#ذات_إنتفاضهه13
سكتت مساافهه واخد نفس عميق وقال لي معاك حق افضل حل انو نختصر كل شي و نحسم الفارغة دي كلها،
طبعاً انا اخر شي اتوقعتو ردة فعلو تكون بالطريقة دي ،في اللحظه دي لما هو قال كدة انا بقيت م عارفه اقول شي خصوصا بعد جملة نحسم الفارغة دي كلها،يعني هو شايف البينا دة كلو كان عبارة عن فارغهه،
بعد مسااافة إستعدته تركيزي قولته ليهو بصوت مبحوح ااايوة احسن شي إنو نحسم الفارغه دي زي م قولته عليها إنت ودة العايزاهو انا،
قال لي جداً ...
فجأة جاتو مكالمة التلفون رن مساافة شكلو كان عايزني انزل حتى ارد وانا كنت مركزة مع التلفون وم عايزة انزل،بعد مسااافة قال لي عايزة حاجه تاني؟
حسيت على نفسي نزلته وقفلته ليهو الباب بأقصى قوتي طااااخ وانا دموعي في طرف جفوني ،لقيت الباب فاتح وبلسم دخلت دخلته لقيت حبوبه شايله كريم وبتبكي وبلسم بتقول ليها والله كويس ي حبوبه م حصلت ليهو حاجه شويه تسمم بسيط بس عدة على خير ،حبوبه قالت ليها البت دي مجنونه امو دي مجنونه انا كلمتها ي بت الود دة م تسوقي لكن م بتسمع لي كلمة،جيت داخله قالت لي دايرة تكتلي ولدك؟ي بت انا اسوي ليك شنو في الدنيا دي ،الجنى دة ذنبو شنو معاك دايرة تروحيهو سكتت م رديت ليها
ليها عايزة ادخل الهول قالت لي إستني هنا م سامعاني بتكلم معاك؟جدعتني بالنعال حقتها ضربتني في راسي ،
بلسم قالت ليها حبوبه لأ م كدة ياخي
قالت ليها البت دي عمايلها بقت بطاله وراسها قوي وم بتسمع الكلام اسكتي ساي خليني ليها البت دي ،
بلسم مسكتها قالت ليها لا ي حبوبه عليك الله اقعدي حلفتك بالله خلاص ،دخلته الغرفه وقعدته ابكي،جات بلسم داخله لقتني ببكي،
قالت لي شهد م تزعلي من حبوبتك بس قولي لي من حقها ولا لأ؟دة كلو من خوفها عليك وعلى كريم فهمتي ي شهد؟
سكتت مسافه بعدها قالت لي انا ماشه البيت اشوف الراجيني شنو من عمار وامي كمان لو م جيتك بكرة اعرفي اني بقيت شاورما ههههه يلا سلام تاني جات راجعه قالت لي اهااا نسيت هاك دة تلفونك يلا بايات 👼
طلعت مني وانا واصلته في بكاي داك،وانا اصلا م كانت مبكياني ضربة حبوبة ولا كلامها معي،انا كل تفكيري كان في ردة فعل صهيب وبرودو معي وحبوبة تمت الناقصه ،قدر م الله اداني قدرة قدرة بكيت ،بعد حوالي نص ساعه كدة حسيت بنفسي نعسانه وعايزة انوم بس كل م اتزكر كلام صهيب بفتح عيوني وببدأ ابكي من جديد،عاينته للتلفون جمبي شلتو وم فكرته اصلا إتصلته عليهو
اول م فتح الخط وقال الو"سكتته وانا ببكي مساااافهه ،قال لي بلهفة الووو شهد في شنوووو انتي كويسه؟
قولته ليهو وكمان بتسأل في شنو؟هو البتعرفك انت بتكون كويسه كيف؟سكت!!!
