#ذات_إنتفاضهه9
بس انا معاك تماماً في قصه انو الجثهه دي ابداً م جثهه صهيب، بقيت ابكي قولته ليهو الحمدلله انو لقيت زول فيكم استوعبني بس انا كدهه خفتهه عليهو اكتر يعني حيكون الحصل عليهو شنو؟يعني صهيب لو فعلاً موجود ومختفي عن قصد مع الاشاعه بتاعه ميتو دي كان ظهر صح؟راسي حيتفجر من كتر التفكير في الموضوع ي محمد والله حيتفجر😭😭😭
قال لي عايني اهدي انا م كنت عايز اتكلم معاك بخصوص الموضوع دة علشان عارفك حتنفعلي،قطع شك صهيب م مختفي تعمد منو،حالياً انا ومعي كم صاحب ليهو شغالين في الموضوع دهه عشان نعرف هو وين بالزبط والحاصل عليه شنو والحاجهه دي وراها منو والهدف من القصهه دي شنووو،لكن عشان اخطي خطوة جادة تجاه الموضوع دة انا منتظر نتيجة الفحص،بس عليك الله الموضوع دة م يطلع من بينا م عايز زول من ناس البيت يعرف ولا بأي شكل من الأشكال وم عايزين نستعجل في حاجه،
قولته ليهو طيب عليك الله ي محمد اي شي يحصل معاك وريني ليهو اول بأول،
قال لي حاضر ابشري وإن شاءالله م يحصل الا كلو خير،
قولته ليهو ي رب ي رب ي محمد،قال لي بطلي بكى وادعي ليهو ،قولته ليهو حاضر🌸
بعد م قفل مني انا ي دوب كدة الخوف اتملكني كويس وقلبي اتقبض على صهيب اكتر،يعني كل الافكار السيئة الممكن تكون حاصلهه ليهو بقت تخطر على بالي وانا م في يدي شي😭💔
مرت الايام والحال زي بعضو،مواكب ورا مواكب رغم حالات القمع والبطش والتنمر على المتظاهرين والمتنمرين،
في الفترة بتاعه حاله الطوارئ المتظاهرين لاقو اسوا انواع العنف من قبل الاجهزة الامنيه،تقريباً كانو كان مدينهم الحريه المطلقه في البلد دي،كان كل م يزيدو جرعات العنف بزيدو غضب الشارع اكتر..
طبعاً نحن اتعودنا انو م كل المواكب نحضرها في الحي حقنا بنغير مرة هنا ومره بنمشي حتات تانيه ،انا يوم م اكون طالعه موكب في حته تانيه،بشتري شكارات مويه كميه من البقاله من غير علم حبوبه طبعاً وبجيبها لخالتو بسمة تختها عندها في التلاجه علشان توزعها على الناس،إضافه للكمامات والخل،وبلسم بتجيب إسكراتشات وطبيعي عمتو بسمة بتجهز ليهم اكل،
انا تقريباً كل حاجه اتزكر صهيب كان بعملها وبدعم بيها المواكب انا كنت بعملها وبزيادة ،كنت بحس بالراحهه لما اعمل كدة،
في يوم طلعنا موكب،وبما انو نحن في حاله طوارئ يعني اي بني ادم داخل مكان ناسو بطلعو مواكب بتفتش،بالفعل ونحن داخلين لقينا إرتكاز كنا راكبين ترحال،وقفو بتاع الترحال فتشونا زين طبعاً التلفونات ولا ابلكيشن م فيها ونضيفهه من كل شي،مررونا بالدعوات بس ،وم كانو شرطه لابسين رسمي لالا كانو جهاز،💔
بتاع الترحال قال لينا اعفن مخاليق الله الله ينعلهم،بلسم قالت ليهو نهايتهم قربت،قال ليها والله قربت شديد،دخلنا وقال لينا انا زاتي حأحضر معاكم الموكب وم راجع،
بلسم قالت ليهو اااابشر اصلا الحصهه وطن وم بتتفوت،قال ليها على قولتك،
