اسمعني صوتك

البارت الاخير

البارت الاخير...
#اسمعني صوتك
# للكاتبه روزايه...

لو تدري إنتَ شگد مُهم !
مثل الكرامه الـ تنقري بـ دمع الزلِم
...

مسك... مروه تنزف وشفايفهه بيض والحجيه تصيح ماتت خليت راسي على صدرهه ماكو نفس مدري اني مرتبكه ....

الحجيه خلت راسهه بحضنه وتصيح سوده بوجهي يابنيتي ضلمج زيد كومي والله اخلي يبوس اديج....

ضاغطه على الشريان وايدي ملطخه دم فتح الباب زيد يركض دنك عليهه هزهه حركهه ماكو اي ايعاز شالهه وهو يصيح جيبي حجابهه ....

ركضت ورا لبستهه حجاب بسياره جانت جوا ماماخذهه اخذتهه الحجيه وراحوا ماكدرت اروح رجعت على غرفتهه ...

ركضت على الرساله اقراهه والدم مالتهه تارس البيت اخذت الورقه وكعدت على الجربايه اقره ودموعي تنزل وادعيلهه كون مابيهه شي...

مروه... زيد حبيبي سامحني هوايه سويت اخطاء بحياتي هوايه نصحتني وماسمعت كلامك ...

زيد اني متندمه حيل واحس نفسي ضايعه مابيدي اي شي انت حته ماتباوع بوجهي وكل كرامه ماضلت عندي....

زيد اني احبك حيل مايوم باوعت لغيرك ولافكرت باحد من عمري 11 سنه واني روحي معلقه بيك ...

رغم هاملني وماتحبني بس ابد مافكرت اخونك ولافكرت اطلب الطلاك لان مجرد اشم عطرك بغرفتي هاي اكبر امنياتي ...

بس لهنا وتعبت مااكدر اكمل اني وحده تافهه وجبانه وماعندي شخصيه وهوايه سببتلك مشاكل وحرجتك كدام اهلك ويكولون مرتك موخوش...

سامحني حبيبي اني راح اروح يم ربي هو يرحمني انت مارحمتني طول هاي السنين ولا ابوي ولا اختي ....

زيد اني احبك حيل عشت ملكه بيوم الي اجيت نمت يمي واخذتني بحضنك سامحني وابريني الذمه وعيش حياتك واتونس اني مامحملتك ذنب.....

مسك... سديت الرساله طبكتهه واني امسح دموعي تنزل بغزاره والله ماكرهتهه ابد وشكد حبيت نكون اخوات...

ابد ماحشيت براس زيد والله ودائما اكول خطيه بس استغلت طيبتي وحاولت توكعني بمصيبه...

اذا ارجع للواقع هي ماجانت ناويه تعترف لومازيد كشفهه يعني واضحه نيتهه ...

مسحت دموعي وكمت مسحت الدم من الكاشي انتبهت على الميز مالتهه مرتب العطور بجهه والمكياج موهوسه ...

مرتبه الغرفه والفرشه عبالك عروس بيوم سبعتهه مسكينه اكيد وصلت لمرحله ماتتحمل بعد...

اخذت التليفون دكيت على زيد ماجاوب كلبي نار عليهه رجعت دكيت على الحجيه اجاني صوتهه وهي تبجي...

... خاله بشري شلونهه
... ولج مسك ماوكف النزف ويكولون نبضهه ضعيف ادعيلهه انتي يتيمه كلبي مفرفح عليهه....