قولته ليهو ساكت ليييهه رد علي،خلص دور رنين جا دوري انا وخلص وحاليا جا الدور على الدكتورة كمان صح؟البنات بالنسبة ليك حاجه تمسك بيها زمن وخلاص صح؟كل فترة وفترة عايز تكون مع واحدة جديدة تقضي بيها يومين وتشوف البعدها !!بتختارهم حسب هواك وبتسيبهم برضو بنفس الطريقهه صح؟
بكيت مساافة وبقيت اتنهد بعدها قولته ليه ممكن اسألك سؤال؟هي
احسن مني بشنو؟علشان لبسها؟فكة شعرها؟ ولا عشان العاملاه في نفسها دة؟ولا علشان قارية ودكتورة وانا ولا شي من دة كلو؟
قولته على علاقتنا فارغه؟طيب هي حتعملى الفراغ الجواك دة لمتين؟صهيب لو نسيت اذكرك انت قبل شهر كنت بتقول لي ي شهد انا قدر م الله اداني قدرة اتنفس بيها حأفضل احبك دة كلو كان كلام سااااي؟ لما عارف نفسك م بتقدر تقيف على واحدة بس في حياتك لييهه من البدايه م خليتني بعيدة منك ومن تفاهتك دي كلها؟انت عارف حجم المعاناة الانا عانيتها صح،عارف الانا عشتو ومريت بيهو بكل تفاصيلو،كل يوم انا كنت بترمي في حضنك وبحكي ليك عن حاجه عشتها ودموعي في عيوني بس بعدها بقول ليك ي صهيب إنت عوض ربنا لي على كل معاناة عانيتها او حاجه سيئة عشتها،كنت بقول ليك كدة وانا كلي ثقه فيك،كلي ثقهه فيك ي صهيب،انت كنت بتمسح لي دموعي بذات نفسك وبتقول لي شهد انا هنا معاك دايماً وابداً ،كنت بتقول لي إنك م حتسيبني ولا حتبعد مني ابداً وإنو إنت حتخلي بالك مني ومن كريم علشان نحن راس مالك الوحيد في الدنيا دي وم حتقبل بأي شي ممكن يتسبب في خسارتك لينا،انا إحتسبته فيك خير وقولته اقفل كل الصفحات القديمة واتناسى الفات كلو واتعايش معاك وجهزته نفسي علشان نتجاوز كل حاجه سيئة ممكن تعدي علينا مع بعض، لما عارف حيجي يوم وحتمل مني وحنصل للمواصيل دي ليه حببتني فيك ؟ليه علقتني بيك كان تخليني زي م انا بعيده كل البعد عن القرف ده كلو والحبل الرابطني بيك حدو الورق
انت عارف انو انا انا انا وصلته لمرحله انو انا م قادرة احبك ابداً بس كمان قادرة اكرهك فاهم الحاجه دي انت؟
ذنبي شنو انا في دة كلو؟
انت عملته الدراما بتاعه عرسك من رنين ديك كلها علشان تتخلص مني انا صح؟علشان عارف إنو انا في يوم قلته ليك ي صهيب انا م بستحمل وجود واحدة تانيه تشاركني فيك وإنو لو في يوم خيروني بين انو تكون في واحدة تشاركني فيك او ابعد حأختار ابعد وحأسيبك من غير م اتردد حتى ،كنت عارف إني هعمل كدة لأنك م حتقدر تبطل العادة بتاعه إنك تكون نسونجي وبتاع طرح صح؟قلته افضل حل إنك تتخلص من شهد علشان تعمل العايز تعملو مع القذرات البتعرفهم بضمير،وقصتك مع رنين تبقى ليك مبرر،كنت عارف اني م حقبل بحاجه زي دي ابداً وواثق من ردة فعلي حتكون كيف،اهااا نسيت انت م عندك ضمير اساسا علشان العندو ضمير بحسب حساب لبنات الناس قبل م يغلط فيهم ،بس الزيك ديل بياكلو مع الناس في صحن واحد وبلعبو ببناتهم زي م عملته مع رنين كدة ،انا نفسي م عارفه روحي قبلته اعيش مع واحد انا عارفه انو عامل حاجات زي دي مع بنات ناس قريبين ليهم كيف،طارت من بالي فكرة انو