اسمعني صوتك

البارت 1

# البارت الأول....
#اسمعني صوتك
# للكاتبه روزايه....

اقليةٌ نحن حكم علينا
نعيش بالهامش ونسير جنب الحائط وشضايا الكلام والام تلاحقنا
اين نذهب واين نسير في بلد يمجد المال ويبجل الكثير..
اقليةٌ نحن...
درجاتٌ سلم يداس علينا فنمحى وننسى
هذه هي دورةُ الحياة في بلدي!!..
رفعت الاقلام وجف حُكمنا..

الموصل ... بعشيقه ... الساعه11:45 صباحآ

واكفه قريب على البالكون ومخليه اديه ليكدام مستنده عليهه
دك الجرس للصفوف بدت البنات تتسابق حته تفوت للصف ...

لان هاي المدرسه حيل صعبه وبس تفوت بعدهه اول ماتعبر تسد الباب ومتقبل وحده تدخل وراهه والي تدخل بسرعه تروح للمديره ....

اني اخر وحده دخلت بين ماخلصت الهوسه لميت كتبي ودورت رحلتي خاف ناسيه كتاب  خليت جنطتي على ظهري وطلعت من الصف ..

جان هذا اخر درس عدنه الي هو اسلاميه واني مسيحيه فما احضر الدرس كل البنات حبابات وابد ماحسسوني اني اختلف عن دينهم اكو هوايه مسيح بالمدرسه بس صدفه بشعبتي بس اني....

ضليت كاعده بالساحه انتظر شوكت يدك الجرس حته نطلع للبيت الدوام الثاني اجه واشكال البنات واني عيوني تعبت من كدما ركزت وسجلت مواقف وحفظت ...

دك الجرس يعلن انتهاء الدوام ركضت لصديقتي سجى هي مسلمه وقريبه على بيتنه بالشارع الثاني  ...

جانت الشغله الحلوه احنه مسيح وكاعدين بمنطقه بيهه اسلام ومسيح وصابئه ومختلف الطوائف بس علاقتنه حلوه ابد ماكو حزازيات ونفاق الكل متعاون وناس تحب ناس ...

الموصل محافظه عريقه تجمع كل الطوائف والقوميات بيهه السني والشيعي والمسيحي وغيرهه ...

ابد مايوم حسينه احنه وجودنه هنا مهدد او مو مكانه بالعكس بابا مايعجبه الكعده غير يم جيرانه بيت ابو عمر  الي همه سنه...

امشي بالطريق ويه لمه بنات ومن انشوف المدرسات انقلد على لبسهن ومشيتهن وشايلات علاليك تعبانه واتخيل نفسي اصير مدرسه والبس احسن لبس وما اخلي الطالبات يقلدن عليه ...

جنت صف رابع علمي داخلي نظيف ونقي ماكو شي افكر بي بس دراستي بحيث بس اخلي راسي على المخده اغط بسابع نومه ....

وصلت للبيت قبل سجى لان بيتهم ابعد شويه نزعت حذائي بباب  المطبخ وخليته بالدولاب ودخلت لكيت بابا كاعد يريد يتغده واخويه الصغير دانيال مرتجي على رجل بابا وبس حافظه الخبز بصفه...

مريم الي هي مرت بابا واكفه تصب بالغده وتنزل بالمواعين التفتت عليه وصاحت  بيسان ع السريع بدلي وتعالي ساعديني...

ركضت بدلت وغسلت واجيت وياهه بدينه نتغده واللمه الحلوه وعائلتنه الصغيره افرح بيهه من اشوفهه هيج وادعي الله يحفظهم ...