#ذات_إنتفاضهه32
نحن زاتنا م عندنا مرة بتقعد سنه كامله برة بيتها ولا شنو ي حبوبه،امتثال قالت ليهو والله انت الخليتنا يكون عندنا،حبوبه السرة قالت ليهو اياااا والله ي ولدي في اسرتنا دي م حصلت تب،انا إتلخبطته طبعاً بقيت م عارفه اقعد ولا امشي ولا اضغط على صوابعي وم اعاين لزول،حبوبه عشهه قالت ليهو والله ي ولدي امانتك في الحفظ والصون تشيلها الليله قبل باكر كمان،
عاينته لحبوبه بغيييييظ يعني معقوله مستغنيهه عني للدرجهه دي؟اتمنيت الارض تتشق وتبلعني،رفعته عيني لقيت صهيب بعاين لي لما عاينته ليهو رفع لي حاجبو بإبتسامه خبيثه،المشكله إنهم استلمونا واشتغلو فينا نصايح وانتو عارفين لايقه الحبوبات،واحدة من البنات قالت لي على فكرة ولدنا دة نعمه م برفسها الا الجاحد م بقدر احكي ليك رقاد البنات فيهو في صورو البتنزل في السوشيال ميديا😂😂😂امتثال قالت ليها بنحاول نهدي النفوس م.تطبزيها،صهيب بقى يمسح في راسو،وانا هنا إتغظت اكتر على طول قلته ليها الحاجه المتاحهه م حبابها ولا شنوووو😅امتثال قالت لينا نحن نقفل الموال دهه احسن،حسيت بصهيب إتضايق لمن ملامح وشو إتغيرت بس عمل رايح وقال ليها امتثال جهزي لينا قهوة ظريفه كدة عليك الله❤قالت ليهو وااااي ي صهيب انا مرهقهه😭قال ليها معليش ياخ جهزيهااا،قالت ليهو طيب،
امتثال كانت حاجزة لينا عند خبيرة تجميل،طلعنا ماشين الكوفير بعد م وصلنا الشارع امتثال قالت لي عندي حاجه نسيت اشيلها ثواني وراجعه،دخلت وخلتني واقفه فجأة اسمع صوت زول بقول "مدنيااااااو"وم غريب علي طبعاً بس م اتلفته،تاني اتكرر الصوت مدنيااااااااااااااو، اتلفته لقيتو صهيب كان راكب عربيتو م عارفه ماشي وين وبشاغل 😂💔على طول لفيت وشي منو،
مشيينا الكوفير ،قلته للخبيرة انا بس عايزة حاجه تكون على الطبيعه وم تكون اوووڤر شديد عليك الله،قالت لي جداً ابشري❤ياخي مكيجتنا سماحه مكياج انا نفسي م اتعرفته على نفسي هههههههه😂💔
فستاني كان باللون الخردلي مايل لي اصفر وم اصفر،والاكسسوارات كانت رفيييعه بالاسود والشبط باللون الاسود حتى الطرحه سوداء،والبروش حق الشعر برضو بالاسود سرحته براي اصلا شعري فاكاهو ساي بس ماسكه جزؤ منو بالبروش بعد م لبسته كلهم بقو يسالوني القصه قصيتها وين والاكسسوار من وين و...امتثال قالت لي عااااد.النصيحه ي بت امي م فاضيه لأي زول الليله اقسم بالله اريتني لو اخترته لونك دة واااااي😭😭😭ضحكته قلته ليها معليش😂🚶قالت لي م نصحتيني شهد ي خاينه،قلته ليها لونك فستانك دة اسي مالو ياخ خرافي بجد😍فستانها كان باللون "النبيتي"مطقماهو بالاوف وايد هيلز،واكسسوارات فضيه،بعد م خلصنا قلته ليها مش نطلع؟قالت لي اي 10دقايق بس،استلمنا المرايات لغايه م جاتها مكالمه قالت الوو؟اي وصلته؟طيب طالعين طالعين عليك يلا،قلته ليها جايك زول ؟طيب وعربيتك؟طلعت وانا طلعته وراها لما وصلنا الشارع كان اشوف عربيه صهيب وصهيب نازل منها،كان لابس جلابيه ولافي العمه ومع تفاصيلو البتهبل ديك كلها انا قلبي عمل شحححح وكل خطوة بخطيها انا ضربات قلبي بتزيد ،امتثال قالت لي انتي الجايك زول ي بطه،قلته ليها بغيظ امتثاااااال،قالت لي هو القال جاي م انا والله😂صهيب وصلنا وبعاين لي بخلعه كدة وإستغراب وانا بعاين ليهو بهبل وإنبراش كدة ،قال لينا جاهزين؟امتثال قالت ليهو جاهزين اي يلا سوقها وإتكلو وانا بلحقكم بالعربيه،قال ليها طيب،قلته ليها انتي م حتجي معانا؟قالت لي عربيتي اخليها لمنووووو؟