#ذات_إنتفاضهه11
راحتي النفسيهه مكانها هنا بين يديك ممكن م تبعدي ابداً ي شهد؟
فضلتهه ساكتهه وهو لسهه كان بضغط على يدي اكتر لغاايهه م حسيتو شبه نام بس برضو هان علي ارفع راسو اتحرك من محلي صلحته قعدتي وفضلته صاحيهه وانا بعاين ليهه،فجأة كدة حسيتو بتكلم براه وشبه بتشنج وراسو معرق شديد ،بقيت احاول اصحييهه وبقول ليه صهيب،صهيب في شنو،صهيب فتح عيونك وهو لسه كان برجف وبقول كلام م مفهوم ابدا ،وجسمو بقى زي المكوى،بقيت م عارفه اعمل شنو وفي يدي ماف تلفون ولا اي حاجه ف كل الكنت بعملو اني بحاول اصحي فيييهه،اخر فكرة خطرت لي إني اجيب مويه واعمل ليهو مكمدات ،جريت المطبخ جبته مويه وشلته لي قطعه وبقيت امسح على جسمو وراسو وبصحي فيهو وخلاص دموعي جات جاريه من حالتو الهو فيها،كان من شدة م برجف حتى اسنانو بتضرب في بعض،إستمر على الحاله دي نص تقريباً ساعهه بعدها فتح وانا بضرب فيهو على وشو،،
كان مفزوووع شديد قعد في نص السرير ،قولته ليهو بخلعه صهيب في شنو مالك؟قال لي ماف شي،قولته ليهو لا اسي حالتك الكنت فيها دي م حاله زول كويس قول لي في شنو؟
قال لي من الإرهاق بس عايز ينزل قولته ليهو ماشي وين؟قال لي عايز اشرب مويه،قولته ليهو دي المويه هاك،اديتو شرب ،بس برضو علامات الخلعهه والهلع كانت باينه في وشو،
رجع رقد قال لي يلا نومي،قولته ليهو لا،جراني ورقدني جمبو ولفهه يديهو حوالي و قال لي انا كويس م تساهري عشاني سااي يلا غمضي عيونك وصباح الله بخيرو
حاولته انوم بس م قدرته عملته نفسي مغمضه وفضلته مراغباهو لغايه م نام وبعدها بقيت طول الليل سرحانهه في تفاصيل وشو وفي راسي مافي شي غير إنو بحمد ربنا على رجعتو حتى م مستوعبه كويس انو صهيب قدام عيوني وماخدني في حضنو بعد الحصل دة كلو،الحمدلله الحاله ديك م رجعت ليهو تاني وانا فضلته صاحيه لغايه م الصبح اذن بعدها جاتني غفوة كدة شلته راسي وختيتو في كتفو ونمتت،
وانا نايمة فجأة جاتني صحيهه،فتحته عيوني لقيت صهيب ماف جمبي،نزلته طلعته برة على الهول برضو لقيتو ماف،دخلته المطبخ وباقي الغرف والبلكونه ماف ليهو اثر،قولته يمكن يكون طلع البقاله او الشارع او كذا،دخلته الحمام استحميت وجيت طالعه والزمن كان م بدري يعني عزز النهار،فضلته منتظرة اكتر من نص ساعه م جا،إتزكرته إنو محمد قال ليهو حأجيك الصباح نمشي على ناس امي،يمكن جاهو وانا كنت نايمة وم حبة يصحيني ف مشى،
قريب العصر كدة باب الشقه ضرب،جريت مستعجله حتى طرحه في راسي م شلتها قلته معناها دة هو جا راجع،اول م فتحته الباب اتفاجأ بي احمد ،
قال لي السلام عليكم،قولته ليهو اهلين وعليكم السلام صباح الخير،قال لي مساء الخير ههه معليش إتأخرته عليك بس والله ي شهد حلقي نشف ورجولي دي إنتهت من الوقفه ،
قولته ليهو م مشكله بس إتأخرته علي في شنووو؟
