امال وملاك (مكتملة) (سلسلة كوارث وخبائث المجتمع)

البارت 17

17

رقية.....

رحت للصيدلية اجيب علاج للبنيه وجبت مرهم وشاش  ومعقم  وحبوب مال نزيف وهالسوالف وصفتهن  اليه الصيدلاانيه واقترحت عليه اروح للمستشفى اذا عندي نزيف قوي عبالها اليه انا سكتت وكلتلها ان شاء الله 

رجعت لكيت البنيه نايمه وبعدها تون تركت العلاج يمها ورحت سويتلها  شوربه  دجاج

وانا اطبخ اتصل بهاء عليه واول مره جنت اتمنى مايجيني وهالبلوه عندي النوب يسويلي سالفه مالي خلكه رديت عليه بعد دقائق لان جنت ملتهيه بالشوربه

-الوو هلو حبيبي

-هلا والله بعد وكت مو عوايدج تتأخرين بالرد

-اعتذر عيني جنت اسوي اكل

-هههه  ومن شوكت انتي تطبخين  الدليفري شنو شغله لعد

-اليوم حبيت شويه اغير واكسر الملل واطبخ بأيدي

-ماشي راح اجيج باليل كللش ضايج وطاكه روحي

-شكو حبيبي شصاير

-عود من اجي اسولف اخذي راحتج

-اي بس دقيقه...... الو الو

افف قفل الخط عديم الذوق لزمت الجهاز شمرته على صفحه

هسه بالله هذا شكله اذا اجه وسألني منو هاي

يلا هسه هوه بيته عود اذا صار بيته ذيج الساعه يحاسبني 

اووف بهاء ماعرف شنو المصبرني عليك لهسه ماعرف

ملاك

بقيت بوحدي وي بابا بالبيت بعد ما امي وشمس راحو وي محمد يدورون بالسوك عن امال

ماعرف انا هم گلبي يلعب ومامرتاح ابد اففف وين صرتي امال

سمعت صوت بابا يون بغرفته رحتله بسرعه

يباوعلي ويتمتم بكلام مامفهوم

كام مايحجي طبيعي من ذاك اليوم وحتى احسه مايكدر يتحرك بس شنسوي منو الياخذه  ويراجع  بيه ويشوف شنو علته

گلبي يتقطع من اشوفه هيج كله بسببي  انا كله مني

فهمت منه يستفسر عن صوت الرجال الغريب يقصد على محمد كتله بابا هذا اخو صديقتي شمس اجه خذاها

ورجع سألني عن امي

ماخوفته وكلتله بالحقيقه

كتله راحت هيه وامال للسوك

غمض عيونه وماحجه شي بعدها معقوله عرف انا اكذب علي اووف بابا اوووف

..
كمال طلع وبعد ماشفته لحد مااجت خالتي وامينه من السوك

تلكيتهن  بأبتسامه وخذيت منهن الغراض