهراء

قرر جدو يتسرع بأمر الخطوبه مباشرةً اتصل على محمد وگاللـه باجر الخطوبه ومحمد هم مثل الممصدگ بسرعه راح جهز للخطوبه وآجر الكوشه والكيك والديجيه وانطاني عنوان المركز والبدله وكلشي جهزه بيوم واحد واشوف الفرحه ماواسعته ،، أما آني مافرحانه مثل فرحته تنغصت عليه الفرحه علمود ساره وحالتهه الي تبجي الكافر محبوسه ولااكل ولاشرب حتى من اجيبلهه ماتاكل ولاتشرب ومخلصتهه بواجي،، الكل مخبوصين ويحضرون واني اروح وارجع يم الباب مال الغرفه وكل شويه اتوسل بجدو ينطيني المفتاح اشوفهه ميقبل صار 3 أيام ماشايفتهه ،، وهيفاء من خباثتهه گامت هيه تاخذلهه الأكل گالت لجدو يمكن هيه اختهه تستر الهه وتنطيهه موبايل لو تخليهه تتواصل وياه وانحرمت من إختي بسببهه وحتى جدو صار يشك بيه مو مثل تعامله قبل ويايه ،، أما بابا ف ابدد ولانشوفه ولايشوفنه مايهمه امرنه كله بالشغل جان ينزل 7 ايام هسه ينزل يومين يگول
(تتلگني بمشاكلجن وطلايبجن مو بنات طراگيع ونزلت على راسي ساعة السوده التزوجت بيهه) شكد جانت ساره تحقد عليه واني اگلهه ميصير ابوج بس من گال جملته هـٰذي صرت مااطيقه ولااعتبره اب اصلا ابونه الحقيقي هو جدو هو الحنين علينه وهو الي ربانه مامصقر عنه بشيء بس هسه من اشتدت الامور صار قاسي شويه والسبب بلال الي يقشمر بالبنات وكانت ساره احد فريساته ماضربنه ولاضغط علينه بيوم وحتى ساره كانت ماخذه راحتهه كلش ويه بلال لان تعرف جدو ميگدر يضرب ولايأذي دائما يگللنه
{انتن اعز شي عندي ولاتضنن بيوم افرط بيجن } ،، سارة خطأت خطأ كبير لان وقعت وحده من فريساته وهيه من النوع الي بسرعه تتقشمر وتضحك لاي بشر وتثق بأي بشر بيبي دائما تگلهه ؛-
(اذا واحد كاللج ذبي روحج بالشط تذبيهه) وصحيح هـٰذي شخصية سارة بسرعه تتقشمر وتضحك لاي شخص ولاكأنما عايشه بوسط ذئاب على هيئة بشر،،

صار يوم الخطوبه اني عباره عن جسد متحرك جسمي يتحرك وين مايريدون بس اني تفكيري كله بـساره وشنو نهايتهه ويه بلال الي متگدر تتركه وكل ماانصحهه تگول
( مااگدر والحب اعمى !)....

#بقلمي_العـباديـه

ٱجه محمد ووياه مشيه متكونه من مجموعة شيوخ وقروا الفاتحة اشتره جدو عجل وذبحوه تغدو وبعدهه اخذني كرار للمركز مال التجميل مختص بالعرائس

سوتلي تنظيف بشرة وترطيب ونضاره للوجه ورسمتلي حواجبي يعني طلعتني شكل ثاني

لبست بدله لون بصلي غامق وشعري اسود والاطراف لون زيتوني وتسريحه بسيطه ونازكه يزينيها طوك خفيف من الورود المصطفة باللون الابيض مكياج خفيف
إتصل عليه محمد گال

محمد : شعرج لاتصبيغه ولاتلعبين بيه

زهراء : والله صبغته