يلا امشي وانا وراكم،مشينا على العربيه فتح لي الباب القدامي ركبته وهو ركب وإتحركنا،في العربيه كنا ساكتين لا هو فتح خشمو بحرف ولا انا الا بعد م جينا في استوب كدة وهو كان ماشي سريع والاستوب حيقفل وفي عربيه قدامو هدنت بس هو فرمل ،الفرمله بتاعتو دي انا بسببها شبه إنضربته لانها كانت قويه فصرخته للحظه من الخوفه،قال لي إنتي كويسه؟كدة !!مسك وشي بيديهو وانا بقول ليهو انا كويسه،قال لي متأكدة؟قلته ليهو ايوة خلاص فكني،زح يديهو والاشارة فتحت وكان في واحد وراهو بضرب بوري شديد والزلط فاضي هو بإمكانو يشيلها يمين ويعدي ،صهيب شدة م اتغاظ منو نزل القزاز وقال ليهو الزلط فاضي ي حيواااان،شويه كدة كام نشوف السايق راجل كبير😂الراجل قال ليهو حيوان انا ولا انت ي تافه ي محترم انا قدر ابوك ي باطل الراجل لمن وقف العربيه ،صهيب قال بيهو معليش ي ابوي حقك علي وعلى طول فحط ،متت ضحك في اللحظهه دي وبقيت اضحك بصوت كمان😂😂😂😂😂😂💔هو زاتو ضحك قال لي عوارض ياخ يحيروك زاتو💔قلته ليهو تاني قبل م تفلت شوف انت بتتكلم مع منو بالزبط علشان م تتخت في موقف بايخ زي دة وتفصل ههه واستمريت في الضحك،قال لي م تضحكي كلو بسببك،قلته ليهو اناااااااااا؟قال لي لو م خفت عليك م كان حصل كدة،قلته ليهو بس انا م قلته ليك خاف علي ،قال لي دي حاجه م بتنطلب ولا بيدي!!قلته ليهو طيب إتعلم تاني م تخاف علي☺
قال لي طيب تأمري امر إنتي ي ست البنات❤وصلنا الصاله نزلني قال لي الشبشب عالي شديد برميك ولا كدة؟قلته ليهو لا بعرف امشي بيهو ،قال لي طيب،مشى قدامي وانا وراه لغايه م وصلنا باب الصاله استناني قال لي يلا،لما وصلتو مسكني من يدي جريتها منو مسكها وضغط عليها اكتر😅الامن بتاع الباب والبستقبلو الناس تبع المنظمين كانو بعاينو لينا وبضحكو ساااي😂دخلنا الصاله كانت قوله رهيبه وفخمه عليها بسيطه يعني تعاين يمين ولا شمال والناس قاعدة رايقه وهاديه والفنان شغال،دخلنا ناس من المنظمين قالو لينا اتفضلو هنا لو سمحتو،صهيب قال ليها طيب قال لي شهد خليك هنا حبيبي انا امشي اشوف الجماعه ديل وبرجع ليك،قلته ليهو طيب،بعد م مشى إتصلت علي امتثال قالت لي وين وين؟قلته ليها إنتي الوين؟ قالت لي ي دوب وصلته وداخله ،قلته ليها بعد م تدخلي على يدك اليمين على طول برفع ليك يدي،،بالفعل جات،قعدنا نتونس ونعلق وكدة جات هيا لابسه فستان اسود سادة بإكسسوار بالفضي م سلمت علي قالت لي امتثال امي عايزاك امشي ليها هناك وصفت ليها ومشت،م ركزته معاها طبعاً،اول شي عملوه عقدو،طبعاً صهيب بما انو هو الكبير فهو كان في مكان ابوهم ،ااااحلى لحظه كانت لحظه العقد عن كميه الحب والحنيه الحسيتها عند صهيب وهو حاضن اخوهو وامو في اللحظه دي وامو بتبكي وبعدها حضن هيا وبقى يهدي فيها ومشى لي حبوبتو في مكان قاعدة وباسها في راسها وقعد ليها في الارض وباس يديها وهي بتبكي دة كلو والمصور بجيب فيهو في الشاشه ياخ انا الدنيا مسخت لي لما شوفته دموعو قلبي لمن قبضني ،ياخي بكو بكى في الدنيا دي لدرجه انو الصاله كلها بكت معاهم ،بعدها صهيب ساق هيا وطلع بيها برة لانها كانت منهارة شديد ، انا زاتي م خليت دمعه م نزلتها ياخي والله كسرو قلبي والله😭😭💔بالجد الابو دايماً وابداً حيفضل عمود البيت بغض النظر عن هو منو واخلاقو شنو وبنتمي لشنو ،فقدو وعدم وجودو في حياتنا بهد الحيل وفييه كسرة نفس م بجبرها شي😭💔انا في اللحظه دي بالذات عرفته احساس الفقد الحقيقي للابو وقيمتو ،وحسيت قدر شنو بعد ابوهم عنهم وعدم وجودو في يوم زدة في نصهم كاسرهم💔بالجد ابوك لو كعب وسيئ الف وجود نفسو في حياتك نعمه❤