زي م هي هانت عليك حيجي يوم وانا كمان حأهون عليك ،عارف القلته عليها فارغه دي ابداً م فارغه لأني م حصل قللته من واجباتي تجاهك ابداً ،المشكله في النقص الجواك انت واي راجل جواهو نقص بحاول على قدر م يقدر يملاهو بمعرفتو الكتيرة للنسوان اي كان نوعهم ،م ملاحظ انو انت اناني ي صهيب اناني شديد وبطريقه قذره حد القرف يعني انا اتزوجتني علشان مصلحه ابوك،وعقدته على رنين علشان المنحه الجايبها ليك خالها ،واسي الدور جا على دي علشان دكتورة حسبي الله ونعم الوكيل فيك ياااخي حسبي الله ياخي💔
قفلته منو الخط وسكاتو غاظني اكتر وحسيت اني اتهورت وانفعلت شديد بإتصالي عليهو دة وهبلته بنفسي وصغرتها اكتر لما قارنته نفسي بالبت الدكتورة 😭بس كمان يعني والله إستحاله يكون في بني ادم طبيعي بالبرود بتاع صهيب دة الله يقرفو 😭💔بعد نص ساعه بالزبط وانا شبه نايمة صحيت مخلوعه بصوت التلفون برن، رفعتو لقيتو هو المتصل م رديت عليهو،تاني رجع اتصل فصلته في وشو،رسل لي مسج محتواها "انا واقف قدام باب بيتكم قدامك5دقايق لو م رديتي او طلعتي لي برة حأدق على الباب...
رجعته ليهو على طول اول م فتح الخط قولته ليهو اسمع لو وقفته للصباح انا م طالعه،قال لي بنبرة حادة اطلعي من غير سخف عشان وديني ي شهد انا لو دقيت باب بيتكم دة ودخلته م بحصل خير باقي اليوم دة،لا خالك ولا حبوبتك حيمسكوني منك لأنو هم نفسهم قرفو العيشه معاك بسبب تصرفاتك الطفوليه دي،قلته ليهو م بخصك يقرفو العيشه معي ولا زفت وبعدين كدة وريني حتعمل شنو يعني حتعمل شنووو؟
قفل الخط في وشي،شويه كدة سمعته جرس الباب بضرب،من الخلعه لقيت نفسي واقفه على حيلي ،
م تم دقيقة تاني الجرس ضرب،فتحته الباب لقيت حبوبه شايله عكازة وماشه على باب الهول،قولته ليها في شنوو؟قالت لي جرس الباب دة بضرب ،قولته ليها وانتي بتفتحي سااااي يمكن حرامي ي حبوبه!!!قالت لي ي بت انتي عويرة حرامي بدق الباب دة حرامي وين دة؟اظن دة خالك لانو الليله سافر الصباح رجع مرتو وقال لي احتمال كبير اجي راجع بي بصات الليل طوالي لانو عندو شحنه شنو كدة م بعرفها جاي يستلمها،قولته ليها برضو ي حبوبه م تفتحي انتي إيش ضمنك انو دة خالي؟
قالت لي اها كان طلع هو اخلي ينوم في الشارع يعني؟خليك هنا عايني للولد جوة الاوضه م يقع من السرير لمن اجي ،فضلته واقفه لغااايه م سمعتها بتقول اتفضل ي ولدي اتفضل ادخل،في اللحظه دي انا رجولي بقت م شايلاني جريت دخلته الغرفه ووقفته جمب الباب،
بعد مسافه جو داخلين الهول وصهيب بقول ليها "معليش ي حبوبه اعفي لي ازعجتكم مع انصاص الليالي دي بس بتصل في التلفون م بتردو قلته الا كان الولد تعب تاني ولا حصلت ليهو حاجه جيت قلته اشوفو،قالت ليهو العفو ي ولدي إزعاج شنو كمان انا والله ختيت في بالي انو دة التاج بس لانو سافر الليله وقال لي احتمال كبير يرجع باقي اليوم دة،و الولد كويس والله نااايم من ساعة جابو لكن التلفون دة م عارفاهو مجدوع وين اظنو عند شهد جوة وهي نايمه م سمعتو ،قال ليها الحمدلله !!
