#ذات_إنتفاضهه1
شوف ي ولدي الله دة شافو بالعين ولا بالعقل؟
بالعقل ي حبوبة!!
انا ي ولدي م ضدك ولا ساعيه لي خراب ،والبت دي في النهايه بتي ومصلحتها عندي فوق كل شي لانها امانه في رقبتي من بتي الله يرحمها ،والامانه حملها ما هو هين ي ولدي والحاجه البتضر البت دي ضررها لي انا بكون مضاعف💔
،البت دي انا شوفته النار العاشت فيها امها اللي هي بتي بعيوني ديل،البت دي من جحيم ابوها جات لي جحيم راجلها وعلى نفس المنهج بالزبط ،وراجلها في يوم عمل فيها نفس عملتك دي ختاها امام الامر الوقع وعرس!! طبعاً نحن إن جينا للحق مااا حرام دة حقك الشرعي ربنا محلل ليك 4بدل واحدة
،المشكله كانت في إنو م احترم وجودها دي في حياتو ولا وجود نسوانو القبليها،لا شاورهن،لا قال ليهن صرفاً ولا عدلاً،حتى هن سمعن بعرستو دي سمع ومن غريب كمان،ياخ خليك منهن هن ابوها المربيهو ورامي بخيرو عليهو م ختاهو في الصورة!!!
والحاجه دي المرة إن م كانت راكزة ماااااا بتحملها،وبتي الله يرحمها قلبها كان رهيف شديد من ريدتها ليهو اااخر حاجه اتوقعتها انو يجيب فوق ليها ضرة م استحملت الحاجه دي وزاد عليها الطين بله انو بقى م شغال بيهم ولا جايب خبرهم في الشهر يعدي عليهم مرة واحدة ويوم الجاهم غير الضرب والنَهري والعياط م عندو شي، وي ولدي شان م ادس منك في الأخير بتي فقدت عقلها بسبب الموضوع دة،اااي يعني جنت عديل ونحن لغاايه اللحظه شهد دي داسين منها الموضوع دة💔جرينا بيها للشيوخ م خلينا رقيه شرعيه م عملناها ليها م خلينا شي بس الموضوع م جااااب نتيجه لغاااايه م دخلت التراب!!!💔
اسع انت بتقول لنفسك انا بحكي ليك الكلام دة لشنو صِح؟
انا بقولو ليك عشان م بدور اشوف البقت في بتي تبقى في بتها ابداً ي ولدي، انا عارفه إنك م كعب وزولاً كويس م بتتقارن بأبوها الله يرحمو لكن القلب كعب ي ولدي،والعاشتو البت دي في عمرها م اظن زول عاشو ،لما عمرها كان15سنه ابوها وجدها الله يغفر ليهم من حقها غصبوها لواحد دكتور قدر ابوها اها داك طلع مريض نفسي عزبها عذاب جهنم المويه حارة بتغلي كان بشربها ليها بكوز الإستيل ،حابسها في مكان نحن زاتنا م عرفنا ليهو درب امها دخلت تحت التراب 40يوم هي م عندها علم بالحاجه دي،
بعد جري وتعب قدرنا طلقناها منو بالمحكمه وتعال شوف الدخلت فيها بعدها ،البت الاسي قدامك دي نحن كنا بنربطها بالجنازير في السرير،وتعدي الليل والنهار تصرخ،جننها الراجل واهلو الله لا جاب عقابهم،قدرنا عالجناها وعرسنا ليها ود الجيران ،ولد خلقه واخلاق لا يوم شكت منو لا شافت منو شينه بس زي م بقولو الطيبين مااا ليهم مكان في الدنيا دي
ي امي ما...؟؟؟
انت اسكت ي التاج خليني اكمل كلامي للنهايه!
شوف ي ولدي البني ادم دة زي البحر،بفضل يمَشي كل شين وسمح و بعدي عليهو لغااايه م يصل القيف،"والقيف دة حد البحر"!!!انا البت دي مش ربيتها بيدي؟عااارفه المعاناة العانتها لغايه اللحظه دي ،والجبر الاتجبرت عليهو في اااااي شي عدى عليها ،انت زاااتك نحن جبرناها عليك وإتماشت وإتأقلمت معاك وادتك الأمان شان م عندها خيار تاني غشوها بي ولدها ومستقبل ولدها ،شاهد الله وقت م تتصل علينا نسالها منك تشكرك لينا انت واهلك م حصل جابت سيرتكم بشينه💔،اها ي ولدي تقوم انت واهلك تجازوها كدة؟كدة بس وريني قصرت منك ومن اهلك في شنو؟عيبها لي في سطر مالها ؟ عفنه،ولا وسخانه؟عليها حركات نسوان الأولاد دي؟في زمتك ليوم الدين بتنا دي شوفته فيها شي كعب؟
ي حبوبه والله ي حبوبه الدنيا دي كلها إن بقت كعبه شهد م فيها شي كعب،ولو الدنيا دي كلها شافتها كعبه انا م بشوف فيها غير كُل خير،ادوني فرصه اوضح ليكم موقفي الزواج الحصل دة على ورق وشكلي بس م اكتر وانا إتجبرتهه عليهو و...
ماف راجل بتجبر على عرسه ي ولدي،العرس دة بالذات تحديد مصير وانت مخير فيهو ، وعلى المبدأ دة اسع انا بقول ليك الطلاق برضو تحديد مصير انت اتجبرته على العرسه دي ونحن بتنا م بنجبرها على العيشهه معاك ابداً ،لا بنخاطر لا بنخليها تعيش في جحيم،الحاله الاتصلت علينا بيها وهي تبكي وتكورك لحرقه زي المات ليها زول خلتنا نركب ونلحقها عارف ليهه؟شان قلبها رهيف برهافه قلب امها وان جبرناها على العيشه دي م اظنها تسلم شان كدة الموضوع في يدها وهي مخيرة فيهو إن دايرة تعيش معاك كدة مالو ي ولدي تقعدو في بيتكم وتعيشو حياتكم،وان ابت وقالت م دايرة العيشه معاك م بكذب عليك م بنجبرها عليك والله لكن في الأول والأخير هي عندها حريه الاختيار!!!
ي حبوبه افهميني شهد حاليا في وضع م منطق يتخته اي قرار في يدها،خالي التاج قول حاجه
والله ي صهيب ي ولدي انت م خليت لينا حاجه نقولها دخلتنا في وضع صعب شديد حالياً اي حرف يطلع مني محسوب علي والبت دي انا لما جبرتها عليك قلته ليك شنو؟املي في الله وفيك انت صح ولا غلط؟
ياخي على الاقل انا خالها وانا واليها اتصل علي خُتني في الصورة ،قول لي حاصل كذا وكذا وكذا شان انا زاتي اقدر ابرر ليك ،م كدة ي ولدي والله عملتك بطاله وعيب شديد لا إحترمته وجودها معاك في بيت واحد لا إحترمتنا نحن اهلها سمح اسي جاي تقول لي قول حاجه كيف؟اقول شنو يعني؟اعفي لي لكن القول قول شهد بعد كدة والله 💔ي امي ناديها عليك الله خليها تجي تفكنا من الموضوع دة ،
