امال وملاك (مكتملة) (سلسلة كوارث وخبائث المجتمع)

البارت 21

21
مامصدكه ماتت امي البارحه
گلبي ما ينطيني اقره الفاتحه 💔

كعدت ثاني يوم الصبح على صوت ملايات  ولطم وصياح  حطيت  اديه على اذاني  وكمت من الجربايه

جان بالغرفه اكو ميز ابو مرايه باوعت على روحي لابسه ثوب اسود ووجهي صاير ازرك وشعري منفوش عبالك مخبله

هاي شصاير كمت استوعب الأحداث ورجعت ذاكرتي ليوره اليوم اول يوم فاتحة امي

اااخخ يايمه كعدت بالكاع وكمت ابجي وصوتي مبحوح من الصياح ماكدر احجي

انفتح الباب ودخلت عليه ملاك لابسه اسود وشاده راسها بشال وثوبها بيه وصاخه عرفتها هيه المعزبه بالفاتحه

جابت صينيه مال اكل وخلتها  يمي

-شلونج اليوم

جاوبتها كوه حتى انا ما سمعت صوتي

-الحمدالله

-عززه هاي صوتج رايح يلا هذا حليب دافي اشربي بعدين اكلي ريوكج

-مالي نفس

-لخاطري شمس فدوه اروحلج بس الحليب علمود صوتج

شلت الحليب وكمت اشرب  بيه شويه شويه وملاك اجت تروح صحت وراها

-اخذيني وياج

-لا وين انتي ابقي هنا ارتاحي

-لا اجي وياج

عفت كوب الحليب بعد ماخلصته وكمت

لزمتني ملاك وطلعنه سوه من الغرفه

بيتنه صاير هوسه والهول متروس ترس نسوان وكلها تلطم وتبجي اول مره اشوفهن والملايه  صوتها يصيح بالسماعه

ام ملاك وفليحه جانن متصدرات الهول والنسوان تجي تعزيهن

رحت كعدت يمهن واسمع النسوان يكولن هاي بنت المرحومه ويجن ياخذن من خاطري وانا گلبي معصور عصر

ملاك توزع ماي وجاي وتفتر بوحدها منا ومنا

ماتندمت ولا لحظه من بدت صداقتنه لهسه انو اختاريتها صديقه واخت اليه وهيه اول صديقه اليه بحياتي كلها وانا هم جنت اول صديقه الها احنه الاثنين نكمل بعض وبيناتنه هواي صفات مشتركه من ذاك اليوم وانا وملاك تقربنه من بعض أكثر وأكثر وعائلتنه صارت عائله وحده

امال

لمن خذت امي ملاك وراحت للمستشفى بقيت كاعده افكر بغرفتي حايره شسوي

شلت الجهاز واتصلت على عمار والغريب جاوب عليه بسرعه  بس بقى ساكت وماحجه شي

-الو عمار اني امال ليش ساكت احجي باع عمار انا وياك لزوم نتزوج اليوم قبل باجر استعجل وجيب امك وتعال اخطب وخل نعقد بعدها كلشي ماريد منك نتزوج على راحتنه نيمت ما نريد عسى ما بعد عشر سنين اهم شي نعقد شيخ ارجوك عمار جاوبني وريحني وكولي راح اجي