قال لي صهيب إتصل علي من الصباح الساعه7صباحاً تقريباً وقال لي تمشي تسوق شهد توصلها البيت،قولته ليهو انت وين ي زول قال لي انا في القيادة إتخيلي بس؟
طبعاً انا مصدومه قولته ليهو صهيب قال تسوق شهد توصلها بيتهم؟
قال لي اي والله ومن الصباح شوفتي من الصباح؟انا معاهو في القيادة بتكلم معاهو ياخي حتى امو م مشى شافها ولا شاف حالتها ولا فكر فيها حتى يعني والله م قدرته افهم هو مجنون ولا مشكلتو شنوو بالزبط،
قولته ليهو طيب هو بعمل شنو في القيادة؟
قال لي قاعد في الترس بتاع التفتيش،انتي عارفه نحن لقيناهو كيف؟
قولته ليهو كيف؟
قال لي انا اصلاً بمشي القيادة وبشيل معي حجات مويه وبارد وعصير وكيك بعربيتي،ويومي بجي ماري بالتفتيش دة وبتفتش طبيعي،امس مشيت شايل حجاتي وداخل،اشرته للشباب عشان يدخلوني جاني هو ومعاهو واحد تاني ،طبعاً انا قدر م اقول ليك اتصدمته م حتقدري تصدقيني انا إنهرته عديل وديني م كنت مصدق حتى وانا شايفو قدامي حسيتو خيال او زول شبيهو ،هو زاتو اتخلع بشوفتي،نزلته ليهو قولته ليهو صهيب؟ ياخ انا بقيت اصرخ وابكي زي الشافع كل الناس بقت مستغربه انا مالي ف حصل تجمع كبير من الناس،بعدها ساقونا على جنب بعد م روقته بديت اتكلم معاهو وبسال فيه كنت وين ي زول وم سمعته بخبر موتك ليه م جيت طالما انت عايش وبتاع إتهرب وم جاوب ابداً،قال لي م تكلم زول من ناس البيت انك لقيتني،كان رافض تماماً انو زول يعرف حتى إنتي زاتك،كان باين عليهو إنو تعبان شديد رغم ذلك كان واقف وم بخلي عربيه تمر من غير م تتفتش حتى وانا بتكلم معاهو هو بوصي في الشباب وبأشر ليهم ،قولته ليهو ارح بيتك رفض قال م راجع ،قدر م حاولته معاه ي شهد وبالساعات رفض ،إضطريت اتصلت على محمد واكلمو،بالفعل م عدة 5دقايق جا علينا لأنو شغال في عيادات القيادة،محمد م اتصدم زي صدمتي تقريباً لأنو كان متوقع ظهور صهيب وم مقتنع بي ميتو زينا نحن ،المهم بعد محاولات إقناع ونشاف ريق ي شهد قال لينا خلو الساعه12تجي وانا بمشي ارتاح خلاص انتو امشو،قلنا لا م حنمشي نخليك،بالفعل م مشينا خليناهو فضلنا واقفين معاهو في الترس ي شهد لغايه الساعه 11ونص جات حتى محمد قال ليهو يلا نمشي بس اخد ليك حمام وغير ملابسك دي وإرتاح شويه وتعال راجع،إتزكرنا انو الشقه م عندنا ليها مفتاح إنتي بس خطرتي على بالنا،حتى قال لو حتكلموها انا م بمشي البيت وبرجع القيادة ،محمد قال ليهو حيمشي احمد يجيب منها المفتاح بس وم حيكلمها،بعدها حصل زي م شوفتي إنتي،اليوم الصباح إتصل علي داقي جرس في حكايه إني كلمتك وكدة هههه المهم اسي رجع وقف في ترسو💔
دموعي جات جاريه وانا بسمع في كلامو،قال لي م عندو عقل ياخ حيرنا اقسم بالله يعني اسي دي عمايل زول عاقل؟انت غايب من اهلك عندك اكتر من شهر لا حس لا خبر لمن ظهرته تعال شوف الحاصل على الخليتهم وراك ديل ساي ،حتى م كلف نفسو ورانا الحاصل عليهو شنو ولا جاي من وين ولا كان وين رغم المحاولات بس راكب راس وساكت وسرحان،قولته ليهو طيب خلوهو براحتو المهم انو رجع بخير،دقيقه اجهز نفسي علشان نطلع،قال لي طيب،
