امال وملاك (مكتملة) (سلسلة كوارث وخبائث المجتمع)

البارت 19

19
بعد ما خلصت كلام وي شمس الي موتتني ضحك من وره سوالفها وي مرت ابوها

جعت هواي كلت اروح اسوي لروحي شي اكله

فتحت الثلاجه فارغه مابيها شي شكم طماطيه وكرصتين خبز وحليب شويه ضال اووف ينرادلنه روحه للسوك نتسوك

رحت حميت الماي للحليب وسويته وكمت اكل حليب وخبز وافكر بأمال ياترى وين صارت ووين هسه هيه

دخلت امي للمطبخ واجت كعدت يمي اباوعلها هواي تعبانه ووجه اصفر

رحت سويتلها حليب وانطيتها شربته من دون ماتحجي ولا كلمه

سمعت الباب اندك كمت فتحته منو جاينه هسه

طلعت جارتنه ام تيم الدلاله الي دائما امال تشتري منها ملابس ومكياج

رحبت بيها ودخلتها للبيت

مريه تصير شويه سمينه وعدها شامه يم حاجبه الي داكتهن تاتو يخبل ودائما تطك بعلجها

سلمت على امي واستغربت من شافت حالتها متدهوره بس ماحجينالها شي وكلنالها عدها ضغط واتخربطت

سألت على امال وكلتلها عد بيت اقاربنه كم يوم وتجي

-زين عيني امال اطلبها فلوس صار هواي وانا هسه أريد اشتري بضاعه وجاي الم بفلوس الاقصاد عند معاميلي وكلها وفتني بقت بس امال

اووف هسه هاي منين طلعتلنه هوه احنه اكل ماعدنه

-زين خاله انتي شكد تطلبيها

-يعني تقريبا ١٥٠ الف

-عززه شدعوه

-اي والله اخر مره خذت مني هواي غراض انا هم كلتلها لاتكثرين دين على روحج كالت معليج انا اوفيج  والصراحه هيه دائما توفيني هل انا ابيعلها هواي غراض و الله احد غيرها أكثر من ٥٠ ألف غراض مابيعلهم

-ان شاء الله خاله نوفيج كل فلوسج بس اصبريلنه هالفتره

-اي عيني شسالفه بس انا اجيت عبالي هيه عدها الفلوس على راحتكم بعد گلبي يلا انا استأذن ضلت عندج العافيه عيني ام امال

-الله يعافيج خيه

-يلا مع السلامه

وصلتها للباب ورجعت لكيت امي تريد تطلع من المطبخ

-ها ماما

-يمه رايحه لابوج اشوفه صار فتره كاعد وماجاي يروح لدوامه وجاي يشوف حالتنه اكل ماعدنه

-ماما لاتضغطين عليه ابوي هم كبر وتعب هواي

-يمه لعد شلون منو يصرف علينه والعالم كلمن يكول ياروحي

راحت لغرفتها ورجعت انا كعدت مكاني خليت ايدي على راسي وافكر شلون اساعد اهلي

بعد سنين يلا اكدر اتخرج ومنو يكول اذا اتخرجت اتوظف بساعتها هم لزوم اكعد سنه سنتين هاي اذا ماكعدت العمر كله ساعتها شراح تفيدني الشهاده ماراح توكلني خبز