حياتي تؤلمني💔(منقوله )

19

#حياتي_تؤلمني الحلقه 19💓

بعد مرور 10 أيام الحوش فضي 💔ماقعد فيه الا حنان خالتها و انتصار مرت عمها و لجين و ولاء فقط اما اسامه و نادر يباتوا في حوشهم و يجوا من الصبح

حنان واقفه فم الباب و كان الكل حاضر الموقف : يا بنيتي ماتقعديش بروحك فالحوش اني توا مروحة في مدرسات يبو يعزوني فحوشي لانه حوشكم بعيد .. وتي بضاعتك كلها باش تجي تعيشي عندي لن يجي نصيبك

سيرين : وأنا مانبيش نطلع من حوشنا

حنان : انا نعطي فيك في علم مش قاعده نستأذن منك كلمه و قلتها بعدين وسيم يجيك و طبعاً لو انت يا اختي انتصار و خوي جمال أمتا ماتبوها عادي تقعد عندكم أيامات و ترجعلي

اسامه : كيف اقعد عندك وانتي عندك راجل فالحوش

وسيم : عرسي مازال عليه 3 شهور فقط 😒وبعدين انا ولد خالتها مش ولد عمها

سيرين : ولد عمي خيرلي من البراني ولد خالتي

وسيم : صار ولد خالتك براني عليك ؟؟

سيرين : ايه والله مانقدرش ننكر ..ولد خالتي براني عليا و ولد عمي دمي من دمه

طبعاً سيرين تبي تغيض وسيم

وسيم ركب سيارته متعفلق طار بي أمه و اخته

جمال و نادر و اسامه و انتصار و لجين خشوا قعمزوا في الصاله و معاهم رقيه حناها  و صغار عمتها تعالوا نعرفكم عليهم

عمتها ربيعة متكبرة و شايفه روحها بفلوسها عندها ولد واحد و بنت

سندس عمرها 21

و فراس عمره 27

فراس : اضحكي يا سيرين خيرك منكده شوفي اني نضحك و الجو مليح

سيرين شبحتله من فوق للوطا : في عزي امك توا نضحك

ربيعه شبحتلها بتفنيصه و سكتت لانها متأتره ب موتت امها و بدت اعصاب

سيرين : طول هالايام متحملتكم تقدرو تروحوا

فراس : مقدرين وضعك

سيرين : انت بالذات مانبيش نسمع صوتك

فراس سكت و يشبحلها في شبحات مش مزبوطه لن نادر و اسامه انتبهوله

انتصار : انتي حالياً يا بنتي كبيرة و تعرفي مصلحتك انتي اللي تقرري وين تبي تقعدي .. تبي تقعدي عند خالتك عادي تبي تقعدي عندي اهلين بيك تبي تقعدي عن خالك برضوا عادي و انتي اختاري

سيرين بدون تفكير : عادي وين مايجي مايهمنيش

فراس شبحلها : مالا تعالي عندنا

انتصار ورقت للوضع : سيرين بنيتي اختاري واللي يناسبك هو اللي نديروه

رقيه : بما ان العيلة كلها مجتمعة المرحوم قبل ما بموت كاتب وصيه للمرحومة ان لما سيرين تخش لل20سنه يعني تكون كبيرة تفتحوا الوصيه و تبوا الحق مابيتش نفتحها رغم انها كانت مدسوسه عندي