اتحركته منو ودخلته الغرفه وانا العبرة خانقاني،بكيييييت كداااا لمن بقيت اتنهد بعدها دخلته غسلته وشي ومسحته وجيت طالعه قولته ليهو بصوت مبحوح يلا،قال لي يلا،طلعنا اول م ركبنا في العربيه وإتحركنا قال لي هو بسمع كلامك رايك شنو اسوقك تتكلمي معاه،قولته ليهو اتكلم معاه اقول ليهو شنو ي احمد؟انا م هتكلم معاه ابداً انا كان بهمني اعرف انو بخير والحمدلله عرفتهه وبس،
احمد قال لي طيب تمام ،
انا من الزعل والغبن الفيني بعد سماعي لكلام احمد راسي عايز يطق ،حتى م فتحته خشمي معاهو بحرف لغايه م وصلني البيت،
قولته ليهو إتفضل ادخل البيت،قال لي لا والله ماشي على عجلهه البيت،قولته ليهو طيب،اول م نزلته واديتو ضهري دموعي جات جاريهه عشرة عشرة،وقفته مسااافهه وانا بمسح فيهم بعدها دقيت الباب،بعد مساااافهه جات حبوبه فتحتو لي قالت لي ي بت امس تمشي بيت اهلك وم تكلميني ؟انتي شايفاني شنو؟قاعدة صنم ؟كان شايفاني صنم اتكلمي،
قعدته في السرير وبقيت ابكي،قالت لي مالك كمان في شنو؟مشيتي ليهم سمعوك فارغ مش؟الوداك ليهم شنو؟دايرة منهم شنو اتكلمي؟
عملو ليك شنو كدة قولي لي بتكلم معاك انا ي بت!!!قولته ليها ماف شي ي حبوبه،قالت لي سمح جايه بتبكي مالك كان م عملو ليك شي؟
قولته ليها صهيب جا😭😭😭
قالت لي بصرخهه شنوووووو؟الليلهه ووووووووب علينا الليلهه وووووووووووب جا كيفن؟قام من قبرو وجا راجع اهلووو؟
قولته ليها حبوبه م كدة ياخي وكملته بكى
قالت لي اها جا كيفن في زول ميت بجي راجع تاني؟اجي يخواني ي بت انتي جنيتي ولا شنوووو؟
قولته ليها حبوبه م جنيت ولا شي بس اصلاً الميت داك م هو وانا كلمتكم دي لعبه عاملاها الحكومه بس 😭💔
قالت لي يعني ابوهو مكضب في موضوع وفاة ولدو؟دة كلام شنووو دة يخواني دي م فضيحهه ليهو اسي؟؟
اها كدة وريني جا من وين وكان وين هو زاتو واتفكا من الجماعه ديل كيف؟
قولته ليها م عارفهه،قالت لي م حكى ليك؟قولته ليها لا،كريم ولدي وين؟بالت لي طلع مع مرت خالك على الجيران كدة
قولته ليها طيب قمته على حيلي،قالت لي تعالي احكي لي الحاصل ي بت اسي انا م فهمته منك شي،
قولته ليها حبوبه والله م قادرة احكي شي لاني م عارفه شي ومشيت خليتها ،دخلته غرفتي وقفلتها علي وقعدتهه ابكي،بكلام احمد القالو مسخ علي كل لحظهه عشتها معاهو امس وانا الخطر على بالي اني اتنازل وكل حاجهه بينا ترجع احسن بس يلا كويس انو الحاجهه دي جات منو هو قبل م انا اتهور😭😭😭😭💔
عدة يومين وانا دخلته في كومه إكتئاب اكعب من الأول،حتى القيادة الكنت بمشيها مع بلسم بقيت م بمشيها وم طايقه المشيه ليها عشان هو فيها،وم حكيت لي بلسم اي شي