طلعنا القروش علشان نحاسبو رفض ياخدهم قال لينا عيب الكلام دة منكم ي كنداكاتنا ياخ،قولته ليهو لا كيف يعني م حتاخدهم؟لا معليش بس م صح منك كدة،قال لي ي زوله قضيتنا واحدة وجينا عشان هدف واحد القرش يطير وحرم م بشيلهم طلاق تلاتهه،
بلسم قالت لي خلاص ي شهد حلف طلاق الطلقهه تقع في مرتو الما عندها ذنب سااي😅ضحك قال ليها م متزوج والله بس برضو طلاق تلاتهه م بشيلهم😂😂😂😂😂👐قعدنا نضحك ودخلنا مع بعض،الموكب كان كبير لدرجه انو اتجاهين بتاعه زلط من حدها كانو مقفلات من البدايه للنهايه،والغريبه انو م جونا ولا اتعرضو لينا،انا كنت حاسه انو في حاجه غلط لانو استحاله نحن نعدي ساعتين ورا بعض هتافات في الشوارع وم يسألونا خصوصاً انو نحن في حاله طوارئ يعني مستحيل مستحيل م تكون في حاجه غلط،دخلنا على الساعه3 فجأة لمحته بتاع المكتبه الجمبنا كان في نص الموكب كان بتكلم بالتلفون قولته ليها بلسم عايني دة مش الولد بتاع المكتبه ؟عايزة امشي عليهو مسكتني قالت لي مالك ومالو يخ بكرة يقعد يمعطنا ساي وممكن يكلم عمار لانو عامل صحبو وكدة ارح ارح،مشينا وواصلنا هتافنا مع الناس ،بعد العصر كدة اتفكهه فينا بمبان خرافي من كل الجهات،كميه تاتشرات دخلت مكان الموكب لا تحصى ولا تعد نحن زاتنا اتخلعنا والشوارع اتفتحت كيف م عارفين ،
الناس كانت كتيرة شديد والبيوت إستحاله تشيلها الاولاد قالو البنات جوة البيوت ونحن حنتصرف ،اقرب بيت لينا دخلنا انا وبلسم ودخلو معانا كميه من الناس،لسؤ حظظنا انو كل عربات الكجر كانت واقفه قدام البيت دة،وكانو واقعين اعتقالات وضرب في الاولاد نحن بنعاين ليهم بقد الشباك فجأة نسمع صوت زول بقول ليهم البيت دة ملان ناس والبيت دة ملان،والبيت دة ملان،واحد دق ليهم التاتشر قال ليهم كرتنو لي المنطقه دي كلها واعتقلو لي كل الفي البيوت ديل،
بالفعل دة الحصل وم كان اعتقال ساي اعتقال ومعاهو ضرب وتعذيب واستفزاز،كان بقولو للأولاد وهم بضربوهم يلا قولو واي ،قولو وااي مش عاملين فيها رجال نحن نوريكم الرجاله دي كيف،
فجأة طلعو بت من بيت كدة ومعاها اولاد،الامنجي كان ماسكها بطريقه مقززة وقذره ،والتاني بضرب فيها،البت كانت بتقول ليهو اضربني لكن م تمسكني م تقرب مني قولته ليك وبتثرخ وهو مسكتو ليها كانت قمة القرف،في ولد معاها قال ليهو فكها ي كلب فك البت دي ي حيوان ،قوله ي كلب دي واحد ضربو في راسو وفي كتفو قال ليهو داير يضربوك بدلها هاك طيب هاك ،ووقعو فيهو ضرب والبت تصرخ والماسكها بلطش فيها
تقريباً دي كانت من اقذر المواقف الشفتها،
الدور كان جاي على البيت النحن فيها،المرة قالت لينا عاينو بدون صوت تطلعو واحد واحد تنطو في بيت الجيران دة عشان لما يجو يلقو البيت فاضي،طلعنا الاولاد المعانا جزؤ مراقب الباب والجزؤ التاني بشيل البنات بنزلهم بالحيطه،
ناس البيت النزلنا في بيتهم امهم قالت م بتتدخلنا بيتها جوة قالت لينا ارجعو ،