انا جوة الغرفه بقيت اقول"الكضاب المنافق تربيهه وسخهه وكمان فاتح نفسو للكذب"ي ربي حيعمل شنو حيضربني؟معقوله يكون جاي يضربني 😭💔
حبوبه قالت ليهو اتفضل ي ولدي إشرب ليك مويه،قال ليها شكرا ي حبوبه،بعدها قال ليها تعالي ي حبوبه تعالي ولا شي م تعمليهو،قالت ليهو ي ولدي،قال ليها لا والله انا زاتي م قاعد طالع على طول الزمن اتاخر اساسا ،
بقو يحلفو على بعض هو يحلف وهي تحلف لغاااية م في النهايه حبوبه قالت ليهو اقعد مدام الله جابك انا زاتي ي ولدي دايراك.في موضوع كدة ،قال ليها خير إن شاءالله؟قالت ليهو بس خليني اعمل كبايه شاي اللبن عليك الله ي ولدي م تأباها حلفتك بالله،
قال ليها والله غايتو ي حبوبه م خليتي لي شي اقولو خلاص كويس ،قالت ليهو دقايق بس وبرجع ي ولدي ،اول م سمعته حركتها وهي طلعت مشت على المطبخ على طول طلعته ليهو بالجلباب بس وبدون طرحه حتى اول م شافني وشو بقى م بتفسر وغضبان لمن حواجبو داخله في بعض اصلا هو لما يغضب ملامح وشو بتخليك ترجف براك ،انا عامله نفسي غضبانه بس هو طلع اغضب مما كنت اتوقع،لمن ندمته على طلعتي من الغرفه كان اعمل روحي نايمه بس بحالتو دي حيجيني جوة الغرفه وم معروف يعمل فيني شنو،عملته روحي متماسكه وربعته ليهو يدي وهو بعاين لي ومشبك صوابعو ببعض وم رفع عينو مني ولا رمش رمشه حتى،فضلته واقفه وانا بهز رجولي بعد مسافه قولته ليهو خير إن شاءالله عايز مني شنو جاينا انصاص الليالي دي؟كلامي دة زاد غضبو وهو على وشك انو يقوم حبوبه جات داخله وشايله كبايه شاي اللبن في يدها،قالت لي الولد م يكون صحى؟سكتت م رديت عليها وانا بحمر لصهيب،قالت ليهو إتفضل ي ولدي البسبوسه دي جابنها البنات ديل انا دي ولا بدورها ،قال ليها تسلمي ي حبوبه🌸قالت لي م بتسمعي انتي ي بت؟
قولته ليها شنو ي حبوبه؟
قالت ليهو شايف ي ولدي؟والله اسي انا مقعداك عشان نشاف وعناد البت دي،البت دي نشفت ريقي نشاف ي ولدي،الشي البقول ليها م تسويهو دة بس هي بتسويهو بزيادة كمان والله الشي النسويهو ليها غلبني،وانا في بلد غربه لا تالي لا والي يعني غيرك انت وخالها م عندنا زول وانا كمان بخاف لو كلمتة خالها يعمل فيها شي ساي وانا بعرف خالها قلبو حار والله بكسر رقبتها عشان عنادها دة لكن والله والله والله غلبتني ي ولدي،منعتها المظاهرات م اشتغلت بكلامي وبقت تطلع،منعتها القيادة برضو كأني بأذن في مالطه والله ماف شي م عملتو ليها البت دي لكن ميبسه راسها والله الا كان اجنزرها واقعد احرسها ي ولدي،اسي الليله الشافع دة لو م ربنا قدر ولطف م كان راح فيها؟
قولته ليها حبوبه اسي انا مالي عملته شنو لمن بتشكيني للغريب؟
صهيب رفع راسو وعاين لي بغضب..