في يوم براها جاتني جاريه بعد المغرب وبتصرخ لي بأعلى صوتها حتى حبوبه قالت ليها في شنو ي بت بسم الله؟قالت ليها شهد وين؟جيتها طالعه،قالت لي تعالي مسكتني وقالت لي شوفي دة مش راجلك؟ياهو ولا م ياهو الما بغباني؟قولته ليها الصورة دي متين؟
قالت لي من امس بالليل حصل هجوم على شباب المتاريس الفي شارع الجامعه واتصابو كذا نفر وهو من ضمنهم،انا اتخلعته بشوفه الصورة دي البت المتصورة معاهو دي ضمن اصدقائي وشوفته الصورة بالصدفه،
قولته ليها بخلعه يعني كيف يعني هجوم؟يعني ضربوهم رصاص؟دخلته بسرعه لبسته لي اقرب توب وجيت طالعه قولته ليها حبوبه عايزة قروش،قالت لي ي بت ماشه وين بعد المغرب دة إنتي جنيتي؟قولته ليها حبوبه بقولو ليك مضروب رصاص شوفيهو كيف يعني م امشي اديني قروش،دخلت جابت لي قروش قالت لي غايتو لحمك في الدنيا دي نشف نهائي شلته تلفونها وطلعته ولحقتني بلسم ،قالت لي شهد فهميني الحاصل شنو يعني بجد دة راجلك؟طيب جا متين؟بعد م سمع بخبر إعتقال ابوهو ؟قولته ليها شنو؟ابوهو إعتقلوهو؟قالت لي من اول امس اعتقلو نصهم ،فتحته التلفون وانا ماشه مستعجله وقلبي حيطير من الخوف وإتصلته على احمد،لما م رد رجعته اتصلته على محمد فتح الخط قولته ليهو محمد انت وين؟قال لي اهلين شهد ،قولته ليهو لما صهيب إنضرب رصاص ليه م كلمتوني؟
قال لي فعلاً والله ي شهد الكلام دة من امس لكن،قولته ليهو يعني انضرب بجد؟طيب هو كيف اسي وووين بالزبط ؟قال لي اهدي كويس والله م عندو عوجه،قولته ليهو مرقد وين انا جايه؟قال لي في رويال،قولته ليهو طيب قفلته منو واقرب عربيه وصلتنا رويال،كنت داخله وم شايفه قدامي إتصلتهه على محمد قال لي جاي عليك،جاني قولته ليهو وين صهيب؟قال لي والله والله كويس انتي بس ساعدينا بهدوئگ،قولته ليهو بنرفزة محمد دخلني مكان م صهيب قاعد،بلسم قال لي شهد روقي،انا اعصابي كانت بايظهه وماف زول حيتفهم الحاجه دي،قال لي طيب تعالي ،طلعنا كم طابق حتى وصلنا اول م فتح باب الغرفه دخلته قبليهم ف اتفاجأ بي إنو راقد في السرير وقاعدة جمبو بت وكانت بتقول ليهو كدة تمام ي سيدي الضماد زابط شد لينا حيلك انت بس،
بقيت اعاين ليهم وراسي متلخبط متخيلين معي يعني إحساس إنك جايه مخلوعه ومجوعه لزول علشان حاصله معاهو حاجه معينة وتشوفي منظر زي دة قدامك شي طبيعي انو مشاعرك تتلخبط ،محمد جا داخل قال ليهو م تعاين لي والله انا م جبتها انا زاتي م عارف الوراها منو،البت عاينت لي وقالت ليهو غايتو انت ي شيل شيلتك الليله وصراحه تستاهل لأنك م بتفهم وانا شاهدة وبعدها ضحكت كانت لابسه بنطلون ضييق ومعاهو فنيله وبفوق لابسه اللابكوت ورافعه شعرتها لفوق ولابسه نظارة ولونها قمحي كدة طبعا تركيزي كان مشتت،من كلام محمد عرفته انو هو برضو القال ليهم م تكلموها
قولته ليهو بصوت مبحوح حمدلله على سلامتك،قال لي تسلمي،قولته ليهو إنضربته كيف وانت البخليك تمشي مكان بضربو رصاص شنووو؟دموعي في طرف عيني بقو علي 2وجع وغيرة،
