سجينة الظلم والانتقام (مكتملة)

البارت السادس والخمسون

الكاتبة : سارة الشمري🖤

إذامـارأت عـيـني جـمالـك مـقـبلاً......... وحـقـك يـا روحي سـكرت بـلا شرب.

سمعت صوت واحد من جهة الباب يصوفر ويكول : بوووية شلون صاروخ ارضي هذا ..
رفعت راسي للباب الخارجي لا اراديا ..
شهككت واني اشوفة واكف ويباوعلي بنضرات قذرة .. ما لحكت ادخل الا شفتة انسحب وصار بالكاع وما اسمع بس صوت الضرب ..

غزوان .. طلعت من بيتي وتوجهت لبيت اهلي لان خابرني رائد كال اجينة بالطريق حتى نتبارك لمؤيد وبنفس الوقت جايين مشية عالبنات وكال ميامين ما تدري وطلب مني اني اكللهة ..
فتحت الباب والدم صعد الراسي من شفت هالحيوان يباوع عليهة بهالطريقة وهي ما منتبهة ...
سحلتة من ياختة وشمرتة بالكاع واني ماشوف من العصبية .. صرت اضرب بي بوكسيات على وجهة ..
سمعت صيحة ميامين بخوف : غزوووان فدوة عوفة لا يموت بيدك ..
حجيت بغضب من واني احس النار صعد لراسي : طبي جوة لا اكفر بيج هسة ..
خافت هي ودخلت للمطبخ بسرعة ..

ميامين .. واكفة اباب المطبخ واباوع عليهم من الشباك واضرب بخدي بخوف واني اشوف وجه عمران صار ما ينشاف من كثر الضرب ويحاول يخلص نفسة من ايد غزوان ويرافس جواه ..
دخلن مها وخاتون وشافن حالتي اجن يركضن ..
خاتون شهكت من شافت غزوان بهالحالة : يممة ليش غزوان يضرب بعمران هيج ..
ما تحملت وكمت ابجي لان من وراي الي صار : جنت ادخل بالعصاير وعمران يباوع علية من الباب بدون ما انتبه .. وغزوان من شافة تخبل وانهد علي بالضرب ..
مها سدت باب المطبخ الي على الهول حتى النسوان محد تسمع ..: شلون هسة منو يخلصة من ايدة ..
خاتون وهي تأشر على تليفون امهة : هذا تليفون امي هنا بي رقم حمزة بسرعة خابري اكيد هو برة ..
مها اخذت التليفون واتصلت على حمزة وهو رد : امري عمة ..
مها بسرعة : حمزة اني مها .. فدوة تعال بسرعة لبيتنة لان غزوان شاف عمران وهو يباوع على ميامين من الباب وانهد علي بالضرب تعال بسرعة قبل لا يموت بيدة ..
حمزة بعصبية : هالحيوان الماعندة شرف وغيرة ما يتوب من سوالفة .. بس والله الا اموتة ..
سد التليفون بوجهة ..
مها وهي تباوع للتليفون : ياااا ردنا عون صار فرعون ..
خاتون بسرعة ما عدهة غير هالحل .. طلعت تليفونهة واتصلت على ابوهة ..
ثواني وما شفنة غير حمزة دخل وصار يرفس بعمران برجلة ويسب بي وغزوان يضربة بوكسيات ... مها كامت تدك وتلطم واتكول لو ادري ما مخابرتة ..
بسرعة دخل عمو ابو غزوان بعصبية .. سحل غزوان من ياختة ووخرة عن عمران الي يتلوة بالكاع ..
حمزة وكف ضرب من شاف عصبية ابو غزوان ..
حطيت ايدي على كلبي ودموعي تنزل لان من وراي صار هالشي .. يربي اني ما اخلص من المشاكل يعني ..

