امال وملاك (مكتملة) (سلسلة كوارث وخبائث المجتمع)

البارت 22

22

محمد

بهاء جان منهار كلش على وفاة والدته ويمكن انا حالتي اتعس منه بس جنت ضابط اعصابي وابين كدام العالم متماسك وصلب وميهمني شي بس من الداخل هش ومنكسر وحزين خالتي ام شمس مثل معزة امي ويمكن أكثر

حنينه وطيبه وماجانت تفرق بيني وبين بهاء أو بين شمس وفضه تعبت هواي بحياتها وتحملت  ضيم امي ومرها

اعترف امي جانت هواي قاسيه على ام شمس وعلى شمس بالذات ماعرف ليش هيج يمكن لان ابوي تزوج عليها ام شمس بس مو هيج الحقد عمه عيونها وخلاها ماتشوف الناس زين

اما انا جنت اسوي الي اكدر عليه واحاول ادفع كيد امي عن خالتي ام شمس ومرات اتطك روحي ومااتدخل واكول اذا هوه بهاء مامتدخل وعايش حياته ولا مهتم انا شنو بالنص

بس گلبي ماينطيني وارجع مره ثانيه وادافع عنها واوكف بوجهه امي لخاطر مرت ابوي

اما شمس هيه اعز انسان بالدنيا على گلبي اشوف دمي ولا اشوف دمعتها بنيتي وربيتها على ايدي واعزها أكثر من اختي فضه

صحيح مرات أقسى عليها بس مارفضلها طلب وجنت احذرها دائما من الاختلاط وي البنات لان اعرف هالوكت شلون قذر والبنات تغيرت وشمس طيبه واخاف يلعبن بعقلها بنات الحرام

بس تعرفت على صديقه وحده بس وانا الصراحة ارتاحيتلها  اسمها ملاك وهيه اسم على مسمى مثل شمس طيبه وحبابه  بس للأسف اختها طلعت مو راحة تذكرني بالحالات الي تجينه للمديريه

مرات تجي حالات للمديرية تشيب الراس خلتني افقد الثقه بكل بنات هالجيل بس ارجع واكول لو خليت قلبت واكو بنات ناس محترمات

احنه الضباط الي بالجيش والشرطة دائما ما نضهر للناس بالمضهر الصلب والقوي والقلب القاسي بس داخلنه غير شي مختلف تماما عن ضاهرنه الي تشوفه العالم

وسبب عصبيتنه الزايده هي الاهوال والمصايب الي جاي نشوفها بالمجتمع التعبان الناس كاعده ومرتاحه ببيوتها ويسمعون عن طريق الأخبار عن أخ قتل عائلته واب اغتصب بنته ويتحسبون ويكولون لاحول الله الدنيا خربت والشعب تاه

مايدرون بهاي الحالات مجرد حالات استثنائيه عن مئات الحالات الي جاي نشهدها ونشوفها ونحقق بيها باليوم

التلفزيون مايضهر كلشي يضهر حالة وحده صارت من بين الف حالة لان كلشي اله ضوابط والحكومة ماتريد ترهب الشعب وتخوفه

وللاسف الضباط والمدراء والمحققين هم بس الي يعيشوها ويعيشون مرارتها من نحقق وي شخص وبكل كبرياء يكول اي اني قتلت امي وسرقت ذهبها لان اني مدمن حشيش

بذيج الساعه اتمنى لو اقطعه وصل وصل وهم مايبرد گلبي بس مستحيل لان المحققين ممنوع يستعملون الات حاده بالتعذيب لذالك انطر  استخدم ايدي للضرب ولساني للشتم والاهانه بهيج حثالة