قال لي حاجه بسيطهه وبعدين م نحن البنمشي للرصاص الرصاص بجينا في محلنا،قولته ليهو رصاص وحاجه بسيطهه يعني انا نفسي انت بتفكر باي عقل انت؟
البت قالت لي حبيبهه انا اسفهه بس هو محتاج راحهه ،
محمد قال لي شهد قصدها تقول ليك م تضغطي عليهو ،
قالت لمحمد بصوت خافت بعدين انا قولته ليك زمن الزيارات انتهى بتبالغ طبعاً انت،
فجأة جا احمد.داخل اول م شافني حول عيونو يمين وشمال بعدها قال لي شهدو،قولته ليهو اهلين ☺قال لي كيفك؟قولته ليهو الحمدلله وحمدلله على سلامتو،مسح راسو بيدو وقال لي الله يسلمك الحمدلله طلع منها سالم يخخخ والله،
محمد قال ليهو وصلته ناس امي بسرعه كدة؟احمد قال ليهو اي والله ياخ الشوارع فاضيهه طيرته بيهم طير وجيت راجع😅💔
فجأة صهيب قال ليهو كويس إنك جيت راجع عشان توصل الجماعهه ديل،انا مستغربه في تصرفاتو الباهته البعمل فيها دي عاينته ليهو بإستغراب وهو لما قال كدهه عيوني دمعت وكنت على وشك إني ابكي قدامهم بس إتماسكته ووقفته على حيلي وقولته ليهو لا نحن حنمشي برانا ،محمد قال لي ي زوله على وين؟قولته ليهو نمشي والله اصلاً نحن كنا ماشين القيادة فلما سمعنا قلت احسن نطل عليهو بس يلا مع السلامه طلعته وانا م شايفه قدامي وفي حاله اسوأ من الدخلته بيها صهيب حتى م كلف نفسو ويفتح خشمو ويرد علي☺احمد ومحمد.جو طالعين وراي،محمد قال لي م تزعلي واعفي لينا م كلمناك لأنو...قولته ليهو لأنو صهيب قال ليكم م تكلمو شهد صح؟
قال لي م تحسبيها كدة بس هو م بحب يخلعكم والله ناس امي زاتهم م عارفه قدر شنو انهارو،امي بقو عليها2 عرفت انو هو عايش ومضروب رصاص،حبوبه وامي من الصباح 4دربات ي دوب احمد رجعهم البيت معاهم امتثال،
قولته ليهو م مشكلهه،قال لي كبري عقلك ي شهد م اي حاجه تعايني ليها من ناحيتك انتي بس💔قولته ليهو يلا ي جماعه نحن نمشي،احمد قال لي مش ماشين القيادة؟خلو انا بوصلكم،قولته ليهو لا بنمشي برانا ،قال لي لا بوصلكم والله،حلف علينا ونحن اصلاً م ماشين القيادة بس مشينا غصب علشان انا كذبته وإتحججتهه بيها،
قعدته مع بلسم بقت تتكلم معي قالت لي البت فرستني طبعاً دي شنو اللتيخهه دي؟
قولته ليها بت منو؟قالت لي العامله نفسها دكتورة مع راجلك دي،اي انا ضايفاها عندي في الفيسبوك بس كرهتها،
قولته ليها حال اي دكتورة مسؤله من مريضها،قالت لي لا ابدا انا دكتورة قدامك وعمري م اتصرفته مع مرافق او غيرو بطريقه م حلوة،دي كانت اووووڤر،وبعدين دة راجلك م حي الله يعني غصباً عن عين ابو اهلها انتي المفروض تكوني المرافقة حقتو مستغربه فيك انتي طلعتي خليتيهو وراك زي الغريب الجاي زيارة وطالع على كول ليييهه؟
قولته ليها بلسم اقفلي على الموضوع دة وخلينا نقوم نشيل اكياس الزباله دي وننضف مع الناس،
قالت لي حتجلطيني💔💔💔