قالت لي اسكتي غريب في عينك الغريب دة راجلك و مسؤل منك وولي عليك طول م انتي في حبلو،
صهيب قال ليها غلط ي حبوبه غلط كبير بعدين طول م هي قاعدة معاك انتي العندك الحق تصرحي ليها تطلع ولا لأ وغصباً عنها تسمع كلامك م تسمع كلامك كيف؟عاين لي بحدة وانا نفس الشي،بعدها قال ليها حقك علي ي حبوبه خليني انا بتكلم معاها ،قالت ليهو والله كان اتكلمته معاها عشرة سنه م بتسمع الكلام البت دي انا اخر م اتوصلته إليه انو اسوقها وارجع بيها البلد ي ولدي وقلته بس اكلمك ،دموعي جات جاريه قلته ليها كل مرة بتهدديني برجعه البلد دي ياخي م ترجعيني كان رجعتيني البلد البتهدديني بيها دي مدفونين فيها امي وابوي وانا اصلي م مابياها بس انتو مشكلتكم عايزين تحاسبوني على النفس الطالع ونازل ،جايبني من البلد عشان تحبسوني طيب م كان تخلوني في البلد احسن،انا كان طلعته الجيران تحاسبوني،كان طلعته البقاله تحاسبوني ليييهه يعني؟كل مرة بكلم ليك خالك ،بنرجعك البلد،ليييه يعني وعشان شنو اصلا؟البلد البتهدديني بيها دي اسي باقي الليل دة ارح نرجع ليها اصلا دي م عيشه دي الواحد في كل الأحوال ميت ميت كام هنا كان هناك ،وخالي دة إن م كسر رقبتي انا اصلا رقبتي مكسورة وميته وجع بس بقيت ابكي دخلته غرفتي جريت الكرسي نزلته الشنطه من فوق الدولاب رميتها طاااخ في الأرض وفتحته الدولاب بقيت انزل في الملابس وارميهم في الشنطه،حبوبه قالت لي بصوت عالي انتي اسي الببكيك شنو اسي انا قلته شنو ببكي؟شايف ي ولدي اها كان إتكلمنا إتقلمنا💔
صهيب بقى ينده علي ويقول شهد ،ي شهد تعالي هنا انا بتكلم،فضلته ابكي وانا بتكلم وبقول "كل مرة مهدداني بالبلد فاكراني خايفه الرجعه ليها يعني،حبوبه قالت لي م تتنفخي كدي تعالي هنا اسمعي كلام راجلك بتكلم معاك ،صهيب قال ليها خليني انا بتكلم معاها ،حبوبه قامت على حيلها وقالت:غايتو ولادة الزمن دي اخير الواحدة تعقر بدلها ،اها ي ولدي كدة اتكلم مع ام رويس دي انا ماشه اصلي العشاء الليله م صليتو واصلي لي معاهو ركعتين كدة،
اثناء م انا بنزل في الملابس صهيب جا وقف في باب الغرفه بقى يعاين لي وهو ساكت،فضلته انزل فيهم وانا ببكي ،بعد مسافه قال لي بتعملي في شنو إنتي؟م رديت عليهو،قال لي بتكلم معاك انا،قلته ليهو مش الخرطوم المالني بيها فقر دي جنازة زاتو م تدخلوني ليها،اسي بتصل على خالي بكرة يجي يسوقني من هنا ، فجأة احس بيهو ماسكني من يدي قال لي تعالي،جريت منو يدي وقلته ليهو داير مني شنو فكني ،مسكني بكل قوتو وجراني وانا بقيت اتقالع معاه لمن عضيتو في يدو شدييييييد برضو م فكاني،بقيت اقول ليهو والله انادي حبوبه،قال لي عايني م تصارعي عشان شيلتك م بتغلبني فاهمه؟ بقيت اضرب فيهو بيدي التانيه"هو سلفاً عارفني م حأكورك لي حبوبه ولا شي"،فضل ماسكني لغايه م طلعنا من الهول و وصلنا باب الشارع فتح الباب طلع وجراني وراه وقفل الباب،قولته ليهو صهيب انت مجنون انا م لابسهه طرحه حتى مطلعني كدة كيف؟فتح باب العربيه ركبني وركب وإتحرك ،