غزوان ... لو ما ابوي موخرني منة يمكن موتة بيدية ..
غزوان : بوية فدوة عوفني والله كلبي بعدة مورم منة ..
ابو غزوان بعصبية : غزوووان .. ارجع لا احرك عشيرتك هسة .. مو عيب عليكم مستقوين علي ثنينكم ..
حمزة : عمي انة توني (هسة) اجيت حتى ما لحكت اضربة بس جم جلاق ..
ابو غزوان : والك عين تحجي هاي ابدال ما توخرة منة ..
حمزة : والله يستاهل الكتل .. جا مو عيب علي يباوع على مرت ابن عمة من البيبان ..
ابو غزوان وهو يكوم عمران من الكاع بالكوة : شنهي ولك جا انت ما تتوب يومية مكتول .. بس هاي تربية ابوك الاطاك مجال على اساس جبير اخوتك .. كوم يالعار كوم ..
غزوان : وين مودي بوية .. ذبة بالشارع خل يصير عبرة لغيرة ..
ابو غزوان : انت اسكت ولا تحجي كلمة .. ما تشوف روحك مسوي وجهة شوارع واتكول ما برد كلبي .. وخرر هيييج ..
شفت ابوي وحمزة سندوه وطببو للديوانية الزغيرة النكعد بية اني والولد لان فارغة ..
طبيت وراهم وهمة مددو عمران عالقنفة وهوة يون ويحجي : اااه الله يكسر ايديك يغزوان ..
ضربتة على راسة بكل قوة بقهر : من اكسر راسك يلة ترتاح وتسد حلكك يلة ..
ابو غزوان بعصبية : غززوان .. ولك تضربة واني موجود شني ما تحتر احد انتة ..
كعدت عالقنفة واهز برجلي ..: اعذرني بوية ما تحملت ..
قاطعنة دخول مؤيد : ها بوية شكو .. شو اجيت والبنات تلكني ايكولن صارت عركة الحك .. شبي عمران ..
ابو غزوان : بعدين تفتهم عود .. روح جيب علبة المضمد الهناك وتعال عالجة ..
اجة مؤيد وصار يمسع الدم عن حلكة وخشمة وحمرة يحجيلة الصار ..
مؤيد هز راسة وشمر القطن : والله سيتاهل اكثر من هيج .. افا عليك غزوان ما موتة بيدك .. شلون يباوع لمرتك وتعوفة وهو بوعية ..
ابو غزوان صاح بي : الله وكيلكم ماكو احد عاقل من عدكم .. كلكم مخابيل .. خلللص شغلك ولك مؤيد لا تخليني اطلع عصبيتي بيك ..
مؤيد دنك من شاف عصبية ابوي اخذ القطن ورجع يكمل لعمران ..
مؤيد حرك خشم عمران وهو صرخ ...
التفت على ابوي وكال وهو يحك شعرة بخوف من ردة : بوية هذا خشمة مكسور لازم يروح للمستشفى ..
ابو غزوان بعصبية ويأشر علية وعلى حمزة : الله لا يبارك بيكم ثنينكم .. كوم انتة جيبة وراي خل ناخذة للمستشفى ..
طلع ابوي من الديوانية ..
مؤيد سحلة من ياختة وعبالك جان متحمل لان ابوي واكف .. كال بقهر منة : من طمام عار يطم هالوجه المخطط .. دكوووووم ..
طلعة مؤيد وياه ولحك ابوي بي .. خطية مؤيد ما تهنى بمصباح عرسة انسحل للمستشفى ..
باوعت لحمزة وهو باوع علية وطكيناهة ضحكة ما ندري ليش ..
اباوع لدشداشتي كلهة تراب وايدي هسة يلة حسيت بألمهة .. جانت اصابعي حمرة ومزوركة من ورة الضرب على وجة عمران ..
حمزة وهو يكوم : انة رايح لبيتنة ابدل دشداشتي صار بيهة دم من عمران وهم شحاطتي انكطعت من الجلاليق ..
غزوان : يلة انة هم ابدل دشداشتي انترست تراب ..