امال وملاك (مكتملة) (سلسلة كوارث وخبائث المجتمع)

البارت 18

18
ماعرف الوقت مشه بسرعه

نيمت طلعنه ورجعنه انا وفاطمه وامينه ماعرف

جنت واكفه ابدل الفستان نفسه الي جنت قبل شويه صافنه عليه اووف هاي شوكت لبسته وشوكت طلعت

دكت عليه الباب امينه ودخلت هلكانه من التعب ذبت روحها على الجربايه

-اخخ راح اموت ميته ميته من التعب كله من وره فاطمه ماخلت لعبه تعتب علينه نفتر منا ومنا مثل الزعاطيط

-شنوو كنه بمدينة الالعاب

-اي عيني حقج انتي ما تدرين  بالدنيا طشت رشت رحنه ورجعنه وانتي صافنه وكلمه وحده ماحجيتي عبالك عاشكه

بقيت صافنه بكلام امينه عزه هاي صدك عود ياربي كله من وره كمال لا شفت شي ولاتونست بالطلعه هسه انا شذكراني بالماضي اووف

ماحسيت الا ايد تكرصني من خصري

ااخخ امينه الف مره كتلج بطلي هالعاده الزفره مالتج

-كليلي ولج عاشكه مو منو هذا سعيد الحظ التفكرين بي كليلي

-انجبي انا وين وانتي وين

-دكليلي فدوه والله شوقتيني منو هوه

-امييينه وتاليها وياج تعرفين كلش زين انا ماكو احد دخل بالي بعد الي صار بيه و گلبي سديته من زمان عن الحب وضيمه

-لج والله الحب حلو بس انتي حضج الاغبر وكعج وي كمال

-بسج امينه لاتجيبين سيرته كدامي

جرتني وكعدتني ع الجربايه

-وشوكت كليلي شوكت راح تبقين تتهربين من سيرته

-امينه انا تعباااانه كلش تعبانه واحس بس حروف اسمه مثل الصخر على روحي ماريد احد يذكره كدامي

-غلط حبي غلط الجاي تسوينه مو صحيح

-اعرف و الله اعرف انتي مو عبالج انا اسولف واضحك واطلع معناها مرتاحه لا والله العظيم ناار نااار بداخلي محد يحس بيها ولج امينه انا تايهه احس روحي تايهه لا عندي ام اشكيلها وتحس بيه ولااب  اشمر روحي بحضنه من ضيم الدنيا وين اروح كليلي ويين

-حبيبتي لعد انا وين رحت ذبي حملج على الله وثانيا عليه

-ونعم بالله امينه بس انا احس حتى ربي ماراضي على السويته

-ليش انتي شسويتي انتي كلشي سويتي بالحلال وبشرع رب العالمين صدكيني اريج هذا الشيطان هيج جاي يوسوسلج يريدج تبتعدين عن ربج 

-امينه صدكي انا كلش قريبه من ربي وإيماني بي كلش قوي بس تجي لحظات ماعرف اذا راح تفهميني لو لا احس بيها روحي بدنيا ضلمه وكل الأبواب مسدوده بوجهي واختنك حتى من الهوه  والهدوم الي لابستها احس بيهن بثكل الجبل على روحي