اسمعني صوتك

البارت3

# البارت الثالث....
#اسمعني صوتك
# للكاتبه روزايه....

لا مكان يأويني ولا ملجىء يحميني..
هربت من ناسي وارضي وحتى من نفسي..
هربت واذا بي اخرج من بئر واسقط في حفرة..

....

سمعت صوت حركه وطكطه وصوت اقدام وهي جايه باتجاهي واني اردد يامريم العذراء انقذيني يارب لاتعوفني.....

سمعت صوت دانيال وهو يصيح عليه و يدور هو بسرعه بس سمع صوت دانيال عافني وانهزم...

كعدت بالكاع لازمه ركبتي واكح وامسح بمكان لمسته اجه القذره احس جسمي بي نوبه صرع كلساع انفض نفسي من لمساته

  دانيال كعد يمي ويسأل شبيج بيسان ....
كتله شفت حشره وخفت منهه عقلي مايستوعب الي صار اخذت دانيال وطبيت للغرفه وقفلتهه علينه...

كعدت بالكاع واني ارجف من الخوف شلون يكدر يسوي هيج وهو رجال جبير الرب يلعنك يا ابو سمير احس كل جسمي قشعر مجرد ما اتخيل الصار اختنك....

ضليت حايره احجي لبابا خاف تصير مشكله فضلت السكوت وقررت بعدما اطلع لو شمايصير حدي للصحيات واخذ دانيال يوكفلي بالباب حته مايقبل يكول هي الدنيا نهار وتخافين...

مرت ايام واني حابسه نفسي بلغرفه وبابا يمدح بابو سمير ويدعيله بالخير واني اشتعل بداخلي هذا الحيوان مسوي نفسه سباق للخير وهو راد يعتدي عليه لان شافنه مسيح طمع بالعرض ....

الوضع بلانبار اتأزم اكثر ودائما اسمع بابا يكول لازم نطلع منا بس مانعرف شلون ووين انروح احس شلون الي عايشله بزجاجه مختنك بيهه وعلى ساعه تتهشم اثر ضربه وانروح بيهه....

ليش مابيوم منهن اجه بابا يركض ويجر بمريم بسرعه طب وسد الباب ويصيح بسرعه خلي نطلع ما نضل هنا بسرعه جمعوا الغراض ...

مريم اتريد تفتهم من بابا بس منفعل حيل حته وجهه احمر ويصيح بسرعه كمنه نجمع بالغراض ومانعرف شكو...

بعد ملحت مريم علي حجه بعصبيه والعيون حمر ...

... هذا الكلب ابو سمير يكول لو اطردك لو تنطيني بنتك اتزوجهه بالسر وحته اذا ما انطيتهه غصبآ عنك اخذهه وادفنك بالبستان...

... يامريم العذراء وشكتله يا ابو دانيال ..

... لو اعرف يفصل راسي عن جسمي ما اخلي يشوف اظفر منهه سولفت لابو عمر ودبرلنه سياره تطلع بليل يوميه عوائل يطلعون منا بس مانعرف وين تاخذنه

... يا رجال وين انروح هاي المنطقه امنه ولكينه شغل بيهه...

... لا خلال 24 ساعه تسقط الدواعش ماخذين الانبار كلهه واحنه نايمين هنا كولشي مانعرف وهي برا بس دخان المدافع ...

... بيسان... اسمع واغلي بداخلي خاصه من ابو سمير الحقير شلون يتجرأ ويحجي هيج ليش استغل ضعفنه مو بشر حالنه حالهم يقبلهه على بناته هيج بس هم عدهم عرض واحنه ماعدنه ياخسيس الرب ينتقم منك ...