الحاله الكنا فيها كانت خلاص احساس انو نحن حنعتقل وحنتحاكم محاكمه فوريه،واحدة من البنات قالت ليها خالتو الله يخليك دخلينا اعتبرينا زي اولادك،قالت لينا قبل يومين انا رامين3بمبانات في بيتي دة اولادي وراجلي عندهم ازمة انا م بقدر والله اتفضلو اطلعو،
طبعاً لو طلعنا بي باب الشارع اعتقال مؤكد،فجاة ولدها طلع من جوة قال لينا تعالو ادخلو ،دخلنا غصب ،قبل م ندخل كلنا فجأة بابهم ضرب شديبييببييد الناس قامت جاريه الامنجيه نطو بالحيطه دخلو علينا البيت بقى عبارة عن حلقه جري،ولد المرة قال لينا السطوح السطوح بجاي،جرينا عليهو والاولاد وقعو ضرب في الامنجيه ونحن جارين جزؤ من الامنجيه جارين ورانا وصلنا السطوح كان قدامنا خيارين نقيف يعتقلونا،نجري وننط في روسين الغرف،في ولد قال لينا يلا يلا م تقيفو،بقينا جارين،بلسم قالت لي م بقدر انط م بقدر،الولد جراها نطت في راس الغرفه وانا وراها ،فجأة اعاين وراي واتصدم،من الخلعه فضلته واقفه جاري وراي وعايز يمسكني بتاع المكتبه الجمبنا وم بغباني،هو زاتو لما شافني اتخلع بقى واقف وماسك بسطونتو وملامح وشو كلها اتغيرت،بلسم بقت تقول لي شهد،شهد اجري جاين ي شهد،كملته جري وانا مصدومه،وفي واحد تاني معاهو كان جاي جاري وراي داك كان سمييين،بلسم والقدامي اختفو م عارفاهم نزلو وين انا بس فضلته جاريه في سطوحات الناس ،جاريه وم عارفه انط وين،فجأة نطيت في مظلهه زنكي كانت بتتحرك براها يعني الامنجي السمين لو جا ناطي وراي بتقع بينا الاتنين وامورنا بتجوط😂😂😂💔لما غلبو ينط وقف قال لي م تقيفي ي بت الحرام😅✌💔كملته جري فجأة لقيت ولد راقد في راس غرفه ومنبطح وشايل ليهو حجار،لما شافني قال لي ديشااااك جايه من وين انتي ي زوله وجيتي هنا كيف؟قولته ليهو وانا برجف ساكيني من السطوح داك،عاين لي تحت اشر لي واحد وقال ليهو بصوت واطي ي اصلي حاجهه خفيفهه هاك إستلم إستلم ،وشالني جدعني ليهو،
انا م صدقتهه انو التحت دة مسكني والله لمن راسي لفهه😂💔
الولد قال لي ادخلي هنا هنا،دخلته الغرفه فجأة اشوف ليك ناس بتتجارى في الغرفه وواحد بنزل في حلل الدولاب وطلع فوق الدولاب ورقد بطولو وواحد راقد في سرير ومتغطي بالملابس لما شافني قال لي غطي لي راسي دة معاك ي بتنا،وواحد تحت السرير بجر في ملايه السرير لتحت وواحد تحت الديكور المشكله انهم كلهم اولاد😂😂😂💔جات بت داخله قالت ليهم شباب اسكتو هس الناس دي قريبهه من هنا،وقالت عايني م لاقيه ليك مكان تتدسي فيهو؟ تعالي معاي،ساقتني ادتني توب لبستو ودخلتني معاها المطبخ وقالت لي لو جو نحن ناس البيت زابط؟قبل م تكمل كلامها الباب دق انا لقيت طشت عدة وسخانه جمبو جردل مويه قعدته اغسل فيها،زول من ناس البيت فتح الباب دخلو لينا بقو يفتشو جو داخلين المطبخ البت قالت ليهم هي في شنو؟انتو كيف بتدخلو علينا في بيوتنا كدة؟
طلعو وفي احد قال ليهم هنا ماف شي ارح نطلع،
طبعا اللحظهه دي انا م صدقته لما طلعو وخلونا عادي كدة وم شكو فينا
