#حياتي_تؤلمني الحلقه 15💓
تاني يوم في الساعه 9:00 صباحاً ..
انتصار و تالا و لجين و جمال و نادر جهزوا روحهم للإفطار الصباحي متع الفندق و طبعا كان ع التلج و منظر حلو هلبه هلبه✨💚🌱
اسامه : وين سيرين
لجين : نزلت و خليتها فالحمام ادوش مندريش عليها امتى تجي
جمال : هييي توا تمرض راهو الجو مصقع هلبه
اسامه تلفت ل نادر : خيره جوك اخي
نادر : لالا مادورش الأمور هانيه
جمال : هيا يا نادر أو اسامه نمشوا ل الحاج مبروك جاي هو ولده قصي و المرأه
اسامه : وعلاش جاي مداما البنت رفضاته
جمال : ماتنساش ان هما صحابنا قبل ما حتا يطلب سيرين و بعدين قداش ليا منسق انا وياه غير نسيت نقوللكم هيا واحد منكم يلحقني
مشي اسامه مع بوه متعفلق
بعد نص ساعه قعدو يأكلوا في التحلايه بعد الفطور
انتصار : لجين هاك البطاقه بري شوفي بنت عمك خيرها عطلت
مشت لجين و فيسع ما ولت : راهو هذه البطاقه متع غرفتكم حني متع غرفتنا عند بابا و طلع و قعدت انطق ماحد فتح و نكلم فيها ع تليفونها ماتردش
انتصار : يا نادر سلم وليدي برا شووف متع الفندق يعطونا البطاقه الاحتياطية
نادر مشي كلمهم طبعا بالإنجليزي بس بنترجم : نبي البطاقه الاحتياطية متع الغرفه
الريسبشن : لا يوجد لدينا بطاقات احتياطيه و لأكن سوف تدفعون غرامه لانكم ضيعتوا البطاقه
نادر شبحلها و مشي
انتصار : زي ما توقعت ولا !!😫
نادر : ايه .. كلمت بوي قالي اني البرا في البركيدجو
انتصار وجها اصفر و وتالا و لجين خايفين عليها
وصلت إلحاجه جميلة و الحاج مبروك و ولدهم قصي
و معاهم جمال
تالا من غير قصد : بسرررعه يا عمو نبو البطاقه سيرين ماطلعتش بكل ان شاء الله خير
نادر شبحلها : ماتعرفيش تسكتي و خدي البطاقه من بوه و ركب يجري و لحقه قصي
اسامه يدرس في السياره البرا💓
جمال : خيرها سيرين شن فيها فهموني
انتصار : حصلت الداخل بس ماتخلعش روحك
جمال أستريح : اها باهي
...........
ركب نادر للغرفه يجري فتحها مشي للحمام سمع صوت الميه قعد يطق عليها لكن لا حياة لمن تنادي .. نادر تلفت ل قصي : بنكصر الباب تفضل اطلع
قصي : شن نطلع هيا ماتنساش ان هي حا تكون خطيبتي
نادر : البنت بالك دايخه وهي دوش .. اطلللع برا خير مانفسدلك وجهكك
قصي : حتى انت اطلع بكل حقارته بتكصر الباب بالللك البنت الداخل مش مستوره
جت لجين و تالا .. قصي لما شبحهم تحشم و طلع
بينما نادر كصر الباب حت عينه ع سيرين اللي كانت لابسه ملابس الداخيله فقط و طايحه ع الأرض
نادر لما شبحها طلع خشت تالا و لجين قعدو يبكوا و يلبسوا فيها حوايجها ..
خش نادر قامها حطها ع الكنبه قعد يضرب فيها في كفوف خفاف مابتش تنوض دارلها بارفان نفس الشيء مابتش تنوض
لجين : ارفعها المستشفى بسرررعه
لبسوها عبايتها و طلع بيها من الباب الخلفي باش ماينخعلوش حطها في الكرسي الخلفي و مشت معاهم تالا بينما نادر و هو راكب السياره شبح مسره كانوا شادينها رجال الأمن و تبكي و حالتها حاله هي و امها
مشي نادر للمستشفى و عقله و تفكيره مع مسره .. حطها في المستشفى و عطي فلوس ل تالا و كلم اسامه يجيهم فالمستشفى و طلع رجع للفندق
عند قصي طلع يلحق فيهم في المستشفى .. لما شاف نادر طلع فرح قعد يراجي في الدكاتره يطلعوا من الغرفه و في نفس الوقت خايف لن طلعت الدكتوره وعليها علامة الصدمه ...
عند نادر رجع للفندق طول مشي توجه ل حجرة الأمن لقي مسره تبكي و حالتها حاله و معاها امها
مسره لما شبحت نادر مشت حضناته طوول و قعدت تبكي
طبعاً مسره امها مش ليبيه مغربية و عادي ماتعدلش ...
نادر : اهدي اهدي خيرك شن في
مسره : خويا ادم معاش لقيناه 💔💔
نادر : كييف امتى معاش لقيتوه
مسره : نضت مالقيتاش بكل 😭ياااربي خايفه عليه خويا صغير مايعرفش حتى كيف يتصرفف
متع الأمن : قاعدين ندورو فيه هدي بألك يا انسه
عند وسيم يكلم في تسنيم
تسنيم : وينن انت قولي 😡
وسيم : في تونس😅شن جوك حبيبتي
تسنيم : عرسنا مازال عليه شهرين و أسبوع فقط يا فالح وتي روحك و كان في حاجات ناقصه
وسيم : كل شيء واتي حبيبي❤️ احكيلي شن شريتي اليوم
تسميم بدلع : انلاا خليها مفاجاه احلاا
وقعدوا يهدرزو
عند سيرين فتحت عيونها لقت روحها في مستشفى و قصي شادلها أيدها
قصي : حبيبتي خلعتيني عليكك
سيرين جبدت أيدها : انني وين
قصي : الدكتوره قالت انك ماتحملتيش البخار قلبك دقاته سريته .. انتي فالمستشفى
سيرين انخلعت : منور جابني
قصي : جابك نادر بس طلع و توا تالا البرا فالحمام اناديلك عليها
سيرين قعدت تحاول تتفكر اللي صار النفس هرب عليها بعدها معاش حست بشيء
#يتبع
صح قصيره هلبه سامحوني وعد واله الله غدوه الخميس انزلكم تلاته حلقات فيها هلبه تشويقات و اكشن هههههه و طوال ❤️❤️❤️❤️
أنت تقرأ
حياتي تؤلمني💔(منقوله )
Romanceروايه ليبية منقووووووووله خيانه حزن كره حب انشالله تعجبكم (لم تكتمل بعد )