قولته ليهو انت ماشي بي وين ؟
سكتت
قولته ليهو هي انا بتكلم معاك ملاحظ انو انا م لابسه لا طرحه لا توب حتمشي بي وين وانا بالشكل دة؟؟
فضل سااااكت وم رد وسايق على اقل من مهلتو ،لفهه بينا مساااافة،
قولته ليهو بنفس باااارد "هي انت في شنووو حتلف بينا كدة كتير؟"
وقف العربيه على جنب ،رقد راسو في الكرسي وعمل حركتو المعتادة ومسح وشو بيدو مسااافة بعدها عاين لي وقال لي :قولي لي بس عايزة شنو إنتي؟العايزاه ببقى
قولته ليهو بنبرة مبحوحه عايزاك تطلقني
قال لي وبعدو؟
بقى يعاين لي وم رفع عينو مني قولته ليهو وبس وبعدها لفيت وشي منو على الشباك بعد مسافه قال لي شهد عايني لي هنا م تلفي وشك خلينا نتكلم وش ل وش
فضلته ساكته واصلي م اديتو وشي،
فجأة حسيت بيهو ماسك يدي جريتها منو واتلفته عليهو قولته ليهو عايز شنوو؟
قال لي م حأتكلم عن القلتيهو في التلفون كتير تمام؟
ربعته ليهو يدي،قال لي شوفي ي شهد انا الفترة دي بالنسبة لي صعبة شديد كل حاجه عندي داخله في بعضها،انا طالع من المعتقل واحدة من الحجات الانا مقررها إني م ارجع ليك ابداً عارفة ليييهه؟لأنو إنتي الإخترتي تبعدي وانتي العملتو الفجوة دي كلها بينا، بس لما شوفتك يوم م جيتي مع احمد م قدرته اتحكم في نفسي
قولته ليهو انا العملته الفجوة دي كلها؟يعني عايز ترمي اللوم على رقبتي صح؟طيب منتظر شنو ياخي م تطلقني وتريح نفسك وتريحني
قال لي شهد خلينا ناخدها بالعقل نحن م وصلنا لطريق مسدود ابداً بالعكس نحن كان ممكن نكمل ونتجاوز بس نحن الحاجه الوحيدة الواقفه في طريقنا هي إنعدام الثقة ي شهد م منطق ابدا إنك تعيش ليك مع بني ادم م شايف في حياتك غير الجزء الفاضي من الكبايه والكلام القُلتيه في التلفون دليل كافي على انو انا بالنسبه ليك او في نظرك بني ادم منبوذ ،بتحاسبيني على حياتي الزمان وعيوبي الكانت فيها والانا غيرته نمطها360درجه عشانك ي شهد،عايزاني اتغير كيف وإنتي في اقل نقاش او مشكله ببنا بتقولي لي إنت كنت كدة ؟اقول ليك حاجه انا من يوم م دخلته المعتقل حجات كتيرة إتغيرت بالنسبه لي وحجات طلعت من نفسي بقت م بتفرق اصلاً واكون صريح اكتر واحدة من الحجات دي إنتي ي شهد، بس كمان دة م معناها إنك بتهوني علي،لأنو لو الدنيا دي كلها هانت علي إنتي لا ي شهد مهما حصل بينا إنتي بالنسبه لي كنتي وحتفضلي من الأولويات عندي ،حتى لو عايزاني ابعد انا حأكون بعين وقريب في نفس الوقت ،متى م إحتجتيني حتلقيني جمبك،سكتت مساااافهه بعدها قال لي وكمان لازم تستوعبي انو انتي م بتتقارني بأي شي في الدنيا دي،كل الدنيا دي في كفه وانتي في كفه تانيه خالص بس كمان انا م عايز اكذب عليك ولا عايز اكذب على نفسي فعشان كدة م عايزك تتوقعي مني اكتر من كدة ي شهد...💔
#نتلاقى®
#إقتباسهه
لا أُريدْ أن أتنازل عنك ، أنا أُنفِض العالم بأكمله عن كتفي ببرودٍ تام !
من دون أن أستطيع فِعل ذلك بِك !
ليس لديّ قوّة لفقدانِك ، لستَ أي شخص أنتْ 💔
